សកម្មភាពទាំង ៥ របស់បុរស ធ្វើឲ្យសង្សារស្អប់បំផុតពេលស្រលាញ់គ្នាយូរទៅ
- 2018-11-19 05:00:00
- ចំនួនមតិ 0 | ចំនួនចែករំលែក 0
សកម្មភាពទាំង ៥ របស់បុរស ធ្វើឲ្យសង្សារស្អប់បំផុតពេលស្រលាញ់គ្នាយូរទៅ
រកបានមនុស្សដែលខ្លួនស្រលាញ់ ហើយយល់គ្នាមិនមែនជារឿងងាយស្រួលឡើយ។ ប៉ុន្តែក្រោយពេលស្រលាញ់គ្នាហើយ ចង់ថែរក្សាឲ្យស្នេហាមួយបានយូរអង្វែងរឹតតែពិបាកទៅទៀត។ ពេលស្រលាញ់ដំបូង មនុស្សម្នាក់អាចមានចរិតផ្សេង ហើយយូរៗទៅ ក៏ប្ដូរទៅចរិតផ្សេងមួយទៀត។ ទោះបីជាផ្លាស់ប្ដូរទៅជាអាក្រក់ ឬល្អយ៉ាងណាក៏ដោយ ក៏ ៥ ទង្វើខាងក្រោមនេះ ធ្វើឲ្យមនុស្សតែងស្អប់ និងពិបាកទទួលយកបំផុត។
១. បាត់ខ្លួនហើយបង្ហាញខ្លួនវិញ ដូចគ្មានអ្វីកើតឡើង
នេះគឺជាចំណុចដែលមនុស្សស្រីស្អប់ខ្លាំងបំផុតចំពោះសង្សាររបស់ខ្លួន។ ស្រាប់តែបាត់ខ្លួនឡើងមួយរយៈ គ្មានឮព័ត៌មានអ្វីសោះ ទាក់ទងបែបណាក៏មិនកើត ហើយក៏លេចខ្លួនឡើងវិញ ធ្វើផ្អែមល្ហែមជាមួយយើងដូចគ្មានអ្វីកើតឡើង។ ដល់ពេលសួរទៅ ឆ្លើយតែថារវល់។ បើដឹងថាខ្លួន គ្រាន់តែប្រាប់មុនទៅបានហើយ ចាំបាច់បាត់ស្រមោលសូន្យឈឹង សួរថាអ្នកមិនខឹងនោះ?
២. ទាមទារច្រើនពេក
គេថាជម្រៅចិត្តពិតជាវាស់មិនបានពិតមែន។ មានរបស់ល្អហើយ តែងចង់បានល្អជាងនេះទៀត។ កាលទើបស្រលាញ់គ្នា តែងសរសើរយើងថាប៉ុណ្ណឹងស្អាតហើយ តែដល់ពេលយូរទៅបែរជាថា បើយើងសជាងនេះ ស្គមជាងនេះនោះនឹងស្អាតជាងមុន។ ថែមទាំងរើសម៉ូដសក់ និងខោអាវឲ្យយើងទៀត គឺត្រូវតម្រូវតាមចិត្តគេតែម្ដង។
៣. ប្រច័ណ្ឌខុសរបៀប
កើតជាមនុស្សប្រុស ត្រូវមានចរិតនឹងធឹង កុំត្រចៀកស ឬវាយតម្លៃលឿនពេក។ ពេលខ្លះអ្វីដែលខ្លួនឃើញមិនប្រាកដជាការពិតនោះទេ។ ជាពិសេសកុំប្រច័ណ្ឌនឹងសង្សាររបស់ខ្លួនខុសរបៀប។ ទោះបីជាអ្នកទាំង២កំពុងស្ថិតក្នុងមនោសញ្ចេតនាមួយពិតមែន តែអ្នកទាំង២សុទ្ធតែមានជីវិតឯកជនរៀងខ្លួន។ អ្នកមិនអាចហាមឃាត់នាងមិនឲ្យប្រាស្រ័យទាក់ទងនឹងមនុស្សជុំវិញខ្លួននាងបានឡើយ។
៤. ស្បថស្បែច្រើនពេក
គេថាមនុស្សយកសម្ដី ដំរីយកភ្លុក។ គ្រប់ម៉ាត់ដែលយើងនិយាយចេញមកនឹងត្រូវបានគេចងចាំទុកទាំងអស់។ ដូចនេះហើយ អ្វីដែលខ្លួនអាចធ្វើបានចាំនិយាយចេញមក កុំឲ្យខកនៅថ្ងៃក្រោយ។ ស្រលាញ់គ្នាក៏ដូចគ្នា ចាំច្បាស់ថាអាចធ្វើរឿងនេះបាន ចាំសន្យាជាមួយនាង កុំធ្វើឲ្យនាងខកបំណង។
៥. ផ្លាស់ប្ដូរ១៨០ដឺក្រេ
កាលមិនទាន់ជាសង្សារនឹងគ្នា គេជាមនុស្សម្នាក់ ដល់ពេលក្លាយជាសង្សារពេញសិទ្ធិ គេប្រែទៅជាបុគ្គលម្នាក់ទៀត។ នេះគឺជាបញ្ហាដែលគេឧស្សាហ៍ប្រទះនាពេលបច្ចុប្បន្ន។ ដើម្បីជៀសវាងជួបករណីដូចនេះ អ្នកគួរចំណាយពេលស្វែងយល់ចិត្តគ្នាឲ្យបានយូរសិនមុនពេលឈានដល់ក្លាយជាសង្សារជាផ្លូវការ៕
ចុចអាន៖អតីតកាលជាអតីតកាល បើសង្សារសុំត្រឡប់មកត្រូវគ្នាវិញកុំព្រមឲ្យសោះ