បើនៅតែខ្លាចឈឺចាប់ដូចពេលអតីតកាល ធ្វើម៉េចអាចជួបស្នេហ៍ពិតបាន?

2019-01-04 06:00:00
ចំនួនមតិ 0 | ចំនួនចែករំលែក 0

ខ្ញុំតែងតែគិតថាលើលោកនេះ ស្នេហាប្រៀបដូចជាល្បែង។ អ្នកខ្លះដើម្បីមនុស្សម្នាក់ អ្វីក៏ហ៊ានលះបង់ ឲ្យតែអាចរស់នៅជាមួយគ្នាអស់មួយជីវិត ប៉ុន្តែអ្នកច្បាស់ទេថា ពេលបាននៅជាមួយគ្នាហើយ អ្វីៗមិនអាចប្រែប្រួល?

យើងអាចយល់ចិត្តគ្នានៅថ្ងៃនេះ ប៉ុន្តែ២០ឆ្នាំឬ៣០ឆ្នាំតទៅមុខទៀត នរណាទៅមើលឃើញនោះ? សូម្បីប្តីប្រពន្ធរៀបការហើយ សន្យារស់នៅស្រលាញ់គ្នាអស់មួយជីវិត ទីបំផុត ២០-៣០ឆ្នាំក្រោយ ក៏នៅតែអាចបែកគ្នាដដែល។ ល្បែងស្នេហាគឺ៥០/៥0 អាចនឹងជោគជ័យ អាចនឹងបាត់បង់ទាយមិនត្រូវឡើយ ដូច្នោះហើយបានជាខ្ញុំខ្លាច។ ទំនុកចិត្តពិបាកនឹងយកមកវិញណាស់ បន្ទាប់ពីធ្លាប់ឆ្លងកាត់ការឈឺចាប់រាប់មិនអស់កាលពីអតីតកាល។

ពេលស្រលាញ់នរណាម្នាក់ជ្រាលជ្រៅ អ្នកតែងគិតថាគេក៏ស្រលាញ់អ្នកដូចគ្នា ហើយបើគេចាកចេញក៏ព្រមទទួលស្គាល់ផងទៅ ព្រោះជីវិតតែប៉ុណ្ណឹងឯង យើងមិនអាចតោងជើងគេឲ្យនៅជាមួយបានទេ បើគេអស់ចិត្តហើយនោះ។ ចាត់ទុកថាជាតិនេះ អ្នកមិនមែនជាគូនឹងគ្នាទៅចុះ។

ក្តីឈឺចាប់ដែលបានកើតឡើងលើរូបអ្នក វាបានធ្វើឲ្យអ្នកពិបាកទុកចិត្ត ពិបាកជ្រើសរើសនរណាម្នាក់ជាដៃគូ បារម្ភគ្រប់ពេលវេលា ខ្លាចអ្នកថ្មីដូចអ្នកចាស់ទៀត មិនដឹងគួរសម្រេចចិត្តបែបណាទើបល្អ។

អ្នកអាចនឹងខ្លាចពិភពលោកទាំងមូល មិនដឹងថាម្នាក់ណាមានក្តីស្រលាញពិតប្រាកដសម្រាប់អ្នក។ ឈប់ភ័យខ្លាចតទៅទៀត ឱកាសស្វែងរកសុភមង្គលឲ្យខ្លួនឯងគឺមិនខ្វះឡើយ ឲ្យតែអ្នកហ៊ានសាកល្បង បើកចិត្តចាប់ផ្តើមសារជាថ្មី ជាមួយនរណាដែលមានចិត្តលើអ្នកដែរ។ ដោយសារតែមនុស្សស្រី ចូលចិត្តគិតច្រើនពេក រំពឹងខ្ពស់ពេក ទើបឈឺចាប់កាន់តែខ្លាំង ដូច្នេះហើយធ្វើអ្វីក៏ដោយហ៊ានសាកល្បង តែកុំរំពឹងខ្ពស់ពេក ទើបមិនសូវឈឺចាប់។ បើអ្វីៗមិនសមតាមបំណងទេ ក៏តាមហ្នឹងទៅ កុំដាក់សម្ពាធឃុំឃាំងខ្លួនឯង ស្វែងរកផ្លូវថ្មី ដើររហូតទាល់តែបានជួបស្នេហ៍ពិត៕

ចុចអានបន្ត៖