៤តិចនិកដើម្បីទិញខោអាវអនឡាញ បានត្រូវចិត្ត និងមិនត្រូវគេបោក

2018-11-30 23:00:00
ចំនួនមតិ 0 | ចំនួនចែករំលែក 0

សម័យនេះ អ្នកណាៗក៏ប្រហែលជាធ្លាប់ទិញអីវ៉ាន់អនឡាញហើយមែនអត់ ទាំងគ្រឿងសម្អាង របស់ប្រើប្រាស់ពីបរទេស រួមទាំងសម្លៀកបំពាក់ ជាពិសេសសម្លៀកបំពាក់នេះហើយគឺជាទំនិញអនឡាញពេញនិយមជាងគេ។ ប៉ុន្តែការទិញខោអាវនេះទៀតសោត ក៏ត្រូវមានតិចនិកខ្លះដូចគ្នាដើម្បីកុំឲ្យទិញមកខុសបំណង។ ដូច្នេះយើងមកអានតិចនិកចំនួន ៤ខាងក្រោមនេះទាំងអស់គ្នា ដើម្បីត្រៀមខ្លួនបានល្អពេល Shopping លើកក្រោយ៖

១. ពិនិត្យមើលទំហំឲ្យបានល្អ

ចំណុចដំបូងនេះគឺចាត់ទុកថាសំខាន់ខ្លាំង ព្រោះការទិញទំនិញអនឡាញគឺមិនអាចឲ្យអ្នកពាក់លបានដូចនៅហាងទូទៅនោះទេ ដូច្នេះហើយយើងចាំបាច់ត្រូវពិនិត្យមើលទំហំឲ្យបានល្អ ថាទំនិញដែលយើងចាប់អារម្មណ៍ត្រូវមានទំហំប៉ុណ្ណា ប្រវែងប៉ុណ្ណា ទំហំចង្កេះ ត្រគាក ត្រូវកុំឲ្យខុសនឹងទំហំខ្លួនឯង។ អ្វីដែលមិនអាចខ្វះបាន គឺយើងក៏គួរមានម៉ែត្រមួយសម្រាប់វាស់ខ្លួនឯង ដើម្បីឲ្យបានដឹងពីទំហំច្បាស់លាស់។

២. ទិញបានលឿនតាមរយៈការកត់ត្រា

ប្រសិនបើអ្នកមានហាងណាដែលអ្នកគិតថានឹងទិញជាប្រចាំហើយ អ្នកអាចកត់ព័ត៌មានលម្អិតពាក់ព័ន្ធទំហំសម្លៀកបំពាក់ ឬស្បែកជើងដែលអ្នកពាក់ ទុកក្នុងទូរស័ព្ទ ដែលចំណុចល្អនៃការកត់ទុកនេះគឺយើងមិនចាំបាច់ចំណាយពេលវាស់ ឬប្រៀបធៀបទំហំឲ្យលំបាក ដូច្នេះនៅពេលដែលហាងបង្ហោះរូបខោអាវដែលយើងយល់ថាត្រូវចិត្ត និងមានចំនួនកំណត់ទៀត នោះយើងនឹងអាចកក់បានទាន់ពេល។

៣. អាន Comment អតិថិជនផ្សេងៗ

រាល់ហាងលក់ទំនិញអនឡាញ មិនថានៅតាមវិបសាយ អ៊ិនស្តាក្រាម ឬក៏ហ្វេសប៊ុក គឺតែងតែមានប្រអប់សម្រាប់ការបញ្ចេញមតិយោបល់ ហើយយើងក៏គួរអានមើលខ្លះពីមតិយោបល់អតិថិជនផ្សេងៗថា ទំនិញដែលពួកគេទិញហើយនោះ តើល្អឬទេ ក្រណាត់ល្អឬអត់ មានការដឹកជញ្ជូនខុស យឺតយ៉ាវឬក៏អត់ ដើម្បីឲ្យបានដឹងថាហាងនោះផ្ដល់សេវាគួរឲ្យទុកចិត្តបានទេ។

៤. អានលក្ខខណ្ឌហាងនីមួយៗឲ្យបានច្បាស់លាស់

គ្រប់ៗហាងតែងតែមានលក្ខខណ្ឌ និងគោលការណ៍ខុសៗគ្នា ហាងខ្លះមិនឲ្យប្ដូរទំនិញដាច់ខាត ហាងខ្លះក៏អនុញ្ញាត ប៉ុន្តែមិនត្រូវឲ្យលើសពី ៣ថ្ងៃ ឬហាងខ្លះតម្រូវឲ្យផ្ញើលុយទៅក្នុងរយៈពេល២ថ្ងៃ ពុំដូច្នោះទេនឹងត្រូវ Cancel Order ដែលទាំងនេះគឺជាតួនាទីរបស់យើងក្នុងការត្រួតពិនិត្យឲ្យបានល្អិតល្អន់ ដើម្បីការពារផលប្រយោជន៍ខ្លួនឯងពេលមានបញ្ហា៕