១១សញ្ញាបង្ហាញថាគេមិនបានស្រឡាញ់យើងស្មោះ
- 2018-09-09 22:59:00
- ចំនួនមតិ 0 | ចំនួនចែករំលែក 0
១១សញ្ញាបង្ហាញថាគេមិនបានស្រឡាញ់យើងស្មោះ
មនុស្សគ្រប់គ្នាតែងចង់បានភាពជឿជាក់ពីមនុស្សដែលខ្លួនស្រឡាញ់ ចង់បានភាពប្រាកដប្រជាដែលអាចរួមដំណើរជាមួយគ្នាទៅអនាគតបាន។ ក៏ប៉ុន្តែបើមានសញ្ញា ១៣យ៉ាងនេះហើយ គឺមានន័យថាសង្សាររបស់អ្នកមិនបានស្រឡាញ់អ្នកពិតប្រាកដនោះទេ៖
១១. មិននាំយើងឲ្យគ្រួសារបានស្គាល់
មនុស្សស្រឡាញ់គ្នាក៏គួរផ្ដល់កិត្តិយសឲ្យគ្នាទៅវិញទៅមក។ បើស្រឡាញ់គ្នាយូរហើយគេមិនហ៊ានណែនាំយើងឲ្យអ្នកផ្ទះ ឬសូម្បីមិត្តភ័ក្ដិគេស្គាល់ផង ដូច្នេះអាចមានន័យថាគេមិនបានស្រឡាញ់យើងពិតប្រាកដនោះទេ។
១០. មិនដែលចាប់អារម្មណ៍យើងសោះ
ស្រឡាញ់គ្នាកាន់តែយូរគេកាន់តែសោះអង្គើយ មានន័យថាទំនាក់ទំនងនេះមានបញ្ហាហើយ។ បើបន្តបែបនេះ អ្នកនឹងមានអារម្មណ៍ចង់ដើរចេញដោយឯកឯងតែម្ដង។
៩. ចូលចិត្តប្រើកម្លាំង
នៅពេលឈ្លោះជាមួយយើង គេចូលចិត្តស្រែក ឬប្រើកម្លាំងបាយជាមួយយើង ឬរបស់នៅជុំវិញខ្លួន។ មនុស្សបែបនេះបើអ្នកបន្តកាន់តែយូរ គឺមានតែរងអំពើហិង្សាពីគេកាន់តែ ច្រើនតែប៉ុណ្ណោះ។
៨. តែងតែប្រៀបធៀបយើងជាមួយអ្នកដទៃ
បើគេស្រឡាញ់យើងពិត គេគួរតែស្រឡាញ់យើងជាយើង បើគេចូលចិត្តតែប្រៀបធៀបយើងជាមួយអ្នកដទៃ ហើយវាធ្វើឲ្យប៉ះពាល់អារម្មណ៍អ្នក អ្នកគួរប្រាប់គេតាមត្រង់។ បើគេនៅតែមិនឈប់ អាចប្រាប់ឲ្យគេទៅស្រឡាញ់អ្នកដទៃតែម្ដងទៅ មិនចាំបាច់មករវល់ជាមួយយើងនោះទេ។
៧. មិនទុកមុខឲ្យយើង
បើគេចូលចិត្តនិយាយអ្វីឲ្យយើងខ្មាសគេជាសាធារណៈ ចូលចិត្តនិយាយពីចំណុចខ្សោយរបស់យើងឲ្យអ្នកដទៃស្ដាប់ ជាពិសេសរឿងសម្ងាត់ៗផ្ទាល់ខ្លួនដែលគួរដឹងតែពីរនាក់ក៏យកទៅនិយាយដែរនោះ មានន័យថាអ្នកគួរដកខ្លួនឲ្យហើយទៅ។
៦. ជាមនុស្សពូកែកុហក
ទំនាក់ទំនងស្នេហាមួយត្រូវចាប់ផ្ដើមពីភាពជឿជាក់គ្នាបាន បើថ្ងៃណាមួយគេចាប់ផ្ដើមកុហក ដំបូងៗយើងអាចអភ័យទោសបាន តែបើកុហកជាទម្លាប់ហើយ ក៏មានន័យថាគេគ្មានចិត្តស្មោះជាមួយយើងដែរ។
