៥គន្លឹះជួយឲ្យអ្នកលួចស្រលាញ់គេតែម្នាក់ឯងមានក្ដីសុខ ទោះអត់សង្ឃឹម ឬមានសង្ឃឹមក៏ដោយ
- 2018-09-07 08:08:19
- ចំនួនមតិ 0 | ចំនួនចែករំលែក 0
៥គន្លឹះជួយឲ្យអ្នកលួចស្រលាញ់គេតែម្នាក់ឯងមានក្ដីសុខ ទោះអត់សង្ឃឹម ឬមានសង្ឃឹមក៏ដោយ
ជឿថាមានប្រិយមិត្តនារីជាច្រើនបាននិងកំពុងលង់ស្រលាញ់នរណាម្នាក់តែម្នាក់ឯង។ វាមិនមែនជារឿងស្រួលទេដែលយើងស្រលាញ់គេហើយមិនអាចនិយាយបាន ថែមទាំងត្រូវធ្វើដូចជាគ្មានរឿងអ្វីដើម្បីកុំឲ្យគេដឹងខ្លួននោះ។ ដូច្នេះហើយបានជាពេលខ្លះ ការស្រលាញ់បែបនេះធ្វើឲ្យយើងកើតទុក្ខតែម្នាក់ឯង។ ប៉ុន្តែដឹងអត់ថា ទោះស្រលាញ់គេម្នាក់ឯងក៏យើងអាចមានក្ដីសុខបានដែរ? ចង់ដឹងថាអាចតាមវិធីណានោះ សូមតាមដានជាមួយកញ្ញាខាងក្រោមនេះ៖
**១. ក្ដីសុខរបស់គេក៏ជាក្ដីសុខរបស់យើង**
ជាដំបូងយើងត្រូវទទួលស្គាល់សិនថា យើងមានឋានៈត្រឹមជាមនុស្សលួចស្រលាញ់គេ ដូច្នេះហើយយើងមិនត្រូវចូលទៅរញ៉េរញ៉ៃ ឬធ្វើឲ្យគេធុញនោះទេ បើមិនចង់បាត់បង់គេ។ យើងត្រូវគិតជានិច្ចថា ក្ដីសុខរបស់គេក៏ជាក្ដីសុខរបស់យើង។ ប្រាកដជាគ្មានឡើយអ្នកដែលចង់ឲ្យមនុស្សដែលខ្លួនលួចស្រលាញ់គ្មានក្ដីសុខ មែនអត់? បើអ្នកមិនអាចធ្វើជាក្ដីសុខសម្រាប់គេបានទេ ហើយនៅថ្ងៃណាមួយគេបានជួបស្នេហា ឬក្ដីសុខពិតរបស់គេ យើងក៏គួរតែរីករាយជាមួយគេ ព្រោះបើយើងរិះគន់ ឬខឹងនោះមានន័យថាយើងអាត្មានិយមបន្តិចហើយ។
២. ព្រួយបារម្ភ និងផ្ដល់កម្លាំងចិត្តឲ្យគេពីចម្ងាយ
ច្បាប់សម្រាប់មនុស្សលួចស្រលាញ់គេ គឺមិនត្រូវធ្វើឲ្យគេលំបាកចិត្ត ដូច្នេះយើងត្រូវចាំបារម្ភ និងផ្ដល់កម្លាំងចិត្តឲ្យគេពីចម្ងាយបានហើយ។ បើគេមានរឿងអ្វីមិនសប្បាយចិត្ត អ្នកអាចធ្វើខ្លួនជា Hero និងនៅក្បែរគេនៅថ្ងៃដែលគេទន់ខ្សោយ ដូច្នេះគេនឹងមានអារម្មណ៍កក់ក្ដៅដែលមានអ្នកនៅក្បែរ។ បណ្ដោយឲ្យទំនាក់ទំនងរបស់អ្នកនិងគេវិវត្តទៅយឺតៗបែបនេះក៏បាន វាក៏ល្អជាងមិនធ្វើអ្វីសោះ។ គ្រាន់តែបានធ្វើជាមនុស្សដែលអាចឲ្យគេញញឹមបានឡើងវិញ វាក៏ជារឿងសប្បាយចិត្តមួយបាត់ទៅហើយ។
