បើគេពិតជាស្រឡាញ់អ្នក និងត្រូវការអ្នកមែន គេមិនទៅចោលអ្នកទេ

2018-12-03 08:08:31
ចំនួនមតិ 0 | ចំនួនចែករំលែក 0

មនុស្សដែលសម្រេចចចិត្តបែកគ្នាមានហេតុផលច្រើនណាស់ តែហេតុផលមួយដែលសំខាន់ជាងគេ គឺគេអស់ស្រឡាញ់អ្នក គេលែងត្រូវការអ្នក។ បើមនុស្សម្នាក់នោះពិតជាស្រឡាញ់អ្នកមែន គេនឹងមិនទៅចោលអ្នកជាដាច់ខាត។

ធ្លាប់ឮគេនិយាយអត់ថា «បើគ្មានអ្នកទី៣ ទោះឈ្លោះគ្នាយ៉ាងណាក៏មិនអាចបែកគ្នាដែរ» ឬក៏មួយទៀតគេថា «បើមនុស្សមិនអស់ចិត្តគេមិនអាចចោលយើងទេ។»

ប្រហែលវាជាការពិត ព្រោះខ្ញុំនៅតែជឿថាបើមនុស្ស២នាក់ពិតជាស្រឡាញ់គ្នា និងត្រូវការគ្នាមែន គេនឹងរកវិធីជួបគ្នាវិញ។ ការទាស់ទែង ការឈ្លោះប្រកែក ការមិនចុះសម្រុង វាគឺចៀសមិនផុតឡើយក្នុងទំនាក់ទំនងស្នេហា តែអ្វីដែលសំខាន់គឺអាចលើកលែង និងកែប្រែបាន តែបើគ្រាន់តែអ្នកមានកំហុសហើយគេក៏ចាកចេញទៅ នោះគេមិនបានស្រឡាញ់ឲ្យដល់កម្រិតមួយជាគូជីវិតនឹងគ្នាឡើយ។

ពេលខ្លះអ្នកគួរតែរៀនទទួលយកការពិត ហើយឈប់ព្យាយាមឃាត់ និងអង្វរមនុស្សដែលគេចង់ទៅទៀតទៅ ព្រោះទោះអ្នកសុំទោសមួយលានដង អង្វរគេដល់ស្លាប់ខ្លួនទៀតក៏គេមិនអាចសម្របសម្រួលគ្នាដែរ។

ត្រូវហើយប្រហែលជាខ្ញុំមិនមែនជាមនុស្សល្អសម្រាប់គេ ខ្ញុំមិនមែនជាមនុស្សដែលគេចង់បានជាគូអនាគត ដូច្នេះទោះបីជាមានកំហុសតូច ឬធំក៏គេមិនអាចអភ័យឲ្យខ្ញុំ។ ពេលខ្លះខ្ញុំក៏ធ្លាប់បន្ទោសខ្លួនឯងដែរ ថាហេតុអីខ្ញុំមិនអាចល្អគ្រប់គ្រាន់ជាងនេះ តែកន្លងផុតមួយរយៈមកខ្ញុំក៏គិតយល់ថានេះមកពីគេចង់ទៅ មិនមែនមកពីខ្ញុំល្អ ឬមិនល្អនោះទេ។ បើគេមិនចង់ចាកចេញ គេប្រហែលជាមិនទៅចោលខ្ញុំឡើយ គឺវាដូចជាខ្ញុំអីចឹង ទោះមានរឿងអីក៏ខ្ញុំមិនដែលចោលគេដែរ។

ខ្ញុំលែងចង់ប្រើការអង្វរក ប្រើទឹកភ្នែកឃាត់អ្នកណាទៀតហើយ ព្រោះខ្ញុំមានអារម្មណ៍ថានោះដោយសារតែការអាណិតអាសូរ មិនមែនជាការដែលស្រឡាញ់ឡើយ។ ខ្ញុំក៏លែងចង់ឃាត់អ្នកណាឲ្យរស់នៅជាមួយខ្ញុំទាំងគេមិនចង់ទៀតដែរ ព្រោះមិនយូរមិនឆាប់គេនៅតែចាកចេញដូចគ្នា។

ខ្ញុំស្រឡាញ់គេ ដូច្នេះខ្ញុំនៅតែចង់រស់នៅជាមួយគេ តែមកពីគេមិនស្រឡាញ់ខ្ញុំ ទើបគេចាកចេញ។ វាជាហេតុផលមួយដែលងាយស្រួលយល់បំផុត ហើយក៏មិនបាច់ទាមទារអីផ្សេងមកបន្លប់ការឈឺចាប់មកពីការបែកបាក់នេះដែរ ព្រោះការពិតពួកយើងបានបែកគ្នារួចទៅហើយ៕

ចុចអាន៖ពេលមួយដែលខ្ញុំអស់សង្ឃឹមលើស្នេហាបំផុត ខ្ញុំមានតែដើរចេញ

អត្ថបទ៖ ផេង ផលធិតា