ទង្វើ៧យ៉ាង មនុស្សប្រុសធ្វើតែជាមួយនារីដែលខ្លួនស្រលាញ់ពិតប្រាកដប៉ុណ្ណោះ
- 2018-05-06 07:59:11
- ចំនួនមតិ 0 | ចំនួនចែករំលែក 0
ទង្វើ៧យ៉ាង មនុស្សប្រុសធ្វើតែជាមួយនារីដែលខ្លួនស្រលាញ់ពិតប្រាកដប៉ុណ្ណោះ
ធ្លាប់ឮទេថា ទង្វើរបស់មនុស្សប្រុសពេលខ្លះធ្វើឱ្យមនុស្សស្រីយល់ច្រឡំ រហូតគិតថា ប្រុសម្នាក់នោះស្រលាញ់នាង ទាំងដែលការពិតគឺមិនមែនសោះ។ ទោះបីជាធ្លាប់ធ្វើល្អដាក់អ្នកគ្រប់គ្នាមែន តែមានតែទង្វើពិសេសខាងក្រោមនេះប៉ុណ្ណោះ ដែលគេធ្វើតែជាមួយនារីដែលគេស្រលាញ់ពិតប្រាកដ។
១-គាត់ព្រមស្ដាប់រឿងអ្នកគ្រប់យ៉ាង
មនុស្សប្រុសជាធម្មតា មិនចូលចិត្តស្ដាប់ ឬឃើញអ្វីដែលជារឿងតូចតាច ឬមិនទាក់ទងនឹងគេឡើយ។ ប៉ុន្តែសម្រាប់អ្នកដែលគេស្រលាញ់ គេនឹងព្រមស្ដាប់អ្នកនិយាយគ្រប់រឿង មិនថាជារឿងសប្បាយចិត្ត កើតទុក្ខ ឬអ្វីផ្សេងឡើយ។ និយាយរួម ឱ្យតែរឿងទាំងនោះមានអ្នកនៅក្នុងនោះ គាត់ពេញចិត្តនឹងចាំស្ដាប់ជានិច្ច។
២-ឈ្លោះគ្នាគឺជារឿងធម្មតា
ការឈ្លោះប្រកែក ឬតមាត់តសម្ដីគ្នា សម្រាប់បុរសគឺជារឿងដែលមិនចង់ឱ្យកើតមានឡើយ ឬបើទោះបីជាកើតមាន ក៏គេមិនងាយធ្វើចិត្តមកត្រូវគ្នាជាមួយភាគីម្ខាងទៀតណាស់។ នេះជាអ្វីដែលកើតឡើងរវាងគេនិងមិត្តភក្ដិ ឬអ្នកស្គាល់គ្នាធម្មតា។ ប៉ុន្តែបើគេពិតជាស្រលាញ់អ្នក ទោះបីអ្នកខឹង ឬគេខឹង ឬឈ្លោះគ្នាបែកផ្សែង តែមិនប៉ុន្មានឡើយ គេនឹងរកវិធីឱ្យបានត្រូវគ្នាវិញមិនខាន។
៣-សុខចិត្តលះបង់ដើម្បីក្ដីសុខអ្នក
បុរសដែលស្រលាញ់អ្នកពិតប្រាកដនឹងមិនរួញរាក្នុងការស្វែងរកក្ដីសុខឱ្យអ្នកឡើយ។ មិនថាអ្នកឃ្លានយប់ព្រលប់ ឈឺថ្កាត់ ឬត្រូវការជំនួយរបស់គេ គេនឹងបង្ហាញមុខជានិច្ចដោយមិនរអ៊ូរទាំ ឬបង្ហាញអាការៈទើសទាល់អ្វីឡើយ។
៤-តស៊ូគ្រប់យ៉ាងដើម្បីបានអ្នក
មិនខ្វះទេ អ្នកដែលមានបញ្ហាស្មុគស្មាញក្នុងទំនាក់ទំនងរវាងមនុស្សពីរនាក់ តែមិនថាទោះកាលៈទេសៈលំបាកយ៉ាងណា គេនឹងខំពុះពារធ្វើយ៉ាងណាឱ្យបានអ្នក និងអាចរស់នៅជាមួយគ្នារហូត។
៥-បង្ហាញមោទកភាពចំពោះជោគជ័យរបស់អ្នក
សម្រាប់មនុស្សរាប់អានធម្មតា កម្រមានអ្នកបង្ហាញភាពរីករាយពិតប្រាកដ ពេលដឹងថាម្នាក់ទៀតបានជោគជ័យណាស់ ទោះបីគេនិយាយក្ដែងៗថា ជាមិត្តល្អបំផុតក៏ដោយ។ ផ្ទុយទៅវិញ បើសម្រាប់អ្នកដែលគេស្រលាញ់ គេនឹងបង្ហាញឱ្យឃើញពីភាពត្រេកអរ និងមោទកភាព ពេលឃើញអ្នកបានសម្រេចគោលដៅ ព្រោះក្ដីសុខរបស់អ្នកក៏ជាក្ដីសុខរបស់គាត់ដូចគ្នា។
៦-មើលភាពសម្រស់ពិតរបស់អ្នក ទោះបីមិនតុបតែងខ្លួនក៏ដោយ
ស្នេហាធ្វើឱ្យមនុស្សខ្វាក់ភ្នែក តែស្នេហ៍ពិតនឹងធ្វើឱ្យមនុស្សអាចមើលឃើញអ្វីច្បាស់ពីអ្នកដែលខ្លួនស្រលាញ់។ ទោះបីអ្នកមិនបានតុបតែងគ្រឿងសម្អាង ឬស្លៀកពាក់ថ្លៃៗក៏ដោយ គាត់នឹងមើលឃើញពីសម្រស់ពីខាងក្នុងរបស់អ្នក និងនៅតែស្រលាញ់អ្នកគ្រប់ពេលវេលា។
៧-ឈឺឆ្អាលរឿងគ្រួសារនិងមិត្តភក្ដិរបស់អ្នក
បុរសដែលស្រលាញ់អ្នកពិតប្រាកដនឹងទាមទារចង់ដឹងពីសុខទុក្ខរបស់មនុស្សដែលនៅជុំវិញខ្លួនអ្នក និងចេះឈឺឆ្អាលពេលដឹងថាអ្នកទាំងនោះមានទុក្ខ មិនមែនចាំយកតែរួចខ្លួននោះទេ។
នារីគ្រប់រូបគួរតែទទួលបានការស្រលាញ់ពីបុរសដែលស្រលាញ់ និងគោរពអ្នកពិតប្រាកដ។ ដូច្នេះបើមើលឃើញថាទំនាក់ទំនងរបស់អ្នកកំពុងមានភាពស្រពិចស្រពិល ឬគ្មានសង្ឃឹមទៅមុខ គួរតែកុំបន្តនាំតែអូសបន្លាយពេលឥតប្រយោជន៍ទៀតអី។ បុរសល្អគង់តែមកដល់នៅណាមួយមិនខាន កុំទាន់អស់សង្ឃឹម!