៣. ពេញចិត្តទំនាក់ទំនងនៅពេលនេះ
បើនៅពេលអ្នកអ្នកបានក្លាយជាមិត្តដែលលួចស្រលាញ់គេហើយ ចូរពេញចិត្តនូវអ្វីដែលខ្លួនមានក្នុងពេលនេះសិន ដែលយើងអាចនៅក្បែរគេ បានស្គាល់គេ ប៉ុណ្ណឹងក៏ល្អទៅហើយ។ អ្នកអាចប្រើឋានៈជាមិត្តដើម្បីចូលទៅជិត ឬឲ្យគេស្រណុកចិត្តជាមួយយើងសិន បន្ទាប់ពីនោះអ្វីៗនឹងកាន់តែងាយស្រួលប្រសិនបើអ្នកចង់វិវត្តទំនាក់ទំនងលើសពីនេះ។ ត្រូវចាំថា នៅពេលអ្នកជាមិត្តរបស់គេ អ្នកនឹងមានឱកាសបានមើលថែ និយាយលេងសើច និងនៅក្បែរគេ ដែលអាចចាត់ទុកថាជារឿងសប្បាយចិត្តមួយ។ មិនប្រាកដដែរ ថ្ងៃណាមួយគេអាចនឹងគិតយល់ថាអ្នកណាព្រួយបារម្ភ និងចង់នៅក្បែរគេពិតប្រាកដ រហូតមានចិត្តស្រលាញ់អ្នកវិញក៏ថាបាន។
៤. កាត់បន្ថយការរំពឹងទុកលើគេ
ប្រាកដណាស់ មនុស្សលួចស្រលាញ់គេដូចជាយើងប្រាកដជាមានការរំពឹងទុកខ្លះហើយលើទំនាក់ទំនងជាមួយគេ ប៉ុន្តែគួរកុំរំពឹងលើគេច្រើនពេក ថាគេត្រូវតែបែបនេះ បែបនោះ ព្រោះនៅពេលគេមិនបានដូចដែលអ្នករំពឹងទុក អ្នកនឹងកើតទុក្ខ។ រំពឹងទុកល្មមៗដោយមិនទៅកកាយជីវិតឯកជនរបស់គេខ្លាំងពេក បណ្ដោយៗទុកឲ្យពេលវេលាជាអ្នកជួយសម្រេចល្អជាង។ ម្យ៉ាងទៀត ត្រូវដឹងឲ្យច្បាស់ដែរថាគេមានសង្សារ ឬអ្នកដែលគេលួចស្រលាញ់ហើយឬនៅ ដូច្នេះហើយគួរធ្វើជាមិត្តសិនល្អបំផុត។
៥. បើកឱកាសឲ្យខ្លួនឯងផង
ប្រាកដណាស់ យើងមិនអាចលួចស្រលាញ់គេតែម្នាក់ឯងមួយជីវិតនោះទេ។ ស្រីៗគួរតែបើកចិត្ត និងផ្ដល់ឱកាសឲ្យខ្លួនឯងបានជួបមនុស្សថ្មីៗផង ព្រោះជីវិតមនុស្សយើងត្រូវតែបោះជំហានទៅមុខ មិនអាចចំណាយពេលរង់ចាំមនុស្សតែម្នាក់យូរពេកទេ។ ថាមិនត្រូវ អ្នកអាចបានជួបស្នេហ៍ពិតដែលអ្នកមិននឹកស្មានពីមុន។ អ្នកដែលចូលមកក្រោយ អាចនឹងជាមនុស្សពិតប្រាកដដែលអាចធ្វើឲ្យអ្នកមានក្ដីសុខក៏ថាបាន។ លួចស្រលាញ់គេបាន ប៉ុន្តែយ៉ាងណាក៏មិនត្រូវភ្លេចស្រលាញ់ខ្លួនឯងដែរ ៕
ចុចអាន៖