ខ្ញុំមិនត្រូវការបុរសឥតខ្ចោះនោះទេ គ្រាន់តែស្រឡាញ់ខ្ញុំឲ្យដូចខ្ញុំស្រឡាញ់គេទៅបានហើយ

2018-11-26 07:40:33
ចំនួនមតិ 0 | ចំនួនចែករំលែក 0

បើសួរខ្ញុំថាស្រឡាញ់មនុស្សប្រុសប្រភេទណា? ខ្ញុំអាចនឹងរៀបរាប់មនុស្សប្រុសដែលមានចំណុចសុទ្ធតែល្អៗ ព្រោះខ្ញុំជឿថាគ្មានមនុស្សស្រីណាចង់បានមនុស្សប្រុសមិនស្អាត មិនល្អនោះទេ។

តែអ្វីទាំងនោះក្នុងជីវិតពិតតើអាចមានទេ? មនុស្សប្រុសដែលល្អឥតខ្ជោះ អាចមាននៅលើលោកនេះទេ? ហើយបើមានតើគេអាចមកស្រឡាញ់ខ្ញុំដែរមែនទេ? នេះពិតជាយល់សប្ដិទាំងថ្ងៃហើយ។

ការពិតចំពោះខ្ញុំមិនប្រាថ្នាបុរសឥតខ្ចោះអីនោះទេ ខ្ញុំសុំត្រឹមតែមនុស្សប្រុសដែលអាចស្រឡាញ់ខ្ញុំដូចដែលខ្ញុំស្រឡាញ់គេទៅបានហើយ។ ខ្ញុំជឿថានៅពេលមនុស្សពីរនាក់ស្រឡាញ់គ្នាស្មើដៃស្មើជើងគ្នានោះ ស្នេហានោះនឹងទៅមុខយ៉ាងរលូនដោយមិនបាច់ឲ្យម្ខាងណាប្រឹងស្រឡាញ់ម្ខាងណានោះឡើយ។

បើខ្ញុំខ្វល់ពីគេ សុំឲ្យគេខ្វល់ពីខ្ញុំដូចគ្នា។ បើខ្ញុំឆ្លៀតពេលសម្រាប់គេ សុំឲ្យគេឆ្លៀតពេលសម្រាប់ខ្ញុំដូចគ្នា។ បើខ្ញុំព្យាយាមរត់មករកគេ សុំឲ្យគេរត់មករកខ្ញុំដូចគ្នា ដូច្នេះពួកយើងនឹងនៅចំណុចកណ្ដាលជាមួយគ្នា ហើយអាចបន្តក្ដីស្រឡាញ់ជាមួយគ្នាហើយមិនមានអារម្មណ៍ថាហត់។

មិនបាច់ស្រឡាញ់ខ្ញុំលើសពីខ្ញុំស្រឡាញ់គេទេ ព្រោះពេលដែលគេស្រឡាញ់ខ្ញុំលើសពីខ្ញុំស្រឡាញ់គេ នោះគេនឹងត្រូវទទួលអារម្មណ៍ឈឺចាប់។

មិនបាច់ស្អាតពេក មិនបាច់សង្ហាពេកអីទេ ព្រោះខ្ញុំក៏មិនសូវស្អាតដូចគ្នា។ មិនបាច់ត្រឹមត្រូវអីប៉ុន្មានទេ ព្រោះខ្ញុំក៏ចូលចិត្តចរិតកូនក្មេងពេលខ្លះដែរ។ មិនបាច់ល្អពេកនោះទេ ព្រោះខ្ញុំមិនចូលចិត្តភាពឥតខ្ចោះឡើយ។ អ្វីដែលសំខាន់គឺស្រឡាញ់ខ្ញុំឲ្យដូចខ្ញុំស្រឡាញ់អ្នកទៅបានហើយ។ ស្រឡាញ់គ្រួសារខ្ញុំឲ្យដូចខ្ញុំ ស្រឡាញ់គ្រួសារអ្នកទៅបានហើយ។

ខ្ញុំមិនសន្យាថាអាចធ្វើជាប្រពន្ធល្អនោះទេ តែខ្ញុំអាចសន្យាបានថាខ្ញុំនឹងស្រឡាញ់អ្នកឲ្យដូចពេលចាប់ផ្ដើម៕

ចុចអាន៖មនុស្សស្រី ៦ប្រភេទដែលមនុស្សប្រុសប្រាថ្នាចង់បានជាគូអនាគត

អត្ថបទ៖ ផេង ផលធិតា