កង្វះកាល់ស្យូមពេលមានផ្ទៃពោះ អាចប៉ះពាល់ធ្ងន់! គួរមកដឹងរោគសញ្ញា និងដំណោះស្រាយ

2018-08-16 04:09:44
ចំនួនមតិ 0 | ចំនួនចែករំលែក 0

ជាតិកាល់ស្យូមមានសារសំខាន់សម្រាប់រាងកាយក្នុងការលូតលាស់ឆ្អឹង ធ្មេញ គ្រប់គ្រងចង្វាក់បេះដូង សម្រួលចរន្តឈាម សាច់ដុំជាដើម។ សម្រាប់ស្ត្រីមានផ្ទៃពោះ កាល់ស្យូមរឹតតែដើរតួនាទីសំខាន់ ទាំងសម្រាប់មាតា និងគភ៌ក្នុងផ្ទៃ។ ដូច្នេះបើជាតិកាល់ស្យូមមានមិនគ្រប់គ្រាន់សម្រាប់ប្រើប្រាស់ក្នុងរាងកាយ វាអាចបង្កជាផលប៉ះពាល់មួយចំនួនគួរតែយកចិត្តទុកដាក់។

រោគសញ្ញា

តាមការផ្ដល់បទសម្ភាសពី វេជ្ជបណ្ឌិត ទី សុវណ្ណរដ្ឋ ឯកទេសផ្នែក សម្ភព រោគស្ត្រី នៅមន្ទីរសំរាកព្យាបាល និងសម្ភព មាតា បានឱ្យវិបសាយ កញ្ញា ដឹងពីសញ្ញាដ៏គួរឱ្យចាប់អារម្មណ៍មួយចំនួន ជាពិសេសសម្រាប់ស្ត្រីកំពុងមានផ្ទៃពោះ ទាក់ទងនឹងបរិមាណជាតិកាល់ស្យូមមិនគ្រប់គ្រាន់។

១. កន្ត្រាក់សាច់ដុំ ប្រកាច់ ទាញមុខទាញមាត់ ត្រជាក់ដៃ

២. ក្រចកមិនរឹងមាំ ឧស្សាហ៍បាក់ឬរហែក

៣. ឧស្សាហ៍រមួលសាច់ដុំ (រមួលក្រពើ) ស្ពឹកដៃ ស្ពឹកជើង

៤. ឧស្សាហ៍ភ្លេច ឧស្សាហ៍បាត់ការចងចាំ

៥. ឧស្សាហ៍រវើរវាយ បាក់ទឹកចិត្ត

៦. ខ្សោយអស់កម្លាំង

សារសំខាន់នៃជាតិកាល់ស្យូមក្នុងពេលមានផ្ទៃពោះ

ជាតិកាល់ស្យូមដើរតួនាទីសំខាន់ណាស់ក្នុងការជួយដល់ការលូតលាស់ផ្នែកឆ្អឹងសម្រាប់ម្ដាយ ដើម្បីការពារការពុកឆ្អឹង នៅពេលអនាគត កាត់បន្ថយការលើសសម្ពាធឈាម ឬជំងឺព្រាយក្រឡាភ្លើង នៅពេលជិតសម្រាល។

ចុចអាន៖ យល់ដឹងពីជំងឺ បម្រុងក្រឡាភ្លើង ឬព្រាយក្រឡាភ្លើង ដែលម្ដាយត្រៀមសម្រាលកូនមិនគួររំលង

ដោយឡែកសម្រាប់គភ៌នៅក្នុងផ្ទៃ ការបរិភោគជាតិកាល់ស្យូមគ្រប់គ្រាន់ អាចជួយដល់ការលូតលាស់ឆ្អឹង សាច់ដុំ សរសៃបញ្ជា បេះដូង។

"ពិសេសវាជួយដល់ការលូតលាស់នៃសាច់ដុំបេះដូងកូន ព្រោះអីបេះដូង វាមានតួនាទីកន្ត្រាក់នាំឈាមទៅចិញ្ចឹមសរីរាង្គផ្សេងៗ អ៊ីចឹងបើញ៉ាំជាតិកាល់ស្យូមបានគ្រប់គ្រាន់ បេះដូងក៏លូតលាស់ល្អ អាចនាំឈាមទៅចិញ្ចឹមសរីរាង្គផ្សេងបានល្អ រាងកាយកូនក៏អាចលូតលាស់បានល្អទៅតាមហ្នឹងដែរ។" អ្នកស្រីវេជ្ជបណ្ឌិតបន្ថែម។