៥. ក្បត់ចិត្តយើង
ចំណុចនេះច្បាស់ណាស់ បើគេស្រឡាញ់យើងស្មោះ គេគ្មានថ្ងៃទៅមានអ្នកទីពីរ អ្នកទីបី ឲ្យយើងឈឺចិត្តនោះទេ។ មនុស្សប្រុសមិនចេះស្កប់ស្កល់ គ្មានអ្វីគួរឲ្យស្ដាយស្រណោះនោះឡើយ។
៤. មិនគាំទ្រក្ដីស្រមៃរបស់យើង
ជាសង្សារនឹងគ្នាយើងក៏គួរផ្ដល់ការគាំទ្រឲ្យគ្នាទៅវិញទៅមក ជាពិសេសសម្រាប់ក្ដីស្រមៃរបស់យើង យើងក៏ចង់បានកម្លាំងចិត្តមួយចំណែកពីគាត់ដែរ តែបើគាត់មិនដឹងសូម្បីតែគោលដៅរបស់យើងគឺអ្វីនោះ មានន័យថាគាត់មិនដែលខ្វល់ពីយើងឡើយ។
៣. គ្មានពេលវេលាឲ្យយើង
មានសង្សារដែលទុកឲ្យយើងឯកោ ទុកឲ្យយើងនៅម្នាក់ឯងរហូតដូច្នេះ ក៏មិនខុសពីគ្មានសង្សារដែរ។ ពេលវេលាសម្រាប់មិត្តភ័ក្ដិមាន ពេលវេលាលេងហ្គេមមាន មើលកុនមាន តែគ្មានពេលនៅជាមួយយើង បែបនេះក៏មិនកើតដែរ។ ក្ដីស្រឡាញ់ក៏ដូចជាការដាំដើមឈើដែរ គឺទាមទារឲ្យមានការយកចិត្តទុកដាក់ ស្រោចទឹក ថែទាំ ជាប្រចាំ តែបើដើមឈើខ្វះទឹកហើយ មិនយូរមិនឆាប់ វានឹងត្រូវងាប់។
២. ពេលយើងមានបញ្ហា គេមិនដែលនៅ
ពេលដែលយើងមានបញ្ហា គេបែរជាបាត់មុខឈឹង បណ្ដោយឲ្យយើងឆ្លងកាត់រឿងទាំងអស់តែម្នាក់ឯង។ យ៉ាងហោចណាស់ក៏គួរផ្ដល់កម្លាំងចិត្ត រង់ចាំស្ដាប់ថាយើងបានជួបបញ្ហាអ្វីខ្លះ ចាប់អារម្មណ៍ពីបញ្ហាយើងខ្លះក៏បាន តែបើគ្មានទាំងចំណុចនេះទៀត អ្នកគួរពិចារណាឡើងវិញហើយ។
១. មិនដែលនិយាយរឿងអនាគត
ស្រឡាញ់គ្នាមួយយូរឆ្នាំទៅហើយ តែមិនដែលនិយាយរឿងអនាគតជាមួយគ្នាសោះ នោះក៏មានន័យថាគេស្រឡាញ់យើងដើម្បីបំបាត់អផ្សុក តែមិនបានគិតប្រាកដប្រជាជាមួយយើងឡើយ។
ទំនាក់ទំនងស្នេហា ទោះក្នុងរូបភាពបែបណាក៏ដោយ ក៏គួរទទួលបានការយកចិត្តទុកដាក់ មើលថែពីភាគីទាំងសងខាង។ បើពេលនេះប្រិយមិត្តនារីៗរូបណាកំពុងមានបញ្ហាស្នេហា សូមគិតរំឭកខ្លួនឯងឡើងវិញពីពេលវេលាដែលមានក្ដីសុខ ហើយសាកល្បងបើកចិត្តនិយាយបញ្ហានោះជាមួយគាត់។ ក្រៅពីជាការផ្ដល់ឱកាសឲ្យគាត់ហើយ វាក៏ជាការផ្ដល់ឱកាសឲ្យខ្លួនឯងដែរ ប៉ុន្តែបើនិយាយគ្នាហើយគ្មានអ្វីប្រសើរឡើងទេ វាក៏គួរដល់ពេលដែលអ្នកត្រូវពិចារណាឡើងវិញ ៕