កម្លាំងចិត្តដ៏ធំពីក្រុមគ្រួសារ ធ្វើឲ្យនារីម្នាក់ឈ្នះពានរង្វាន់ ២ ក្នុងពេលតែមួយ

2019-02-18 10:00:00
ចំនួនមតិ 0 | ចំនួនចែករំលែក 0

នៅក្នុងកម្មវិធីប្រគល់រង្វាន់របស់ការប្រកួត "ក្តីសុបិនស្រ្តី" (DREAM GIRLS Project) ដែលប្រព្រឹត្តទៅនៅថ្ងៃទី ១៧ ខែកុម្ភៈ ក្នុងបរិវេណ Major Cineplex ផ្សារទំនើប AEON MALL។

លោកស្រី វ៉ាកាណា ដែលជាម្ចាស់គម្រោង DREAM GIRLS Project បានបង្កើតកម្មវិធីនេះឡើង ក្នុងគោលបំណង លើកកម្ពស់ឲ្យមនុស្សស្រីទាំងអស់ បានបញ្ចេញនូវស្នាដៃ មានភាពក្លាហានក្នុងការបង្ហាញនិងសម្រេចក្តីសុបិនរបស់ខ្លួន។

ការប្រកួតរចនាដើម្បីក្តីសុបិនស្ត្រីលើកទី ៨ នេះ មានបេក្ខភាពចូលរួមប្រកួតទាំងអស់ប្រមាណ ៣៥៤ នាក់ មានអាយុចាប់ពី ៧-៣៥ ឆ្នាំ ដែលតម្រូវឲ្យពួកគេ បង្កើតគំនិតច្នៃប្រឌិតក្នុងការរចនាគូររូបភាព ក្រោមប្រធានបទ "កម្ពុជាដ៏អស្ចារ្យ" (Amazing Cambodia)។

នូ ចាន់ស្រីលីន

សម្រាប់ជ័យលាភីលេខ១ គឺបានទៅលើកញ្ញា នូ ចាន់ស្រីលីន ដែលបានជ្រើសរើស និងវាយតម្លៃយ៉ាងសុក្រឹតពីគណៈកម្មការទាំង៣ រូប ដោយធ្វើការវិនិច្ឆ័យទៅលើ គំនិតច្នៃប្រឌិតខ្ពស់ ការផាត់ពណ៌ស៊ីគ្នាល្អ និងការបង្កប់អត្ថន័យនៅក្នុងរូបរបស់នាង។

និស្សិតបញ្ចប់ការសិក្សាផ្នែកស្ថាបត្យកម្មរូបនេះ បាននិយាយរៀបរាប់ទាំងអារម្មណ៍រំភើបក្តុកក្តួល ថា "ខ្ញុំពិតជាមិននឹកស្មានថា ខ្លួនឯងអាចដណ្តើមយកជ័យលាភីលេខ១បែបនេះសោះ ខ្ញុំពិតជាសប្បាយចិត្តខ្លាំងណាស់ ដែលការខិតខំព្យាយាមកន្លងមក អាចទទួលបានលទ្ធផលសមដូចបំណង"។ នាងបន្តទៀតថា "ខ្ញុំអាចឈ្នះពានរង្វាន់មួយនេះ ក៏ព្រោះតែការរួមចំណែកដ៏ធំពីក្រុមគ្រួសារ ពួកគាត់តែងគាំទ្រលើកទឹកចិត្តនូវអ្វីដែលខ្ញុំធ្វើជានិច្ច ថែមទាំងផ្តល់យោបល់សម្រាប់កែលម្អ ជាហេតុធ្វើឲ្យខ្ញុំកានតែខំប្រឹងនិងមានកម្លាំងចិត្តទ្វេដង"។

ក្រុមគ្រួសារ នូ ចាន់ស្រីលីន

គួរបញ្ជាក់ថា ក្រៅពីក្លាយជាម្ចាស់ពានរង្វាន់លេខមួយ ដែលមានចំនួនទឹកប្រាក់ ១០០០ ដុល្លារ ក្នុងពេលនោះដែរ កញ្ញា នូ ចាន់ស្រីលីន ក៏ទទួលបានពានរង្វាន់លេខមួយពីហាងកាហ្វេ Brown ដែលមានទឹកប្រាក់សរុបទាំងអស់ចំនួន១៣០០ដុល្លារអាមេរិក៕