នៅពេលអ្នកស្រឡាញ់គេខ្លាំងជាងខ្លួនឯង ម្នាក់ដែលឈឺចាប់ខ្លាំងក៏ជាអ្នកដែរ

2018-08-09 07:17:09
ចំនួនមតិ 0 | ចំនួនចែករំលែក 0

ខ្ញុំមិនដឹងថាគួរបន្ទោសអ្នកណាឲ្យចំនោះទេ តែនេះប្រហែលមកពីខ្ញុំខ្លួនឯងដែលស្រឡាញ់គេខ្លាំងបែបហ្នឹង។

ពេលខ្លះខ្ញុំក៏សួរខ្លួនឯងដែរថាហេតុអី ខ្ញុំត្រូវទ្រាំនូវទង្វើគេបែបនេះ? ខ្ញុំឃើញគេស្និទ្ធស្នាលជាមួយស្រីផ្សេងនៅនឹងភ្នែក ហើយវាមិនមែនជាលើកទីមួយទេ តែវាច្រើនសឹងតែខ្ញុំរាប់មិនចាំ។

រូបតំណាង

ត្រូវហើយនេះមកពីខ្ញុំស្រឡាញ់គេ ទើបគេមិនខ្វល់ពីអារម្មណ៍ខ្ញុំ មិនខ្វល់នូវអ្វីដែលខ្ញុំបានសុំពីគេ។ មនុស្សដែលគេចង់ទៅហើយ ទោះខ្ញុំហាម ទោះគេធ្លាប់សន្យាថាគេឈប់តែនោះវាគ្រាន់តែជាខ្យល់មួយវឹងដែលហោះកាត់ត្រចៀកខ្ញុំតែប៉ុណ្ណោះ។

ខ្ញុំអាចធ្វើអីបានទៅ ក្រៅពីអង្គុយពិបាកចិត្តតែឯង អង្គុយយំតែឯង ព្រោះទោះជានិយាយទៀតអ្វីដែលខ្ញុំទទួលបានវិញគឺមានតែឈ្លោះគ្នា ហើយអ្នកដែលពិបាកគឺមានតែខ្ញុំ។

ខ្ញុំតែងសួរគេថាគេស្រឡាញ់ខ្ញុំឬទេ? គេក៏ប្រាប់ខ្ញុំថា «ស្រឡាញ់» តែទង្វើគេមិនដូចអ្វីដែលគេនិយាយទេ។ ពួកយើងមិនសូវមានពេលនៅជាមួយគ្នានោះទេ ក៏កម្រចេញទៅក្រៅ ញ៉ាំអី មើលកុន ដើរលេងដូចគូស្នេហ៍ផ្សេងដែរ ភាគច្រើនគឺខ្ញុំជាអ្នកបបួលគេទើបពួកយើងអាចទៅជាមួយគ្នា។

គេក៏មិនសូវជានិយាយសួរនាំខ្ញុំអីដែរ ពួកយើងហាក់ស្ងប់ស្ងាត់ណាស់ ហើយពេលខ្លះស្ងប់ស្ងាត់ជាងអ្នកដទៃទៅទៀត។ ពេលខ្លះខ្ញុំមានអារម្មណ៍ថា តើពួកយើងជាអ្វីនឹងគ្នាឲ្យប្រាកដ? ជាសង្សារនឹងគ្នា? តែហេតុអីពួកយើងសោះកក្រោះជាមួយគ្នាម្ល៉េះ?

ក្នុងទំនាក់ទំនងស្នេហាមួយបើមានម្នាក់ស្រឡាញ់ម្នាក់ទៀតខ្លាំង នោះអ្នកដែលស្រឡាញ់គេខ្លាំងនឹងត្រូវឈឺចាប់។ បើសួរខ្ញុំថាខ្ញុំឈឺចាប់ប៉ុណ្ណានោះ មិនដឹងថាឆ្លើយប្រាប់បានយ៉ាងម៉េចទេ ព្រោះទោះឈឺចាប់បែបណាក៏ខ្ញុំនៅតែចង់ក្បែរគេ ចង់ជួបគេ ចង់ឃើញមុខគេ ចង់ឲ្យគេល្អជាមួយខ្ញុំ ទោះដឹងថាពេលខ្លះមិនអាចនឹងទៅរួចក៏ដោយ។

រូបតំណាង

នៅពេលអ្នកស្រឡាញ់មនុស្សម្នាក់ដែលមិនអាចតបស្នងនូវអ្វីដែលអ្នកចង់បានវិញ អ្នកនឹងត្រូវឈឺ តែអ្នកក៏មិនអាចបង្ខំឲ្យគេទាំងគេមិនចង់បានដែរ។ អ្វីដែលខ្ញុំអាចធ្វើបាននូវពេលនេះគឺមានតែព្យាយាមកុំឲ្យខ្លួនឯងនឹកគេពេក ហើយក៏រំពឹងទៅលើពេលវេលានឹងជួយដោះស្រាយរឿងគ្រប់យ៉ាង។ ខ្ញុំក៏គ្រាន់តែចង់ឃើញគេសប្បាយចិត្តដែរ ដូច្នេះបើគេនៅក្បែរអ្នកផ្សេងគេសប្បាយចិត្ត ខ្ញុំគួរតែបំពេញបំណងគេ។

ស្រឡាញ់មនុស្សម្នាក់មិនពិបាកទេ តែបើអ្នកស្រឡាញ់គេតែម្នាក់ឯងនោះទើបពិបាក៕

ចុចអាន៖៥យ៉ាងដែលមនុស្សប្រុសមិនគួរធ្វើ នៅពេលខ្លួនមានសង្សារហើយ

អត្ថបទ៖ Girl