សង្សារជាដំណាក់កាលមួយស្វែងយល់ពីគ្នាប៉ុណ្ណោះ ចាំបាច់អីផ្ញើជីវិតខ្លួនឯងទៅឲ្យគេ?

2018-05-16 09:20:17
ចំនួនមតិ 0 | ចំនួនចែករំលែក 0

ផ្ញើជូនទាំងអស់គ្នាមិនថាមនុស្សស្រី ឬក៏មនុស្សប្រុសទេ!

សង្ឃឹមថាបានអានរឿងរ៉ាវទាំងនេះហើយ អ្នកអាចនឹងយល់ ហើយអាចគ្រប់គ្រងខ្លួនឯងបានល្អជាងនេះ។

មិនបន្ទោសទេថាមានការឈឺចាប់ ការពិបាកចិត្តនៅពេលស្នេហាដើរដល់ផ្លូវបញ្ចប់ ព្រោះមនុស្សយើងសុទ្ធតែមានមនោសញ្ចេតនា ហើយការស្រឡាញ់ គឺជាការហួងហែង ការមិនចង់បាត់បង់។ យ៉ាងណាក៏ដោយមនុស្សយើងមិនអាចសមបំណងគ្រប់យ៉ាងនោះទេ មានរឿងខ្លះវាអាចនឹងមកផ្ទុយពីការចង់បានរបស់យើង។

រូបតំណាង

ខ្ញុំធ្លាប់មានសង្សារ ខ្ញុំធ្លាប់បែកបាក់គ្នា ហើយការឈឺចាប់ ការខកចិត្តទាំងនោះខ្ញុំយល់ច្បាស់។ ខ្ញុំធ្លាប់មានគំនិតចង់បោះបង់ជីវិតខ្លួនឯងដោយសារគេ តែជំនួសមកវិញនូវសំណួរជាច្រើនផុសក្នុងខួរក្បាលខ្ញុំ។

គេជាអ្នកណា? ត្រូវហើយគេជាសង្សារខ្ញុំ សង្សារដែលខ្ញុំស្រឡាញ់ខ្លាំងជាទីបំផុត តែគេមិនមែនជាកម្មសិទ្ធិខ្ញុំទេ ហើយខ្ញុំក៏មិនអាចឃាត់គេទុកក្នុងរង្វង់ដៃខ្ញុំរហូតដែរ។

សង្សារជាអ្នកណាទៅ? ក្រែងយើងទាក់ទងគ្នាដើម្បីគិតគូរពីរឿងអនាគតមែនទេ? មិនមែនមានន័យថាសង្សារអាចក្លាយជាអនាគតយើងបានឯណា។ ត្រូវហើយ សង្សារគ្រាន់តែជាដំណាក់កាលមួយដែលមនុស្ស២នាក់សិក្សា និងស្វែងយល់ពីគ្នាទៅវិញទៅមកតែប៉ុណ្ណោះ បើគេមិនពេញចិត្ត បើមានរឿងទាស់ចិត្ត មិនចុះសម្រុងគ្នា គេនឹងដើរចេញទៅរកមនុស្សដែលសមនឹងគេ។ត្រូវហើយ គេធ្វើបែបនេះគឺមិនខុសទេ តែអ្នកដែលខុសគឺខ្ញុំព្រោះខ្ញុំមិនទទួលស្គាល់ការពិត ហើយខ្ញុំបានផ្ញើជីវិតខ្ញុំទៅលើមនុស្សម្នាក់ដែលគ្រាន់ទេមានឈ្មោះថាសង្សារ។

សំណួរទាំងនោះបានធ្វើឲ្យខ្ញុំយល់នូវរឿងជាច្រើនដែលពីមុនខ្ញុំមិនដែលនឹកឃើញ។ ពិតជាត្រឹមត្រូវណាស់យើងទាក់ទងគ្នាគឺដោយសារចង់ដឹងថាគេអាចជាមនុស្សដែលយើងផ្ញើវាសនា អនាគតបានដែរឬទេ? មិនមែនមានន័យថាយើងត្រូវប្រគល់គ្រប់យ៉ាងឲ្យគេនៅពេលនេះទេ។

បើបែកគ្នាហើយជូនពរគេទៅ ឲ្យគេជួបគូអនាគតគេដែលល្អ ហើយក៏ត្រូវជូនពរខ្លួនឯងដូចគ្នាព្រោះយើងត្រូវមានមនុស្សជាច្រើនទៀតសម្រាប់ស្វែងយល់។

រូបតំណាង

កុំគិតខ្លី កុំធ្វើឲ្យខ្លួនពិបាកដោយសារតែការចែកផ្លូវគ្នាជាមួយសង្សារអី អ្នកអាចយំបាន តែអ្នកមិនអាចយំរហូតទេ។ ក្រោកឡើងថ្ងៃថ្មីនឹងមកដល់ ត្រៀមខ្លួនទទួលយកថ្ងៃស្អែកឬនៅ?

ចុចអាន៖បើគេជ្រើសអ្នកផ្សេង អ្វីដែលអ្នកត្រូវធ្វើមិនមែនយំទេ តែត្រូវធ្វើឲ្យគេស្ដាយ

អត្ថបទ៖ ផេង ផលធិតា