អ្នកកើតមុន បើហ៊ានញ៉ាំអាហារ ៧មុខនេះច្រើន មុននឹងឡើងកាន់តែខ្លាំង

2018-08-07 07:08:55
ចំនួនមតិ 0 | ចំនួនចែករំលែក 0

មុន គឺជាបញ្ហាលំដាប់កំពូលមួយសម្រាប់មនុស្សស្រីជាច្រើនរូប។ ប៉ុន្តែប្រិយមិត្តដឹងអត់ថា ក្រៅពីកម្ដៅថ្ងៃ និងធូលីដី អាហារដែលស្រីៗញ៉ាំរាល់ថ្ងៃក៏មានចំណែកនាំឲ្យកើតមុនបានដែរ។ ត្បិតតែស្បែករបស់យើងម្នាក់ៗមានប្រតិកម្មទៅនឹងអាហារដែលបណ្ដាលឲ្យកើតមុនមិនដូចគ្នា ប៉ុន្តែយើងក៏គួរដឹងពីប្រភេទអាហារមួយចំនួនដែលអាចបណ្ដាលឲ្យកើតមុនដើម្បីចៀសវាងប្រសិនបើកំពុងមានបញ្ហារឿងមុន៖

១. ភេសជ្ជៈមានជាតិអាល់កុល (គ្រឿងស្រវឹង)

ជាតិអាល់កុលដែលចូលក្នុងរាងកាយនឹងធ្វើឲ្យរាងកាយរបស់យើងបញ្ចេញជាតិពុលមិនបានប្រក្រតី ហើយជាតិពុលដែលជាប់គាំងក្នុងរាងកាយនឹងត្រូវបញ្ចេញមកតាមរយៈមុននៅលើស្បែក។

២. ភេសជ្ជៈដែលមានជាតិកាហ្វេអ៊ីន

ភេសជ្ជៈប្រភេទតែ កាហ្វេ ភេសជ្ជៈប៉ូវកម្លាំង ឬទឹកក្រូចហ្គាស ក៏ជាដើមហេតុដែលអាចបង្កឲ្យកើតមុនដែរ ដោយសារវាមានជាតិកាហ្វេអ៊ីនខ្ពស់។ ដូច្នេះអ្នកគួរផឹកក្នុងបរិមាណតិចតួចបានហើយ។

៣. របស់មានខ្លាញ់ ចៀន បំពង

អាហារដែលមានជាតិខ្លាញ់ខ្ពស់នឹងអាចបង្កបញ្ហាមុន ដោយសារជាតិខ្លាញ់ទាំងនោះនឹងធ្វើឲ្យបរិមាណខ្លាញ់នៅរន្ធញើសកើនឡើង។ ជាតិអាស៊ីដក្នុងប្រេងឆា ឬប័រ នឹងធ្វើឲ្យរាងកាយរបស់យើងផលិតសារធាតុដែលធ្វើឲ្យរលាកស្បែកកាន់តែច្រើន ដូច្នេះសម្រាប់អ្នកដែលកើតមុនស្រាប់ វានឹងធ្វើឲ្យស្បែកអ្នករលាកកាន់តែខ្លាំង។

៤. ទឹកដោះគោ

ក្នុងទឹកដោះគោមានអ័រម៉ូនដែលជំរុញឲ្យមានការកើតមុន។ អ័រម៉ូននេះកើតចេញពីសត្វគោ ឬជាអ័រម៉ូនដែលសត្វគោទទួលបានតាមរយៈរបៀបនៃការចិញ្ចឹម។ ដូច្នេះអ្នកកើតមុនដែលត្រូវការជាតិប្រូតេអ៊ីន គួរតែទទួលទានអាហារផ្សេងក្រៅពីទឹកដោះគោ ដូចជាស៊ុត តៅហ៊ូ សណ្ដែក ត្រី និងសាច់ផ្សេងៗបាន។

៥. សូកូឡា

សូកូឡាផ្សំឡើងពីគ្រឿងផ្សំច្រើនប្រភេទដូចជាកាកាវ ប្រេងកាកាវ ស្ករ ទឹកដោះគោ សារធាតុ Lecithin ដែលធាតុផ្សំខ្លះអាចបណ្ដាលឲ្យកើតមុនបាន។ យ៉ាងណាក៏ដោយ មនុស្សម្នាក់ៗមានសភាពស្បែកដែលឆាប់កើតមុនខុសៗគ្នា អ្នកខ្លះញ៉ាំហើយក៏ឡើងមុន អ្នកខ្លះញ៉ាំហើយក៏ធម្មតា ប៉ុន្តែបើអ្នកញ៉ាំហើយមានបញ្ហាផ្សេងៗចំពោះរាងកាយនោះ គួរតែកាត់បន្ថយ ឬកុំញ៉ាំតែម្ដងក៏ល្អដែរ។

៦. បង្អែម ឬនំផ្អែម

របស់ផ្អែមផ្សេងៗដែលស្រីចូលចិត្តញ៉ាំញឹកញាប់មិនថាជាការ៉េម បង្អែមផ្សេងៗ នំខេក -ល- គឺសុទ្ធតែប្រើជាតិស្ករខ្ពស់។ បើអ្នកញ៉ាំច្រើន វានឹងធ្វើឲ្យជាតិស្ករក្នុងឈាមឡើងខ្ពស់រហូតរាងកាយត្រូវផលិតអ័រម៉ូនអាំងស៊ុយលីន ដើម្បីទប់ទល់ការកើនឡើងនេះ ហើយនឹងធ្វើឲ្យស្បែកមុខរបស់យើងផលិតជាតិខ្លាញ់កកកុញដែលជាមូលហេតុបណ្ដាលឲ្យកើតមុនដែរ។

៧. អាហាររសជាតិហឺរខ្លាំង

ការបរិភោគអាហារហីរខ្លាំងពេក អាចជាគ្រោះថ្នាក់ដល់ក្រពះពោះវៀនរបស់អ្នក។ ក្រៅពីនេះ វាអាចបង្កឲ្យកើតអាការៈរលាកស្បែក និងបង្កឲ្យកើតមុនលើស្បែករបស់អ្នក។ ដូច្នេះអ្នកដែលកើតមុន គួរញ៉ាំហីរក្នុងកម្រិតទាបបានហើយ ហើយត្រូវថែរក្សាស្បែកឲ្យបានល្អដើម្បីការពារកុំឲ្យមានបញ្ហាស្បែកខ្លាំងលើសដើម ៕