ស្វែងយល់ទីតាំងមុនកើតលើមុខ និងដំណោះស្រាយដែលត្រឹមត្រូវ

2018-12-08 01:00:00
ចំនួនមតិ 0 | ចំនួនចែករំលែក 0

សម្រាប់មនុស្សស្រី មុនគឺជាសត្រូវសម្រាប់សម្រស់ដែលមិនចង់សូម្បីតែរម្លឹកឈ្មោះដល់។ ក្រៅពីធ្វើឱ្យសម្រស់ខូចហើយ វាក៏ជាសញ្ញាបង្ហាញពីស្ថានភាពសុខភាពរបស់អ្នកផងដែរ។ ដូច្នេះចូររៀនសំគាល់ទីតាំងដែលមុនទាំងនោះកើតនៅលើមុខ ដើម្បីដឹងពីឫសគល់ រួមទាំងវិធីដោះស្រាយឱ្យបានទាន់ពេលវេលា៖

ចុចអាន៖ ចេះតែកើតមុនមិនឈប់តាមពិតមកពីមូលហេតុទាំងនេះសោះ

ទី១-២ លើថ្ងាសសង្ខាង៖ បញ្ហាក្រពះពោះវៀន

មុនដែលកើតនៅផ្នែកនេះគឺជាសញ្ញានៃជំងឺក្រពះពោះវៀន។ ចូរកាត់បន្ថយការញ៉ាំអាហារសម្រន់ និងអាហារដែលមានជាតិខ្លាញ់ច្រើន ហើយងាកមកផឹកទឹកឱ្យបានច្រើន និងញ៉ាំបន្លែដូចជាត្រសក់ជាដើមបន្ថែម។

ទី៣ ប្រជុំចិញ្ចើម៖ ថ្លើម

កាត់បន្ថយការផឹកជាតិស្រវឹង អាហារខ្លាញ់ និងប្រភេទទឹកដោះគោ។ មុនដែលកើតចេញនៅត្រង់តំបន់នេះក៏ជាសញ្ញានៃប្រតិកម្មចំណីអាហារផងដែរ ដូច្នេះគួរតែពិនិត្យមើលរបបអាហាររបស់អ្នកឡើងវិញ។ ម្យ៉ាងទៀត គួរឆ្លៀតពេលកន្លះម៉ោងរាល់ថ្ងៃដើម្បីហាត់ប្រាណ និងគេងឱ្យបានគ្រប់គ្រាន់ដើម្បីឱ្យថ្លើមបានសម្រាក និងបន្សុទ្ធជាតិអាក្រក់ចេញឱ្យអស់។

ចន្លោះម៉ោង១១យប់ ដល់ម៉ោង១រំលងអាធ្រាត្រគឺជាពេលវេលាដែលថ្លើមបញ្ចេញជាតិពុលដែលត្រូវយកចេញអំឡុងពេលគេង។ ហេតុនេះគួរចូលគេងឱ្យបានមុនម៉ោង១១ ឬត្រឹមម៉ោង១០យប់ទើបជាការប្រសើរ។

ចុចអាន៖ ចេះតែកើតមុនមិនឈប់តាមពិតមកពីមូលហេតុទាំងនេះសោះ

ទី៤-៥ ត្រង់ភ្នែក៖ តម្រង់នោម

មុន ឬស្នាមខ្មៅនៅក្រោមភ្នែកគឺជាសញ្ញាប្រាប់ថា តម្រង់នោម និងក្រលៀនរបស់អ្នកមានបញ្ហា។ បើនៅសុខៗស្រាប់តែកើតមុននៅកន្លែងនេះ អ្នកប្រហែលជាមានអារម្មណ៍អស់កម្លាំង គេងមិនគ្រប់គ្រាន់ ឬមានបញ្ហាតានតឹងច្រើនពេក។ ចំណែករបបអាហាររបស់អ្នកក៏ខ្វះជីវជាតិដែរ។

ធ្វើសកម្មភាពមួយចំនួនដើម្បីរំសាយអារម្មណ៍តានតឹង ដូចជាធ្វើសមាធិ ឬលំហែនៅតាមមាត់សមុទ្រ ធ្វើអារម្មណ៍ឱ្យសប្បាយៗជាដើម។ ក្រៅពីនេះ គួរញ៉ាំបន្លែផ្លែឈើដែលសម្បូរវីតាមីន C ដូចជាគីវី ម្ទេសប្លោក ឬក៏ក្រូចនឹងអាចជួយដោះស្រាយបញ្ហានេះបាន។

