ចង់មានជីវិតផ្ទាល់ខ្លួន និងជីវិតស្នេហាស្រស់ស្អាតព្រមគ្នា ត្រូវប្រកាន់យកចំណុចទាំងនេះ

2018-04-24 08:33:22
ចំនួនមតិ 0 | ចំនួនចែករំលែក 0

ពេលចាប់ផ្ដើមស្រឡាញ់អ្នកណាម្នាក់ ប្រហែលមានមនុស្សមួយចំនួនបានផ្លាស់ប្ដូរខ្លួនឯងទៅជាមនុស្សម្នាក់ផ្សេងទៀតដោយមិនដឹងខ្លួន។ យ៉ាងណាក្ដីអ្នកត្រូវប្រាកដថាទោះអ្នកមានស្នេហាក៏ដោយក៏មិនគួរឲ្យស្នេហាមានឥទ្ធិពលប៉ះពាល់ដល់ជីវិតអ្នកឡើយ។ ម្យ៉ាងទៀតដើម្បីជីវិតផ្ទាល់ខ្លួន និងជីវិតស្នេហាស្រស់ស្អាតព្រមគ្នា ត្រូវប្រកាន់យកចំណុចទាំងនេះដែរព្រោះបើអ្នករបូតរឿងណាមួយអ្នកនឹងមានការឈឺចាប់ខ្លាំង ៖

១. ប្រាកដថាស្នេហាសម្រាប់តែមនុស្ស ២ នាក់ប៉ុណ្ណោះ

ស្នេហាគឺសម្រាប់មនុស្ស២នាក់ តែបើលើសពី ២ នាក់គឺត្រូវមានម្នាក់ដើរចេញជាដាច់ខាត។ ត្រូវជឿថាគាត់ស្រឡាញ់តែអ្នក មានតែអ្នក ប៉ុន្តែបើគាត់មិនអាចថែរក្សាស្នេហាអ្នកបាននោះទេ អ្នកមានសិទ្ធិក្នុងការដើរចេញដោយគ្មានកំហុស និងការស្ដាយក្រោយ។ បើអ្នកប្រកាន់គំនិតបែបនេះអ្នកក៏មិនបាច់ចាំហួងហែងច្រើន សង្ស័យច្រើន និងខ្វល់ចិត្តច្រើនដែរ។

រូបតំណាង

**២. កុំឲ្យស្នេហាក្លាយជាជម្រើសទី ១ ក្នុងជីវិត**

អ្នកជាធម្មជាតិមួយដែលមនុស្សត្រូវតែមាន ប៉ុន្តែមិនមែនមានន័យថាអ្នកត្រូវបោះបង់ការងារ បោះបង់គ្រួសារ ឬសូម្បីតែខ្លួនឯងសម្រាប់ស្នេហាទេ។ ត្រូវចាំថាបើអ្នកស្ថិតក្នុងជីវភាពតោកយ៉ាក ស្នេហាអ្នកក៏គ្មានសុភមង្គលដែរ។បើអ្នកចង់ឲ្យស្នេហាមានសេចក្ដីសុខពេញមួយជីវិត អ្វីដែលសំខាន់គឺអ្នកត្រូវប្រឹងប្រែងឲ្យជីវិតអ្នកសុខស្រួលសិន។ ម្យ៉ាងទៀតអ្នកក៏មិនអាចបោះបង់គ្រួសារដើម្បីតែស្នេហាដែរ ព្រោះនៅមានមនុស្ស២នាក់ទៀតដែរស្រឡាញ់អ្នកខ្លាំងជាងខ្លួនឯងទៀតនោះគឺឪពុកម្ដាយរបស់អ្នក។

៣. ដាក់ដែនកំណត់

អ្វីក៏ដោយឲ្យតែលើសដែនកំណត់គឺគ្មានអ្នកណាទ្រាំបានទេ។ ត្រូវមានដែនកំណត់សម្រាប់ស្នេហា មិនមែនស្រឡាញ់ងប់ងុលដល់លែងដឹងអី ហើយភ្លេចថាខ្លួនមានឋានៈជាអ្វីនឹងគ្នានោះ។ ការប្រចណ្ឌ ការហាមឃាត់ ការខ្វល់ខ្វាយ សុទ្ធតែត្រូវមានកំណត់ព្រោះអ្នកមានឈ្មោះត្រឹមតែជាសង្សារប៉ុណ្ណោះដូច្នេះត្រូវចេះរក្សាសេរីភាព និង កិត្តិយសឲ្យខ្លួនឯង។

៤. កុំរស់នៅជាមួយគ្នាមុនពេលរៀបការ

ការរស់នៅជាមួយគ្នាមុនពេលរៀបការគឺមានហានិភ័យក្នុងការបែកបាក់គ្នាច្រើនណាស់។ បើអ្នកមិនទាន់ក្លាយជាប្ដីប្រពន្ធឡើយ ដូច្នេះគួរតែនៅរៀងខ្លួនទើបជាការល្អ។ អាចយូរៗ ឬ ពេលមានការចាំបាច់សឹមអនុញ្ញាត ព្រោះអ្នកអាចនឹងចាប់ផ្ដើមមានសម្ពាធពេលរស់នៅជាមួយគ្នាយូរទៅ ដូច្នេះបើមិនទាន់ត្រៀមខ្លួនកុំទាន់អី។

៥. ក្ដីស្រមៃរបស់គាត់មិនមែនក្ដីស្រមៃរបស់អ្នក

អ្នកទាំង២ មានក្ដីស្រមៃរៀងខ្លួន ដូច្នេះមិនគួរបោះបង់ក្ដីស្រមៃខ្លួនឯងព្រោះតែគេនោះទេ ឬក៏ឲ្យគេចោលក្ដីសុបិនគេដោយសារអ្នកដែរ។ ត្រូវរស់នៅដោយមានភាពរីករាយ ជាជាងដាក់សម្ពាធឲ្យខ្លួនឯងព្រោះតែមនុស្សម្នាក់។ ព្យាយាមបន្តក្ដីស្រមៃ ហើយបើគាត់ជាមនុស្សល្អសម្រាប់អ្នកមែនគាត់នឹងនៅគាំទ្រ និងចាំជួយអ្នកមិនមែនបង្អាក់អ្នកនោះឡើយ។

៦.មានពេលវេលា

ទាំងពេលវេលាផ្ទាល់ខ្លួន ទាំងពេលវេលាជាមួយគ្នាសុទ្ធតែអ្នកត្រូវគិតគូរ ព្រោះមិនអាចបោះចោលមួយណាបានទេ។ ពេលអ្នកមានស្នេហាអ្នកអាចចែកពេលអ្នកទៅគេ តែមិនមែនមានន័យថាចែកពេលទាំងអស់នោះទេ។ កុំទម្លាប់ឲ្យខ្លួនឯងបាត់បង់សេរីភាព ឬមិនសប្បាយចិត្តពេលស្រឡាញ់អ្នកណាម្នាក់ឲ្យសោះ ៕