ងូតទឹកក្នុងពេលទាំង៦នេះ ប្រយ័ត្នទៅជាឈឺ ឬឈានដល់ស្លាប់

2018-10-06 04:30:00
ចំនួនមតិ 0 | ចំនួនចែករំលែក 0

ការងូតទឹកអាចជួយជម្រះក្អែលចេញពីរាងកាយបាន ប៉ុន្តែមិនមែនពេលណាក៏អាចងូតទឹកបាននោះទេ។ គួរយល់ដឹងពីពេលវេលាមួយចំនួនខាងក្រោមនេះ ដែលជាពេលមិនល្អសម្រាប់ការងូតទឹកទាល់តែសោះ មិនអ៊ីចឹង វានឹងធ្វើឱ្យអ្នកទៅជាឈឺ ឬមានបញ្ហាភ្លាមៗ។

១- ងូតទឹកយប់ជ្រៅពេក៖

អ្នកជំនាញបានណែនាំថា ហាមងូតទឹកក្រោយម៉ោង១១យប់ ព្រោះរយៈពេលនេះ សីតុណ្ហភាពអាកាសធាតុនឹងចុះទាបបំផុត ហើយរាងកាយរបស់អ្នកក៏ត្រូវចុះខ្សោយ និងអស់កម្លាំង ត្រូវការការសម្រាកដែរ។ ការងូតទឹកនៅពេលនេះ នឹងធ្វើឱ្យសីតុណ្ហភាពក្នុងខ្លួនប្រែប្រួលភ្លាមៗ និងឈានទៅរកការបង្រួញសរសៃឈាម ដែលអាចប៉ះពាល់ដល់លំហូរឈាមទៅកាន់ខួរក្បាល អាចប៉ះពាល់សួត ឬបណ្ដាលឱ្យដាច់សរសៃឈាម។

២- ងូតទឹកភ្លាម ក្រោយញ៉ាំបាយរួច៖

ងូតទឹកក្រោយពេលបាយភ្លាមៗនឹងធ្វើឱ្យក្រពះទៅជាចុះខ្សោយ ហើយប្រព័ន្ធរំលាយអាហារក៏មិនអាចធ្វើការបានល្អដែរ ដែលជាហេតុបណ្ដាលឱ្យមានអាការៈឈឺក្រពះ។ ក្រៅពីនេះ វាក៏បណ្ដាលឱ្យមានបញ្ហាសរសៃឈាម រាំងស្ទះដល់ចរាចរណ៍ឈាម រាងកាយក៏ចុះទន់ខ្សោយផងដែរ។

៣- ងូតទឹកភ្លាម ក្រោយផឹកស្រា ឬគ្រឿងស្រវឹង៖

ជាតិអាល់កុលនឹងរារាំងដល់ចលនាថ្លើម និងធ្វើឱ្យគ្លុយកូសនៅក្នុងឈាមដំណើរការមិនល្អ ដែលនឹងបណ្ដាលទៅជាឈឺក្បាល វិលមុខ អស់កម្លាំងល្ហិតល្ហៃជាដើម។ បើកាន់តែធ្ងន់ធ្ងរ វាអាចឈានទៅដល់ការបាត់បង់ស្មារតី ឬសន្លប់ដោយសារខ្វះជាតិស្ករ។

៤- ងូតទឹកពេលរាងកាយកំពុងអស់កម្លាំង៖

កុំគិតថា ការងូតទឹកពេលកំពុងអស់កម្លាំងនឹងជួយឱ្យរាងកាយបានសម្រាក និងមានកម្លាំងឡើងវិញ ព្រោះការពិត វាជារឿងគ្រោះថ្នាក់ទៅវិញទេ។ សាច់ដុំដែលអស់កម្លាំងអាចធ្វើឱ្យលំហូរនៃឈាមមានការថយចុះ ដូច្នេះបើអ្នកងូតទឹកក្នុងរយៈពេលនេះ វានឹងនាំឱ្យកើតជំងឺផ្ដាសាយ ក្ដៅខ្លួន ឬអស់កម្លាំងដល់ស្លាប់ក៏ថាបាន។

៥-ងូតទឹកពេលកំពុងក្ដៅខ្លួន៖

បើរាងកាយអ្នកឡើងកម្ដៅដល់៣៨អង្សា ឬច្រើនជាងនេះ ហាមងូតទឹកដាច់ខាត ព្រោះវានឹងបង្កទៅជាជំងឺកាន់តែធ្ងន់ធ្ងរ ហើយនាំឱ្យដាច់សរសៃឈាម ឬប៉ះពាល់ដល់ជីវិតទៀតផង។

៦- ហាត់ប្រាណ ឬលេងកីឡារួចភ្លាម ចូលងូតទឹកភ្លាម៖

កាលណាខ្លួនអ្នកកំពុងបែកញើស រន្ធញើសក៏បើកធំដែរ។ វេជ្ជបណ្ឌិតជាច្រើនបានណែនាំថា ការងូតទឹកភ្លាមបន្ទាប់ពីប្រើកម្លាំងលេងកីឡា ឬហាត់ប្រាណរួច អាចនាំឱ្យមានបញ្ហាគាំងបេះដូង ការនាំឈាមទៅកាន់ផ្នែកផ្សេងៗនៃរាងកាយមិនបានគ្រប់គ្រាន់ និងបង្កជាជំងឺផ្សេងៗបានយ៉ាងឆាប់រហ័ស។ យកល្អ ត្រូវអង្គុយ ឬសម្រាកឱ្យស្ងួតញើសសិន សឹមងូតទឹកតាមក្រោយ។

បើពេលវេលាខាងលើសុទ្ធតែមិនអាចងូតបាន ចុះពេលណាទើបងូតទឹកបានទៅ? ចម្លើយគឺ គួរងូតទឹកនៅពេលព្រឹក និងពេលល្ងាច ប៉ុន្តែមិនត្រូវងូតយូរៗពេកទេ ព្រោះវានឹងធ្វើឱ្យស្បែកបាត់បង់ជាតិសំណើម និងអាចបាត់បង់បាក់តេរីមានប្រយោជន៍មួយចំនួនដែលជួយការពារស្បែក៕

ចុចអាន៖ ទម្លាប់៦យ៉ាងពេលងូតទឹក ស្រីៗគួរបញ្ឈប់ បើមិនចង់ប៉ះពាល់សុខភាព