ទី៦ ចុងច្រមុះ៖ បេះដូង

តាមវិជ្ជាពេទ្យរបស់ជនជាតិចិន មុនដែលកើតនៅលើចុងច្រមុះ បង្ហាញថាបេះដូងរបស់អ្នកកំពុងខ្វះវីតាមីន B និងប្រូតេអ៊ីន ឬបានន័យថាអ្នកមិនសូវសកម្ម ឬមានបញ្ហាដែលកំពុងព្រួយបារម្ភ។ ជាមួយគ្នាដែរ បើមានមុនត្រង់នេះ ស្បែករបស់អ្នកនឹងត្រូវបាត់បង់សារធាតុចិញ្ចឹម ហើយចលនាឈាមក៏មិនប្រក្រតីផងដែរ។

ដើម្បីដោះស្រាយបញ្ហានេះ ត្រូវញ៉ាំបន្លែបៃតង និងផ្លែឈើបន្ថែម ញ៉ាំត្រី និងហាត់ប្រាណហោចណាស់១ថ្ងៃ ១ម៉ោង។

ទី៧-៨ លើត្រចៀក៖ តម្រង់នោម

មិនខុសពីទី៤-៥ ទេ មុននៅលើត្រចៀកបង្ហាញពីបញ្ហាតម្រង់នោម ដែលអ្នកត្រូវផឹកទឹកឱ្យបានច្រើន កាត់បន្ថយកាហ្វេ ឬជាតិអាល់កុល និងភេសជ្ជៈដែលមានជាតិសូដា ព្រោះវានឹងនាំឱ្យរាងកាយខ្សោះជាតិទឹក។

ចុចអាន៖ អ្នកកើតមុន បើហ៊ានញ៉ាំអាហារ ៧មុខនេះច្រើន មុននឹងឡើងកាន់តែខ្លាំង

ទី៩-១០ លើថ្ពាល់៖ បញ្ហាសួត

តើអ្នកជាមនុស្សជក់បារី ឬមានបញ្ហាប្រតិកម្មដែរទេ? បើអត់ទេ ចូរកុំឱ្យរាងកាយរបស់អ្នកប៉ះពាល់កម្ដៅខ្លាំងពេក ត្រូវញ៉ាំអាហារត្រជាក់ឱ្យបានច្រើន កាត់បន្ថយអាហារដែលមានជាតិស្ករខ្ពស់ និងទទួលខ្យល់បរិសុទ្ធឱ្យបានច្រើន។

មួយវិញទៀត គួរជៀសវាងអាហារដែលនាំឱ្យឡើងជាតិអាស៊ីដ ដូចជា សាច់ ទឹកដោះគោ ជាតិអាល់កុល ជាតិកាហ្វេអ៊ីន និងស្ករ ហើយជំនួសមកវិញដោយបន្លែផ្លែឈើ។ ដៃកខ្វក់ និងពូក ខ្នើយមិនស្អាតក៏ជាមូលហេតុដែលនាំឱ្យកើតមុននៅកន្លែងនេះបានដែរ។

ទី១១-១២ ថ្គាម៖ បញ្ហាអរម៉ូន

មុនដែលកើតនៅទីនេះជាសញ្ញានៃអារម្មណ៍ស្ត្រេស និងបម្រែបម្រួលអរម៉ូន។ អ្នកគួរតែព្យាយាមកាត់បន្ថយបន្ទុកការងារខ្លះ សម្រាកឱ្យបានគ្រប់៨ម៉ោង ផឹកទឹកឱ្យគ្រប់គ្រាន់ ញ៉ាំបន្លែបៃតង និងរក្សាស្បែកឱ្យបានស្អាតល្អ។

ទី១៣ ចង្កា៖ អរម៉ូន

ភាគច្រើនប៉ុន្មានថ្ងៃមុនមករដូវ អ្នកអាចសង្កេតឃើញមុនកើតនៅត្រង់ចង្កា ដោយសារបម្រែបម្រួលអរម៉ូន។ អ្នកគួរគិតគូរដល់ការញ៉ាំអាហារណាដែលអាចជួយធ្វើឱ្យដំណើររដូវរបស់អ្នកបានទៀងទាត់ ហើយត្រូវប្រាកដថា អ្នកមិនបានយកចង្កាទៅច្រត់លើដៃ ពេលអស់កម្លាំងឬធុញឡើយ ព្រោះទង្វើបែបនេះអាចធ្វើឱ្យជាតិប្រេង ឬភាពកខ្វក់លើម្រាមដៃឆ្លងមកទុំជាប់នឹងចង្កា ដែលបង្កជាមុនបែបនេះ។

ទី១៤ នៅក៖ ក្រពះ

ញ៉ាំអាហារដែលមានជាតិកាកសរសៃឱ្យបានច្រើនដើម្បីទៅបន្សុទ្ធជាតិពុល និងញ៉ាំបន្លែសាច់ដូចជា ផ្កាខាត់ណាខៀវ ត្រីសាល់ម៉ុន ផ្លែបឺរីជាដើម ដើម្បីទៅសម្រួលប្រព័ន្ធរំលាយអាហារឱ្យដំណើរការស្រួលឡើងវិញ៕

ប្រភព៖ bellatory ប្រែសម្រួល៖ សរ សុគន្ធី