ជានារីរឹងមាំក្នុងរឿងស្នេហាម្នាក់ គឺតែងតែមានចំណុចបែបនេះ
- 2018-07-17 03:28:31
- ចំនួនមតិ 0 | ចំនួនចែករំលែក 0
ជានារីរឹងមាំក្នុងរឿងស្នេហាម្នាក់ គឺតែងតែមានចំណុចបែបនេះ
រឹងមាំក្នុងរឿងស្នេហា មិនមែនមានន័យថាចិត្តដាច់ មិនយំ នោះទេ តែជាប្រភេទមនុស្សស្រីដែលមានភាពនឹងធឹង ច្បាស់លាស់ មិនលេងសើចក្នុងរឿងមនោសញ្ចេតនា។ ខាងក្រោមនេះគឺជាចំណុចដែលមនុស្សស្រីរឹងមាំម្នាក់ មានក្នុងស្នេហា ហើយអ្នកក៏គួរតែមានចំណុចទាំងនេះដែរ ៖
១. ជាមនុស្សស្រីដែលតែងតែជំរុញទឹកចិត្តមនុស្សប្រុស
អ្នកតែងតែជួយគាត់សម្រេចគោលដៅដែលគាត់ចង់បាន ដោយគ្មានការទាមទារ ឬក៏បង្ខំឲ្យគាត់ធ្វើអ្វីដែលខុសពីឧត្ដមគតិរបស់គាត់។ អាចនិយាយបានថាអ្នកជាមនុស្សស្រីម្នាក់ដែលតែងនៅពីក្រោយគាត់ ទោះពេលគាត់មានបញ្ហា ឬជោគជ័យក៏ដោយ។
**២. មិនធ្វើចរិតដូចក្មេងដែលយកស្នេហាជាការសប្បាយ**
អ្នកមានភាពច្បាស់លាស់មួយក្នុងស្នេហា ទោះបីឈ្លោះគ្នាក៏ដោយក៏យកអ្នកផ្សេងមកបញ្ឈឺគាត់ ឬក៏ប្រើវិធីផ្សេងដើម្បីសាកចិត្តគាត់។ អ្នកតែងតែធ្វើឲ្យគាត់មានភាពជឿជាក់លើអ្នក ហើយអ្នកក៏ជឿជាក់លើគាត់ដូចគ្នា។
៣. មិនធ្វើចរិតបែបព្រះនាងម្ចាស់
អ្នកមិនធ្វើចរិតដែលចាត់ទុកគាត់មិនស្មើអ្នក គ្មានការគោរពគាត់ ហើយឲ្យគាត់ធ្វើអ្វីតាមតែចិត្តអ្នកនោះទេ។ អ្នកគោរព ស្រឡាញ់គាត់ដូចគាត់ស្រឡាញ់អ្នក ហើយអ្នកព្យាយាមធ្វើអ្វីដែលជាសេចក្ដីសុខរបស់គាត់ ដូចដែលគាត់ធ្វើមកលើអ្នក។
៤. មិនត្រូវការពេលវេលាគាត់ ២៤ ម៉ោងក្នុងមួយថ្ងៃ
អ្នកមិនទាមទារពេលវេលាពីគាត់ខ្លាំងពេកនោះទេព្រោះអ្នកយល់ពីគាត់ ហើយអ្នកសុំត្រឹមតែការស្រឡាញ់ និង លះបង់ពេលវេលាតិចតួចរបស់គាត់ដើម្បីអ្នក។
៥. មិនខ្លាចក្នុងការបង្ហាញពីទំនាក់ទំនងរបស់អ្នកទៅកាន់អ្នកដទៃ
អ្នកមិនដែលមានសម្ពាធក្នុងការលាក់បាំងទំនាក់ទំនងអ្នកនោះទេ ហើយរឹតតែមិនខ្លាចក្នុងការបង្ហាញទៅកាន់គ្រួសារអ្នក។ ដោយឡែកអ្នកក៏មិនរញ៉េរញ៉ៃ ក្នុងការបង្អួតពីស្នេហាអ្នកទៅកាន់អ្នកណាដែរ គឺគ្រាន់តែដឹងថាអ្នកទាំងពីរស្រឡាញ់គ្នាច្បាស់។
៦. ដឹងពីរបៀបដែលថែរក្សាខ្លួនឯង
ទោះបីជាគាត់មិននៅក្បែរក៏ដោយ អ្នកមិនបោះបង់ខ្លួនឯងចោល ហើយរឹតតែមិនបណ្ដោយខ្លួនឲ្យមនុស្សប្រុសដទៃប៉ះពាល់។
៧. មានគោលដៅច្បាស់លាស់ក្នុងជីវិត
អ្នកដឹងពីខ្លួនឯងច្បាស់ ហើយចេះរៀបចំជីវិតខ្លួនឯងដោយមិនពឹងផ្អែកលើនរណា។ អ្នកដឹងថាត្រូវធ្វើអ្វី ហើយបន្តធ្វើអ្វីទៀត។ អ្នកមិនចោលអ្វីដែលអ្នកចង់បាន ដោយសារតែក្ដីស្រឡាញ់ដ៏គ្មានហេតុផលមួយនោះទេ គឺអ្នកជឿលើក្ដីស្រឡាញ់ដែលមនុស្សពីរនាក់មានសម្រាប់គ្នា មិនមែនជាការផ្លាស់ប្ដូរគ្នានោះទេ។
ការពិតមនុស្សស្រីដែលរឹងមាំ គឺនាងច្បាស់លាស់ជាមួយអ្វីដែលនាងមានណាស់ មិនថាស្នេហា មិនថាជីវិត។ រៀនធ្វើឲ្យខ្លួនឯងក្លាយជាមនុស្សស្រីរឹងមាំទៅ ព្រោះពេលអ្នករឹងមាំ អ្នកយល់ពីជីវិតនេះកាន់តែច្រើន៕
ចុចអាន៖មនុស្សស្រីល្អខ្លាំងពូកែ តែងនៅលីវយូរជាងគេជាងឯងដោយសារហេតុផលទាំង ៨ នេះ