៦ហេតុផលចាក់ដោតដែលមនុស្សស្រីល្អៗ បានជួបតែមនុស្សប្រុសសាវា ក្បត់ចិត្ត

2018-08-09 09:23:55
ចំនួនមតិ 0 | ចំនួនចែករំលែក 0

បើក្នុងជីវិត យើងបានជួបនឹងមនុស្សប្រុសខូចរហូតយល់ព្រមស្រលាញ់គ្នា លើសពីពីរដង នោះមិនមែនជារឿងស៊យនោះទេ ប៉ុន្តែអាចដោយសារខ្លួនយើងមាននិស្ស័យអ្វីម្យ៉ាងដែលអាចទាក់ចិត្តមនុស្សប្រុសបែបនោះឲ្យមកចាប់អារម្មណ៍យកអ្នកជាគោលដៅរបស់គេ។ ថ្ងៃនេះ កញ្ញានឹងលើកយកមូលហេតុខ្លះៗដែលធ្វើឲ្យមនុស្សស្រីល្អៗច្រើនជួបតែមនុស្សប្រុសអាក្រក់ សាវាជាញឹកញាប់។

១. មនុស្សស្រីល្អៗចូលចិត្តមើលពិភពលោកក្នុងផ្លូវវិជ្ជមាន

មនុស្សស្រីល្អតែងសម្លឹងមើលឃើញតែចំណុចល្អរបស់អ្នកដទៃ ហើយមើលរំលងចំណុចល្អរបស់គេ។ ចំណុចនេះមានគុណសម្បត្តិ ដោយមិនធ្វើឲ្យយើងស្ត្រេស ឬខ្លាចមនុស្សនៅជុំវិញ ប៉ុន្តែគុណវិបត្តិនោះគឺ យើងច្រើនតែទាក់ទាញមនុស្សប្រុសមិនល្អ ឲ្យចូលមកដោយមិនបានតាំងចិត្ត ព្រោះបើទោះបីអ្នកដទៃប្រាប់ថាគេមិនល្អប៉ុណ្ណា ប៉ុន្តែនៅពេលគេចូលមកក្នុងជីវិតយើង យើងក៏តែងមើលគេក្នុងផ្លូវល្អជានិច្ច។

២. មនុស្សប្រុសខូចមានមន្តស្នេហ៍ និងជំនាញខ្ពស់ក្នុងការចងចិត្តស្រីៗ

មនុស្សស្រីដែលមិនសូវមានបទពិសោធន៍ប្រាកដជាត្រូវប្រុសព្រានរាយមន្តស្នេហ៍ ឲ្យបាក់ចិត្ត ពីព្រោះពួកគេសុទ្ធតែមានបទពិសោធន៍ដឹងចិត្តមនុស្សស្រី ចេះ Surprise ចេះប្រើតិចនិកធ្វើឲ្យមនុស្សស្រីមានអារម្មណ៍ថាខ្លួនពិសេស ចេះប្រើសម្ដីផ្អែម ប៉ុន្តែបង្ហាញលក្ខណៈរឹងមាំជាបុរសពេញលក្ខណៈ ដែលនារីៗចង់នៅក្បែរ។

៣. ភាពចិត្តទន់ និងចិត្តល្អគឺជាចំណុចខ្សោយដែលគេវាយប្រហារបាន

គេច្រើនសង្កេតឃើញថាមនុស្សស្រីដែលមានចិត្តល្អ ចិត្តទន់ច្រើនជាគោលដៅប្រមាញ់ជា បពិសេសរបស់មនុស្សប្រុសខូច ព្រោះពួកគេអាចចូលមករកអ្នកបានយ៉ាងងាយ។ គ្រាន់តែគេធ្វើទឹកមុខសោកសៅ រៀបរាប់រឿងខូចចិត្ត ឬធ្វើទង្វើយកចិត្តខ្លះ ក៏ធ្វើឲ្យអ្នកចិត្តទន់ចង់ជួយគេភ្លាម។

៤. ស្មោះត្រង់ពេក ធ្វើឲ្យគេដឹងចិត្ត

មនុស្សស្រីដែលចូលចិត្តបើកចំហ ស្មោះត្រង់ មានអារម្មណ៍អ្វីក៏បង្ហាញចេញតាមទឹកមុខ ឬទង្វើឲ្យគេដឹងទាំងអស់នោះ គឺអាចឲ្យមនុស្សប្រុសខូចអានចិត្តបានយ៉ាងងាយ ថាអ្នកចូលចិត្តអ្វី មិនចូលចិត្តអ្វី និងត្រូវធ្វើយ៉ាងណាដើម្បីឲ្យអ្នកស្រលាញ់គេជាប់ចិត្ត និងចង់ក្លាយជាអ្នកតាមគេវិញ។

៥. ពាក្យសន្យា

ដូចដែលបានបញ្ជាក់ខាងលើហើយ ថាមនុស្សស្រីល្អៗច្រើនមើលពិភពលោកក្នុងផ្លូវល្អ ហើយជឿចិត្តមនុស្សដែលខ្លួនស្រលាញ់ ម្ល៉ោះហើយមនុស្សប្រុសខូចនឹងប្រើប្រាស់ពាក្យសន្យា ប្ដេជ្ញាផ្លាស់ប្ដូរខ្លួនឯងដើម្បីយើង ដែលធ្វើឲ្យស្រីៗចេះតែសង្ឃឹមថាគេនឹងអាចត្រលប់មកក្លាយជាមនុស្សស្រលាញ់ស្មោះបាន។ ភាគច្រើនទម្រាំដឹងខ្លួនថាវាមិនអាចទៅរួច នាងក៏បង់ចិត្តជ្រៅបាត់ទៅហើយ លក្ខណៈកាត់ចិត្តក៏លំបាក បន្តទៅមុខក៏មានតែទុក្ខ។

៦. មានជំនាញសុំទោស

រាល់លើកដែលគេក្បត់ចិត្ត ធ្វើខុសចំពោះយើង ក្បត់ពាក្យសន្យា ឬធ្វើឲ្យយើងឈឺចាប់ដោយវិធីផ្សេងៗរហូតយើងមានអារម្មណ៍ខឹង និងចង់បែកពីគេ គេតែងមានវិធីសុំទោសសព្វសារពើដើម្បីឲ្យយើងចិត្តទន់ម្ដងហើយម្ដងទៀត ដូចជាសម្រក់ទឹកភ្នែក លត់ជង្គង់ និយាយដូចជាគេរស់ខ្វះយើងមិនបាន ប៉ុន្តែពេលយើងព្រមអភ័យទោស គេក៏ត្រលប់ធ្វើដូចមុនដដែល។ ដូច្នេះហើយ បើចង់ដោះលែងខ្លួនឯងពីក្រញាំមនុស្សប្រុសខូច ស្រីៗយើងទាល់តែចិត្តរឹងបន្តិច ៕