៣ ចំណុចដែលមិនគួរយកដាក់ខ្លួន ដើម្បីឲ្យជីវិតបានធូរស្រាលបន្តិចម្ដងៗ
- 2019-03-07 05:00:00
- ចំនួនមតិ 0 | ចំនួនចែករំលែក 0
៣ ចំណុចដែលមិនគួរយកដាក់ខ្លួន ដើម្បីឲ្យជីវិតបានធូរស្រាលបន្តិចម្ដងៗ
ពេលខ្លះ ជៀសវាងរឿងមួយចំនួន គឺជាវិធីដ៏ល្អបំផុត ដើម្បីដកខ្លួនចេញពីភាពអំពល់ទុក្ខទាំងឡាយ។ កើតមកជាមនុស្សស្រី ដើម្បីទទួលបានសុភមង្គល ត្រូវលះបង់រឿងជាច្រើន។ តែទោះបីជាលះបង់អ្វី ក៏ដោយក៏មិនអាចលះបង់ខ្លួនឯងបានដែរ។ ដើម្បីទទួលបានភាពធូរស្រាលក្នុងជីវិត ពេលខ្លះយើងត្រូវតែបោះបង់រឿងធ្ងន់ខ្លួនខ្លះ ទើបការរស់នៅមានក្ដីសុខ។ ចំណុចទាំង ៣ ខាងក្រោមនេះ គឺជារឿងដែលមនុស្សស្រីគួរបោះបង់ចោលដើម្បីមានក្ដីសុខក្នុងខ្លួន។
១. កុំរិះថាំពេកសម្រាប់ខ្លួនឯង
មនុស្សស្រីខ្លះគួរឲ្យអាណិតខ្លាំងណាស់ ដោយសារតែចង់ទំនុកបម្រុងឲ្យពុកម្ដាយ បងប្អូនឲ្យបានគ្រប់គ្រាន់ដូចគេ ខ្លួនឯងសុខចិត្តខ្វះខាតក៏បានឲ្យតែគ្រួសារបានស្មើគេស្មើឯង។ រវល់តែគិតគ្រួសារច្រើនពេក ដល់ថ្នាក់ត្បៀតខ្លួនឯង លែងហ៊ានចាយអ្វីទាំងអស់។ គ្រាន់តែទិញក្រែមមួយដើមក៏ត្រូវគិតច្រើនដែរ។ យល់ថា កូនធំហើយត្រូវគិតដល់ម៉ែឪ តែធ្វើយ៉ាងម៉េចក៏ត្រូវមើលថែខ្លួនឯងដែរណាមនុស្សស្រី។
**២. កុំគិតពីសម្ដីអ្នកផងច្រើនពេក**
ហេតុអីចាំបាច់គិតពីសម្ដីរបស់គេនិយាយលើយើង ទាំងគេមិនទាំងស្គាល់យើងច្បាស់ផងនោះ? សួរថាគេស្គាល់យើងបានប៉ុន្មានភាគរយ ហើយដឹងថាយើងធ្លាប់ឆ្លងកាត់អ្វីឬអត់ នៅពេលពោលពាក្យអាក្រក់ទាំងអស់នោះចេញមកនោះ? គេនិយាយហើយក៏ភ្លេចទៅវិញ ដូចនេះយើងគ្មានហេតុផលអ្វីដែលត្រូវចងចាំពាក្យទាំងនោះឡើយ។
៣. កុំឱបក្រសោបរឿងច្រើនពេក
ដោយសារតែខ្លាចមានរូបភាពក្នុងភ្នែកញាតិ មនុស្សស្រីជាច្រើនត្រូវឱបក្រសោបរឿងជាច្រើន លើសពីសមត្ថភាពរបស់ខ្លួន។ ជាក់ស្ដែងដូចជា មើលការងារផ្ទះផង ធ្វើការខាងក្រៅផង រឿងតូចធំក្នុងគ្រួសារក៏រ៉ាប់រងទៀត មានបញ្ហាក្រៅក្នុងអីក៏រកតែយើង។ ទោះដឹងថានេះគឺជាការជួយរំលែកបន្ទុកគ្រួសារ តែយើងគួរបដិសេធរឿងខ្លះដែលគិតថាហួសពីសមត្ថភាពរបស់ខ្លួន ហើយចំណាយពេលសម្រាប់ខ្លួនឲ្យបានច្រើនជាងមុន៕
ចុចអាន៖រស់ក្នុងសង្គមទំនើបមួយ មនុស្សស្រីគួរតែដឹង និងរៀនសូត្ររឿង ១០ យ៉ាងនេះ