៦សញ្ញាដំបូងបញ្ជាក់ថា អ្នកក្លាយជាម្ដាយគេហើយ

2018-10-16 08:50:12
ចំនួនមតិ 0 | ចំនួនចែករំលែក 0

ក្នុងមួយជីវិតមនុស្សស្រី អ្វីដែលប៉ងធំបំផុតនោះគឺបានចិញ្ចឹមបីបាច់កូនប្រុសស្រីរបស់ខ្លួនផ្ទាល់។ ជាក់ស្ដែង វេជ្ជបណ្ឌិត Karen Nordahl ឯកទេសផ្នែកសម្ភពនៅប្រទេសកាណាដា បានបញ្ជាក់ថា ពេលរាងកាយរបស់មនុស្សស្រីប្រែប្រួល នោះសញ្ញាទាំង៦នេះអាចបង្ហាញបានថា នឹងមានការចាប់កំណើតគភ៌នៅក្នុងផ្ទៃអ្នកជាមិនខាន៖

១. ការភើ ឬចង្អោរ

អាការៈនៃការចាប់ផ្ដើមមានផ្ទៃពោះដំបូងអាចមានដូចជា ការភើ ចង្អោរ ចង់ក្អួតជាញឹកញាប់ ទម្ងន់ចាប់ផ្ដើមស្រក និងខ្វះជាតិទឹកខុសធម្មតា។ អាការៈទាំងនេះអាចធ្ងន់ធ្ងររហូតដល់ថ្នាក់ក្អួតជាច្រើនដងក្នុងមួយថ្ងៃ រហូតដល់ចង់សន្លប់ផងដែរ។ ជាទូទៅសញ្ញាទាំងនេះនឹងបាត់ទៅវិញ បន្ទាប់ពីពពោះបាន២០សប្ដាហ៍ ប៉ុន្តែវាក៏អាចបន្តបានរហូតដល់ពេញរយៈពេលនៃការពពោះតែម្ដងក៏មាន។

២. ឈឺដើមទ្រូង

ដើមទ្រូងឡើងតឹងដែលធ្វើឲ្យមានការលំបាកក្នុងការពាក់អាវទ្រនាប់ ឬពិបាកក្នុងការគេង ក៏ជាសញ្ញានៃការមានផ្ទៃ ពោះផងដែរ។ មូលហេតុដែលនាំឲ្យដើមទ្រូងឡើងតឹង គឺដោយសារបម្រែបម្រួលអ័រម៉ូននៅក្នុងខ្លួនរបស់ម្ដាយដែលត្រៀមសម្រាប់ការបំបៅដោះកូនក្នុងពេលឆាប់ៗ។

៣. ក្ដៅក្នុង

ក្រៅពីចង់ក្អួតហើយ អ្នកម្ដាយនឹងមានអាការៈក្ដៅក្នុងខ្លាំង ដែលធ្វើឲ្យមានអារម្មណ៍ថា បំពង់កកំពុងរងការរលាក ជាពិសេសនៅពេលឱនឬគេង។ បើអ្នកម្ដាយមានអាការៈបែបនេះ អ្នកគួរតែចៀសវាងការញ៉ាំអាហារបំពង និងអាហារដែលមានជាតិខ្លាញ់ច្រើនឬហឹរ រួមបញ្ចូលទាំងផ្លែឈើដែលមានជាតិជូរផងដែរ។

៤. ហើមពោះ

ការហើមពោះដែលបណ្ដាលមកពីវដ្ដរដូវរបស់មនុស្សស្រីមានការប្រែប្រួលក៏អាចជាសញ្ញាដំបូងនៃការមានផ្ទៃពោះផងដែរ។

៥. ឈឺផ្នែកខាងក្រោម

ពេលដែលអំប្រ៊ីយ៉ុងបានចូលទៅកាន់ស្បូន អ្នកម្ដាយអាចមានអារម្មណ៍ឈឺចាប់ខ្លាំង ជាពិសេសនៅខាងក្រោមពោះរបស់ខ្លួន។ លើសពីនេះ ការផ្លាស់ប្ដូរអ័រម៉ូនក៏អាចបង្កឲ្យស្រ្ដីមានអាការៈឈឺត្រគាក ហើយទាំងនោះក៏ជាសញ្ញាដំបូងនៃការមានផ្ទៃពោះផងដែរ។

៦. ការបាត់រដូវ

សម្រាប់អ្នកដែលមានរដូវទៀងទាត់ ការបាត់រដូវនេះជាសញ្ញាច្បាស់លាស់បំផុតដែលបញ្ជាក់ថា អ្នកមានផ្ទៃពោះហើយ។ ពេលដែលបាត់រដូវភ្លាមៗ អ្នកអាចទិញឧបករណ៍សម្រាប់ពិនិត្យរកផ្ទៃពោះ ឬទៅពិគ្រោះជាមួយពេទ្យជំនាញដើម្បីទទួលបានលទ្ធផលដែលច្បាស់លាស់បំផុត។