ជាម្ដាយកូន២ហើយ Jun Ji Hyun មានតិចនិកសំខាន់ថែរាងឲ្យនៅតែខ្ញង់

2018-10-27 03:20:00
ចំនួនមតិ 0 | ចំនួនចែករំលែក 0

តិចនិកថែរក្សារាងទាំងនេះ មិនត្រឹមតែជួយឲ្យកំពូលតារាសម្ដែងស្រីកូរ៉េ Jun Ji Hyun ថែរក្សាបានស្អាតដូចនៅក្រមុំនោះទេ ថែមទាំងធ្វើឲ្យនាងមើលក្មេងជាងវ័យទៀតផង។ កាលពីថ្ងៃទី១៧ ខែតុលាកន្លងទៅនេះ បណ្ដាញព័ត៌មាន Dispatch បានចុះផ្សាយកម្រងរូបថតរបស់ក្រុមគ្រួសារតារាសម្ដែងស្រីល្បីឈ្មោះ Jun Ji Hyun ពេលនាងមានវត្តមាននៅផ្សារទំនើបមួយនៅរដ្ឋ Los Angeles សហរដ្ឋអាមេរិកជាមួយក្រុមគ្រួសារដើម្បីលំហែកាយ។

តាមនោះដែរ នេះអាចជាដំណើរកម្សាន្តសម្រាប់ថ្ងៃខួបរបស់ស្រីស្អាតវ័យ៣៦ឆ្នាំនៅថ្ងៃទី៣០ ខែតុលាខាងមុខ។ ទោះបីជាបានក្លាយជាម្ដាយកូន២ហើយក្ដី តែតួរឿង “Legend of the Blue Sea” នៅតែមានរាងដែលក្រមុំខ្លះសុំខ្មាស។ នៅក្នុងជំនួបជាមួយទស្សនាវដ្ដីកាលពីពេលថ្មីៗនេះ សិល្បការិនីកើតឆ្នាំ១៩៨១ បានចែករំលែកពីគន្លឹះសម្រករាងរបស់ខ្លួនដូចខាងក្រោម៖

១. តមអាហារ

ស្រីស្អាតរូបនេះ បានឲ្យដឹងថាខ្លួនសម្រកក្រោយសម្រាលកូនដោយបរិភោគបន្លែច្រើន និងជាពិសេសគឺសាច់ទ្រូងមាន់ ព្រោះទោះញ៉ាំសាច់នេះច្រើនក៏មិនខ្លាចធាត់ ព្រោះវាមានកាឡូរីតិចបំផុត។ ទោះបីជាអាហារប្រភេទនេះទ្រលាន់បន្តិចមែន តែឃើញលទ្ធផលលឿន។

២. ឧស្សាហ៍ងើបហាត់ប្រាណពេលព្រឹក

ទោះបីជាពេលខ្លះទៅដល់ផ្ទះយប់ជ្រៅហើយក្ដីដោយសារតែការងាររបស់ខ្លួន តែអ្នកម្ដាយកូន២បានឲ្យដឹងថា លើកលែងតែថ្ងៃណានាងរវល់ខ្លាំងដកឃ្លាមិនរួចទើបនាងខានហាត់ប្រាណ បើសិនជាមានពេលគឺនាងតែងងើបម៉ោង៦ហាត់ប្រាណយ៉ាងតិច៣០នាទីជារៀងរាល់ថ្ងៃ។

៣. ប្រើដៃឆ្វេងដើម្បីបរិភោគ

ទោះបីជាស្ដាប់ទៅរាងប្លែកបន្តិច តែ Jun Ji Hyun បានឲ្យដឹងថាតិចនិកនេះបានជួយនាងស្រកគីឡូបានយ៉ាងច្រើន ព្រោះពេលប្រើដៃស្ដាំញ៉ាំអីទៅ យើងមានភាពងាយស្រួលក្នុងការញ៉ាំ ធ្វើឲ្យញ៉ាំបានច្រើន។ តែពេលដៃឆ្វេង វានឹងមិនទម្លាប់ ធ្វើឲ្យពិបាកញ៉ាំ នាំឲ្យញ៉ាំតិចជាងមុន។

៤. ផឹកទឹកផ្លែឈើ

តារាសម្ដែងស្រស់ស្អាតរូបនេះ ទម្លាយថាខ្លួនតែងផឹកទឹកច្រើន ជាពិសេសគឺទឹកផ្លែស្រស់ៗដែលធ្វើពេលព្រឹកជានិច្ច។ ការផឹកទឹកធ្វើឲ្យពោះនាងពេញ និងមិនបណ្ដាលឲ្យនាងឃ្លានចំណីបានយ៉ាងល្អ។

៥. ព្យាយាមគេងឲ្យបានលក់ស្កប់ស្កល់

ស្រីស្អាតខ្ពស់ស្រឡះរូបនេះបន្តថា ការចូលគេងលឿន ក៏ដូចជាគេងឲ្យបានស្កប់ស្កល់ មិនត្រឹមតែជួយឲ្យនាងមិនញ៉ាំអីយប់ឡើងនោះទេ ថែមទាំងជួយឲ្យនាងមើលទៅក្មេងជាងវ័យ ហើយស្រស់បស់ពេលព្រឹកទៀតផង៕