មិនចង់ឲ្យឈឺក្រោយដើរកាត់ភ្លៀង ត្រូវប្រញាប់ធ្វើរឿងទាំងនេះភ្លាម

2018-05-02 07:32:19
ចំនួនមតិ 0 | ចំនួនចែករំលែក 0

ដល់រដូវភ្លៀងពេលណា បញ្ហាធំជាងគេ គឺរឿងទទឹកភ្លៀងហ្នឹងតែម្ដង។ ជួនកាលដើរ ឬជិះម៉ូតូបានកណ្ដាលផ្លូវហើយ ស្រាប់តែភ្លៀងរ៉ាវ រកអាវភ្លៀងរកអីមិនទាន់ ក៏សើមជោក មិនអាចទៅធ្វើការ ឬទៅរៀនបាន។ អ្វីដែលធ្ងន់ធ្ងរជាងនេះទៀតនោះ ក្រោយពីត្រូវទឹកភ្លៀងសើមជោក ភាគរយច្រើនគឺប្រាកដជាឈឺ។ ដូច្នេះថ្ងៃនេះ Kanha សូមបង្ហាញពីវិធីមួយចំនួនដើម្បីការពារខ្លួនកុំឲ្យឈឺបន្ទាប់ពីត្រូវទឹកភ្លៀង៖

១. បើសិនមិនអាចប្ដូរខោអាវបាន ត្រូវប្រញាប់ជូតសក់ ជូតក្បាលឲ្យស្ងួត និងធ្វើយ៉ាងណាឲ្យខោអាវរបស់យើងស្ងួតឲ្យបានឆាប់។

២. នៅពេលត្រលប់ទៅដល់ផ្ទះ ត្រូវប្រញាប់ដោះខោអាវ ស្រោមជើង ក៏ដូចជាស្បែកជើងដែលទទឹកភ្លៀងចេញ ព្រោះការស្លៀកពាក់សម្លៀកបំពាក់ដែលសើមដោយទឹកភ្លៀង នឹងអាចឲ្យយើងមិនស្រួលខ្លួន ឬផ្ដាសាយ រួមទាំងអាចដល់ហើមសួតបាន។ ម្យ៉ាងទៀតខោអាវសើមៗ ក៏ជាប្រភពនៃមេរោគផ្សេងៗផងដែរ។

៣. ងូតទឹក កក់សក់ភ្លាមៗ ព្រោះក្នុងទឹកភ្លៀងមានទាំងល្អងធូលី របស់គគ្រិចៗ និងមេរោគ ដែរ ដូច្នេះយើងគួរតែងូតទឹកកក់សក់ សម្អាតរាងកាយឲ្យបានស្អាតដោយទឹកក្ដៅឧណ្ហៗ ដើម្បីឲ្យរាងកាយទទួលបានភាពកក់ក្ដៅ។

៤. ប្រើសាប៊ូដុសជើងឲ្យស្អាត អាចប្រើស្ក្រាប់ ឬអំបិលខាត់ស្បែកលាយផង ព្រោះការដើរកាត់ទឹកមិនស្អាតនឹងធ្វើឲ្យកើតផ្សិតដែលជាដើមហេតុនៃជំងឺទឹកស៊ីជើងបាន។

៥. ជូតខ្លួនឲ្យស្ងួត ហើយកុំភ្លេចផ្លុំសក់ឲ្យស្ងួតសិនមុនគេង ដើម្បីកុំឲ្យផ្អូមសក់ ដែលនាំឲ្យមានបញ្ហាដល់សរសៃសក់ ឬធ្វើឲ្យកើតផ្ដាសាយ។

៦. ត្រាំជើងក្នុងទឹកក្ដៅឧណ្ហៗបើចង់ស្រួលខ្លួន ហើយធ្វើឲ្យរាងកាយកាន់តែមានភាពកក់ក្ដៅ។ ក្រោយពីត្រាំទឹកបានមួយស្របក់ហើយត្រូវជូតជើងឲ្យស្អាត ហើយលាបម្សៅហុយដើម្បីជួយឲ្យស្រួលជើង។

៧. លាបក្រែម ឬ Moisturizer បម្រុងស្បែកបន្តិច ដើម្បីបន្ថែមសំណើមឲ្យស្បែកដែលស្ងួត ក្រោយពីដើរហាលភ្លៀង និងងូតទឹកក្ដៅរួច ព្រមទាំងដើម្បីបន្ថយអាការរមាស់ផងដែរ។

៨. ផឹកតែថ្នាំក្ដៅៗ ដូចជាតែជីអង្កាម ឬទឹកខ្ញីមួយកែវ ដើម្បីផ្ដល់កម្ដៅក្នុងរាងកាយ និងធ្វើឲ្យរាងកាយអាចប្រឆាំងនឹងមេរោគ និងបាក់តេរីផ្សេងៗបានកាន់តែល្អ។

៩. គេងលក់ និងសម្រាកឲ្យបានគ្រប់គ្រាន់ ហើយនៅយប់ដែលត្រូវភ្លៀងនោះ គឺមិនត្រូវចូលគេងយប់ជ្រៅដាច់ខាត ដើម្បីឲ្យរាងកាយបានសម្រាកក្រោយពីទទឹកភ្លៀង ដូច្នេះទើបមិនឈឺ ព្រមទាំងអាចក្រោកមកមានកម្លាំងធ្វើការធម្មតានៅព្រឹកបន្ទាប់។

នៅក្រោមមេឃបើចង់គេចពីភ្លៀងក៏គេចមិនបានដែរ ដូច្នេះហើយទៅណាមកណាលើកក្រោយយើងគួរតែមានឆ័ត្រ ឬអាវភ្លៀងជាប់ខ្លួនជានិច្ច ប៉ុន្តែបើភ្លៀងខ្លាំងមែនទែន ដែលសូម្បីតែឆ័ត្រក៏ទប់ទល់មិនបាន គួរតែចាំឲ្យភ្លៀងរាំងសិន សឹមបន្តដំណើរទៀត ដើម្បីបង្ការឈឺ ឬគ្រោះថ្នាក់ផ្សេងៗ ៕

ចុចអាន៖

ប្រភព៖ Kapook ប្រែសម្រួល៖ ស្វាយ វ៉ាន់ថន