៥ ចំណុចខុសគ្នារវាងអ្នកមានស្នេហារបៀបចាស់ទុំ និងស្នេហារបៀបកូនក្មេង

2018-07-09 08:30:00
ចំនួនមតិ 0 | ចំនួនចែករំលែក 0

ស្នេហាកើតចេញពីក្ដីស្រលាញ់រវាងមនុស្សពីរអ្នក។ ប៉ុន្តែក្ដីស្រលាញ់រវាងគូស្នេហ៍មួយគូៗ គឺមិនដូចគ្នានោះទេ។ គូស្នេហ៍ខ្លះស្រលាញ់គ្នាដោយស្ងៀមស្ងាត់របៀបចាស់ទុំ ដែលបង្ហាញជាទង្វើច្រើនជាងសម្ដី មិនចូលចិត្តបង្ហាញអ្នកដទៃទេ ហើយផ្ដោតលើក្ដីស្រលាញ់ដោយសុខចិត្តបំពេញតម្រូវការដៃគូរៀងខ្លួន។ ចំណែកគូខ្លះទៀតស្រលាញ់គ្នាបែបកូនក្មេង ដែលនៅឈ្លោះប្រកែកគ្នា ដើម្បីទាមទារចំណាប់អារម្មណ៍ និងចូលចិត្តបង្អួតអ្នកដទៃពីសេចក្ដីសុខរបស់ខ្លួន។ មានចំណុចជាច្រើនទៀតដែលគូស្នេហ៍របៀបចាស់ទុំធ្វើ ខុសពីគូស្នេហ៍របៀបកូនក្មេង ដូចជា៖

១. តម្រូវចិត្ត

គូស្នេហ៍បែបចាស់ទុំ គឺស្រលាញ់គ្នាជ្រាលជ្រៅ ហើយច្បាស់ណាស់ថាមិនដែលចង់ឲ្យដៃគូផ្លាស់ប្ដូរ ដើម្បីបំពេញតម្រូវចិត្តខ្លួននោះទេ។ ផ្ទុយទៅវិញគេចង់ឲ្យដៃគូរក្សាសភាពដើម ហើយស្រលាញ់នូវអ្វីដែលគេមាន។ ខុសពីស្នេហារបៀបក្មេងដែលចូលចិត្តបំពេញតាមចំណូលចិត្តខ្លួនឯង ហើយឲ្យដៃគូម្ខាងទៀតផ្លាស់ប្ដូរ។

២. ឈ្លោះគ្នា

មិនថាជាស្នេហាចាស់ទុំឬស្នេហាកូនក្មេងនោះទេ គឺនៅតែមានការឈ្លោះប្រកែកគ្នា។ ប៉ុន្តែវាខុសត្រង់ថាស្នេហាចាស់ទុំ នៅពេលឈ្លោះគ្នា គឺភាគីម្ខាងនិយាយភាគីម្ខាងទៀតស្ដាប់ រួចទាំងពីរអ្នកពិចារណារៀងខ្លួន ដើម្បីស្វែងរកដំណោះស្រាយ។ ស្នេហាកូនក្មេង នៅពេលឈ្លោះគ្នា គឺអាងបែកដោយយកត្រូវរៀងខ្លួន។

៣. បង្ហាញបើកចំហរ

ស្នេហាកូនក្មេងចូលចិត្តបង្ហាញ និងបង្អួតអ្នកដទៃពីសេចក្ដីសុខរបស់ខ្លួន មិនថាខាងក្រៅ ឬក្នុងប្រព័ន្ធអ៊ីនធឺណិតនោះទេ។ សេចក្ដីសុខរបស់គូស្នេហ៍នេះឋិតនៅលើការយល់ឃើញរបស់អ្នកដទៃប៉ុណ្ណោះ។ ខុសពីស្នេហារបៀបចាស់ទុំ មិនសូវចូលចិត្តបង្អួតអ្នកដទៃតែសម្បកបែបនេះទេ គឺគេស្រលាញ់ដោយបញ្ជាក់តាមទង្វើដែលចូលដល់ចាស់ទុំដឹងឮ និងអនុញ្ញាតជាដើម។

៤. មិនបង្ហាញអារម្មណ៍តាមរយៈបណ្ដាញសង្គម

ស្នេហាបែបអ្នកចាស់ទុំ មិនចូលចិត្តបង្ហោះបង្ហើរសារថ្លែងទុក្ខឲ្យអ្នកដទៃដឹងទេ។ ជាជាងបង្ហោះឲ្យអ្នកដទៃកាត់ក្ដី គេសុខចិត្តជួបគ្នានិយាយតទល់ និងរកដំណោះស្រាយទៅវិញទេ។ ស្នេហាកូនក្មេងនិយមបង្ហោះសារខូចចិត្តដើម្បីទាមទារការចាប់អារម្មណ៍ពីដៃគូ។

៥. ការជឿជាក់

គូស្នេហ៍ដែលស្រលាញ់គ្នារបៀបក្មេងនៅចូលចិត្តឈ្លោះ ប្រច័ណ្ឌរករឿងគ្នា ព្រោះការមិនទុកចិត្តចំពោះគ្នា ប៉ុន្តែគូស្នេហ៍ចាស់ទុំគេជឿជាក់លើគ្នា និងមិនងាយប្រច័ណ្ឌផ្ដេសផ្ដាសនោះទេ៕