មនុស្សប្រុសខ្លះមិនសូវចេះនិយាយពាក្យថា "ស្រឡាញ់" តែចូលចិត្តបង្ហាញតាមកាយវិការ

2018-09-19 10:19:51
ចំនួនមតិ 0 | ចំនួនចែករំលែក 0

មនុស្សស្រីមួយចំនួន បើមិនបានឮពាក្យថា "ស្រលាញ់" ចេញពីមាត់ដៃគូរបស់ខ្លួនទេ តែងមានគំនិត វិជ្ជមានឬអន់ចិត្តខ្លះៗ ដោយគ្មានការគិតគូឲ្យបានស៊ីជម្រៅបន្តិច។ អ្នកត្រូវយល់ថា ទោះមនុស្សប្រុសមិនសូវចេះនិយាយពាក្យ បងស្រលាញ់អូន ក៏ដោយ មិនមែនមានន័យថា គាត់គ្មានចិត្តលើអ្នកដូចមុនទេ គ្រាន់តែគាត់ចូលចិត្តបង្ហាញតាមរយៈកាយវិការច្រើនជាងពាក្យសម្តី។

គាត់តែងតែផ្ញើសារផ្អែមល្ហែមមកកាន់អ្នកជាប្រចាំ រំលឹកថាគាត់ពិតជានឹកអ្នក។ នេះបញ្ជាក់ថា គាត់មិនដែលភ្លេចគិតដល់អ្នកទេ ទោះជារវល់យ៉ាងណាក៏ដោយ។
គាត់ជួយអ្នកគ្រប់រឿងទាំងអស់ឲ្យតែពេលដែលត្រូវការ ហើយតែងបារម្ភពីអ្នកគ្រប់ពេលវេលា។
គាត់ស្រលាញ់អ្នកពិត គិតថាអ្នកសំខាន់ ទើបចង់ចំណាយពេលច្រើននៅជាមួយអ្នក។

គាត់ផ្តល់តម្លៃ ចាត់ទុកអ្នកជាមនុស្សសំខាន់ជាងមិត្តភ័ក្តិ ការងារ សូម្បីតែរូបគាត់ផ្ទាល់ សំខាន់គ្មាននរណាអាចមកជំនួសបាន។
គាត់បង្កើតស្នាមញញឹម ភាពសប្បាយរីករាយដល់អ្នក មិនចាំបាច់តែថ្ងៃខួបកំណើតឬថ្ងៃពិសេសណាមួយនោះទេ។
គាត់មិនស្ទាក់ស្ទើរក្នុងការផ្លាស់ប្តូរទម្លាប់អាក្រក់ចេញ ព្រោះមិនចង់ឲ្យអ្នកនៅសាំចិត្តរអ៊ូរទាំដដែលៗ។
គាត់មិនសូវចេះនិយាយច្រើនមែន ប៉ុន្តែតែងថើបអ្នកដោយមិនជិនណាយ។
គាត់ចូលចិត្តកាន់ដៃអ្នកពេលដើរចេញទៅខាងក្រៅម្តងៗ ហើយមិនខ្លាចក្នុងការបង្ហាញភាពផ្អែមល្ហែមនៅទីសាធារណៈ។
គាត់ចូលចិត្តញ៉ោះលេងឲ្យអ្នកខឹង ព្រោះគាត់គិតថាមុខអ្នកគួរឲ្យស្រលាញ់ នៅពេលដែលខឹង។
គាត់ចងចាំសម្តីគ្រប់ម៉ាត់ដែលអ្នកនិយាយ យកទុកក្នុងចិត្តមិនងាយភ្លេចឡើយ។

គាត់តែងតែចង់ដឹងថា ក្នុងចិត្តអ្នកកំពុងគិតរឿងអ្វី។ គំនិតរបស់អ្នកពិតជាសំខាន់ណាស់សម្រាប់គាត់។ មុនពេលធ្វើអ្វីមួយ គាត់នឹកគិតដល់ចិត្តអ្នកមុនគេ។
គាត់តែងតែគោរព ស្តាប់ហេតុផលគំនិតយោបល់របស់អ្នកជានិច្ច។
គាត់មិនដែលនិយាយអ្វីដែលអាចធ្វើឲ្យឈឺចាប់ ហើយតែងពេញចិត្តកោតសរសើរនូវរាល់ទង្វើរបស់អ្នក។
គាត់ចាត់ទុកមនុស្សសំខាន់របស់អ្នក ដូចជាគ្រួសារនិងមិត្តភ័ក្តិ ក៏ជាមនុស្សសំខាន់របស់គាត់ដូចគ្នា។
គាត់រក្សាពាក្យសន្យា បើសន្យាគឺមិនដែលភ្លេច ហើយអាចធ្វើវាឲ្យបាន មិនថារឿងតូចឬធំឡើយ។
គាត់ព្រមអភ័យទោស ពេលអ្នកមានកំហុស ព្រោះគាត់ដឹងថាគ្មាននរណាដែលមិនធ្លាប់ខុសទេ។
គាត់មិនលេងទូរសព្ទពេលនៅក្បែរអ្នក ព្រោះគាត់បានឲ្យតម្លៃមនុស្សដែលខ្លួនស្រលាញ់ច្រើនជាងទូរសព្ទ។
គាត់ក៏ធ្លាប់ឈ្លោះគ្នាជាមួយអ្នកដែរ ប៉ុន្តែគាត់សុខចិត្តចុះចាញ់ ដើម្បីកុំឲ្យរឿងរ៉ាងកាន់តែធំ និងចង់រក្សាស្នេហាឲ្យរឹងមាំជានិរន្ត។