ក្រៅពីនេះ ជាតិកាល់ស្យូមក៏នឹងជួយផងដែរ ទាក់ទងនឹងមុខងារកំណកឈាមរបស់កូនឱ្យដំណើរការបានល្អ ព្រោះបើកំណកឈាមកូនមិនល្អ ពេលសម្រាលចេញមក អាចបណ្ដាលឱ្យមានការហូរឈាមក្នុងខួរក្បាល ហូរឈាមក្នុងប្រដាប់រំលាយអាហារជាដើម។

គួរញ៉ាំអាហារអ្វីខ្លះ បើអ្នកម្ដាយកំពុងបាត់បង់ជាតិកាល់ស្យូម ឬមានមិនគ្រប់គ្រាន់?

ឆ្លើយតបនឹងសំណួរនេះ អ្នកស្រីវេជ្ជបណ្ឌិតបានលើកឡើងថា "មុនចូលដល់នារីមានផ្ទៃពោះ ខ្ញុំចង់និយាយជាទូទៅសិន! សម្រាប់មនុស្សពេញវ័យ ពីអាយុ១៩ឆ្នាំឡើង បរិមាណកាល់ស្យូមដែលត្រូវការ គឺ១០០០ ម.ក្រ ក្នុងមួយថ្ងៃ សម្រាប់មនុស្សម្នាក់ ហើយស្ត្រីមានផ្ទៃពោះក៏ដូចគ្នាដែរ! ដូច្នេះអាហារមួយចំនួនអាចជួយឱ្យអ្នកទទួលបានជាតិកាល់ស្យូមគ្រប់គ្រាន់តែដែលរាងកាយត្រូវការ!”

យ៉ាអួ៖ ជាប្រភេទអាហារអាចជាតិកាល់ស្យូមច្រើន ដែលហោចណាស់មានជាង ៤០០ ម.ក្រ ក្នុងមួយកំប៉ុង។
ឈីស៖ ក្នុង ០,៥ oz អាចមានជាតិកាល់ស្យូមប្រហែលជាង ៣០០ ម.ក្រ
ទឹកដោះគោ៖ អាចមានពី ២៧៧ ម.ក្រ ក្នុង៨ oz

បន្លែបៃតងដូចជា ស្ពៃ ឆៃថាវ ស្លឹកខ្ទឹម សាឡាដ ផ្ទី ជាដើម ដែលមានប្រហែល ៧០ម.ក្រ ទៅ១០០ ម.ក្រ
ក្រៅពីអាហារ ស្ត្រីក៏ត្រូវបន្ថែមដោយការញ៉ាំថ្នាំដូចជា វីតាមីន គ្រាប់ថ្នាំកាល់ស្យូមជាដើម

បើញ៉ាំច្រើនលើសកម្រិត អាចបង្កទៅជាបញ្ហាដែរឬទេ?

វេជ្ជបណ្ឌិត ទី សុវណ្ណរដ្ឋ បានលើកឡើងពីផលប៉ះពាល់ ក្នុងករណីដែលញ៉ាំជាតិកាល់ស្យូមច្រើនជ្រុលដូចជា បង្កទៅជាក្រួសក្នុងតម្រងនោម ឬទល់លាមកជាដើម។ ក្រៅពីនេះ មិនគួរញ៉ាំកាល់ស្យូមក្នុងពេលជាមួយថ្នាំជាតិដែកឡើយ។

“សម្រាប់ស្ត្រីមានផ្ទៃពោះ ត្រូវការញ៉ាំជាតិដែក ដើម្បីជំនួយគ្រាប់ឈាមក្រហម ព្រោះអ្នកមានផ្ទៃពោះភាគច្រើនមានបញ្ហាស្លេកស្លាំង ដោយសារការខ្វះជាតិដែកនេះ ហើយបើកាលណាយើងញ៉ាំកាល់ស្យូមនៅក្នុងពេលយើងញ៉ាំជាតិដែកជាមួយគ្នា វាអាចទៅបង្អាក់ការស្រូបយកជាតិដែក។ អញ្ចឹងការញ៉ាំកាល់ស្យូម និងជាតិដែក គួរញ៉ាំក្នុងពេល២ផ្សេងគ្នា។" អ្នកស្រីវេជ្ជបណ្ឌិតបន្ថែមដូច្នេះ៕

អត្ថបទ៖ សរ សុគន្ធី