មនុស្សស្រីដែលមានបេះដូងរឹងមាំ នឹងមិនខ្លាចភាពឯកានោះទេ
- 2018-12-05 04:50:36
- ចំនួនមតិ 0 | ចំនួនចែករំលែក 0
មនុស្សស្រីដែលមានបេះដូងរឹងមាំ នឹងមិនខ្លាចភាពឯកានោះទេ
មនុស្សស្រីម្នាក់ដែលរឹងមាំ នាងនឹងឆ្លងកាត់ថ្ងៃដែលឯកានោះបានយ៉ាងធម្មតា ខណៈមនុស្សស្រីដទៃពិបាកចិត្ត និងខ្លាចភាពឯកានោះមកជិតខ្លួន។
គេថាមនុស្សស្រីត្រូវចេះទន់ភ្លន់ ម្ញ៉ិកម្ញ៉ក់ខ្លះទើបមនុស្សប្រុសស្រឡាញ់ និងចង់ការពារ។ មនុស្សស្រីដែលមិនចេះទន់ភ្លន់ ឬរឹងមាំពេកមិនសូវទាក់ទាញចិត្តមនុស្សប្រុសឲ្យលង់ស្នេហ៍នោះទេ។
ត្រឡប់មកសួរនាងវិញថាហេតុអីមនុស្សស្រីដែលមានបេះដូងរឹងមាំមិនសូវចេះទន់ភ្លន់ ញ៉ិកញ៉ក់អីចឹង? ហេតុអីមិនសូវចូលចិត្តឲ្យអ្នកណាមកជួយនាង ឬមានគុណស្រ័យដាក់នាង? មនុស្សស្រីបែបនេះមិនមែនជាមនុស្សស្រីដែលត្រូវការមនុស្សប្រុសមកធ្វើជាបង្អែកសម្រាប់ជីវិតនាងនោះឡើយ។ នាងមិនចាំបាច់ធ្វើឬកធ្វើរាង ទន់ជ្រាយ ដាក់អ្នកណាដើម្បីគ្រាន់តែចង់ឲ្យគេមកស្រឡាញ់ខ្លួនទេ។ នាងមិនចូលចិត្តទង្វើបែបនេះ ហើយមានអារម្មណ៍ថាដោយសារតែមនុស្សស្រីមានចរិតបែបនេះហើយទើបមនុស្សប្រុសមិនសូវឲ្យតម្លៃ ហើយគិតថាគ្មានមនុស្សប្រុសមនុស្សស្រីនឹងដាច់ខ្យល់ស្លាប់។
មនុស្សស្រីរឹងមាំមិនសំដៅថាជាមនុស្សស្រីក្បាលរឹង គ្មានហេតុផល ឬមិនចេះស្រឡាញ់អ្នកណា ឬមិនឲ្យអ្នកណាស្រឡាញ់នាងនោះទេ គ្រាន់តែនាងជាមនុស្សដែលចូលចិត្តពឹងលើខ្លួនឯងច្រើនជាងសុំឲ្យអ្នកដទៃជួយ នាងជាមនុស្សដែលមានហេតុផលច្បាស់លាស់ ហើយយល់ពីខ្លួនឯងថានាងជាអ្នកណា ត្រូវស្រឡាញ់មនុស្សប្រភេទណាតែប៉ុណ្ណោះ។
ចំពោះផ្លូវចិត្តរបស់នាង គឺមើលទៅសន្តិភាពណាស់ ទោះបីជានាងមានបញ្ហាចំពោះមុខក៏ដោយ។ មនុស្សស្រីជាច្រើនដែលនៅម្នាក់ឯង ច្រើនតែឯកា ហើយពិបាកនឹងទទួលយកស្ថានភាពឯកានេះណាស់ ពួកគេត្រូវការអ្នកមើលថែ អ្នកយកចិត្តទុកដាក់ ស្រឡាញ់ថ្នាក់ថ្នម ប៉ុន្តែចំពោះមនុស្សស្រីដែលមានបេះដូងរឹងមាំវិញ គឺនាងមិនខ្លាចភាពឯកាឡើយ នាងអាចរីករាយបានយ៉ាងប្រសើរទោះគ្មានអ្នកណាខ្វល់ពីនាងក៏ដោយ។
នាងមានសមត្ថភាពលាក់នូវអារម្មណ៍ដែលនាងកំពុងមានបានយ៉ាងល្អ ដូច្នេះនាងនៅតែរឹងមាំចំពោះមុខគេ ហើយនាងក៏មិនចូលចិត្តឲ្យអ្នកណាមើលមកនាងជាមនុស្សគួរឲ្យអាណិតនោះឡើយ។ ទោះបីជាសនាងនៅម្នាក់ឯង ក៏នាងអាចរកសុភមង្គលឲ្យខ្លួនឯងបាន ហើយទោះបីជាគ្មានស្នេហាក៏នាងនៅតែរស់បានយ៉ាងរីករាយ ហើយនាងមិនខ្លាចពាក្យថា «ឯកា»ឡើយ៕
ចុចអាន៖ខ្ញុំមិនត្រូវការបុរសឥតខ្ចោះនោះទេ គ្រាន់តែស្រឡាញ់ខ្ញុំឲ្យដូចខ្ញុំស្រឡាញ់គេទៅបានហើយ