ប្រើរបស់ទាំងនេះរាល់ថ្ងៃតែមិនដឹងថាគគ្រិចដល់ថ្នាក់ហ្នឹង
- 2018-04-12 04:39:23
- ចំនួនមតិ 0 | ចំនួនចែករំលែក 0
ប្រើរបស់ទាំងនេះរាល់ថ្ងៃតែមិនដឹងថាគគ្រិចដល់ថ្នាក់ហ្នឹង
អ្នកមិនដែលចាប់អារម្មណ៍ទេថា របស់ដែលអ្នកប្រើ និងប៉ះរាល់ថ្ងៃមានមេរោគដល់កម្រិតណា។ វាផ្ទុកទៅដោយបាក់តេរី មេរោគដែលធ្វើឱ្យអ្នកឈឺទាំងមិនដឹងខ្លួន។ អ្នកនឹងមិនចាប់អារម្មណ៍ទេថារបស់ទាំងនោះគគ្រិចដល់ម្ល៉ឹង ទើបអ្នកមិនយកចិត្តទុកដាក់សម្អាតវា។ របស់ទាំងនោះមានដូចជា៖
១. ដបដាក់ទឹករៀងរាល់ថ្ងៃ
ដបដែលអ្នកដាក់ទឹករៀងរាល់ថ្ងៃមិនគួរគគ្រិចនោះទេ ប៉ុន្តែពិតជាអាច ព្រោះវាផ្ទុកទៅដោយមេរោគ មកពីដៃ និងមាត់របស់អ្នក។ បន្ទាប់ពីប្រើវាជារៀងរាល់ថ្ងៃដោយមិនបានសម្អាត ឬសម្អាតមិនបានស្អាតល្អ។ ហេតុនេះហើយអ្នកគួរតែសម្អាតវាជាមួយសាប៊ូ និងទឹកក្តៅឧណ្ហៗឱ្យបានញឹកញាប់។
២. អាវក្នុង (អាវទ្រនាប់)
អាវក្នុងក៏ត្រូវបោកគក់ញឹកញាប់ដូចជាសំលៀកបំពាក់ផ្សេងទៀតដែរ។ ប៉ុន្តែនារីមួយចំនួនពាក់វារហូតដល់ ១ ឬ២អាទិត្យទើបបោកម្តង។ការធ្វើបែបនេះវាអាចបណ្តាលឱ្យមានជំងឺផ្សេងៗ ឬអាចឈានដល់មហារីក ដោយសារតែបាក់តេរី ដែលចេញពីញើសអាចបង្កទៅជាផ្សិត។
៣. កន្សែងជូតខ្លួន
នៅពេលដែលអ្នកប្រើប្រាស់រួច គួរណាស់តែហាលថ្ងៃ ឬឧស្សាហ៍បោក។ ជាធម្មតាកន្សែងដែលប្រើរួចច្រើនតែសើម និងប្រឡាក់។នៅពេលដែលអ្នកទុកវាចោល វាអាចមានមេរោគ និងធុំក្លិន។ ដូចនេះអ្នកគួរតែបោកវា នៅពេលដែលប្រើបាន២ ឬ៣ដង។
៤. ស្រោមពូក ភួយ និងខ្នើយ
ស្រោមពូក ភួយ និងខ្នើយជារបស់ដែលពិបាកសម្អាតជាងគេ ហេតុនេះហើយទើបមនុស្សមួយចំនួនកម្រនិងបោកវាញឹកញាប់។ ប៉ុន្តែអ្នកទាំងនោះភ្លេចគិតថា ស្រោមពូក ភួយ និងខ្នើយជារបស់ដែលត្រូវតែមានអនាម័យជាងគេ ព្រោះអ្នកត្រូវចំណាយពេលពេញមួយយប់ជាមួយវា។ ធូលីដី និងភាពកង្វក់ផ្សេងៗអាចបង្កជាមុន ឬកន្ទួលរមាស់។ អ្នកគួរតែបោកវាមួយអាទិត្យម្តង ដើម្បីចៀសវាងបញ្ហាអស់ទាំងនេះ។
៥. ច្រាសដុសធ្មេញ
ស្រមៃទៅមើលថាច្រាសដុសធ្មេញរបស់អ្នកមានតួនាទីធ្វើអ្វីខ្លះ? អ្នកប្រើប្រាស់វាជារៀងរាល់ថ្ងៃ (ធម្មតា១ថ្ងៃ២ដង) មានន័យថាវាងាយរងនឹងបាក់តេរីផ្សេងៗ ជាពិសេសបាក់តេរីដែលមាននៅក្នុងបន្ទប់ទឹក។ អ្នកអាចនឹងឆ្លងមេរោគបានយ៉ាងងាយតាមរយៈការដុសធ្មេញ ដូច្នេះហើយអ្នកគួរណាស់តែសម្អាតច្រាសរបស់អ្នក១អាទិត្យម្តង និងផ្លាស់ប្ដូរថ្មីយ៉ាងហោចបីខែម្ដង។
៦. នៅក្នុងឡានរបស់អ្នក
ជាទូទៅ ក្នុងឡានតែងមានសំរាមដូចជា ដបទឹកចាស់ៗ ក្រដាសជូតមាត់ និងអីវ៉ាន់ផ្សេងទៀត ជាពិសេសឡាននារីៗ។ ម៉ាស៊ីនត្រជាក់នៅក្នុងឡាននឹងប្រែទៅជាកង្វក់ ដែលបណ្តាលឱ្យអ្នកក្រដាសមិនឈប់ និងឆ្លងមេរោគ។ បើសិនជាអ្នកបើកបរជាញឹកញាប់ អ្នកគួរតែលាងយ៉ាងតិច១ដងក្នុង១ខែ។
៧. កាបូប
កាបូបលុយ និងកាបូបយួរដៃរបស់អ្នក ងាយទទួលរងនូវសារធាតុកង្វក់ណាស់ ក៏ព្រោះតែបាក់តេរី និងមេរោគដែលចេញពីលុយ អាចនិងចម្លងដល់អ្នកតាមរយៈដៃ។ ជាពិសេសនៅពេលដែលអ្នកទុកវាចោលនៅលើដី និងនៅក្នុងបន្ទប់ទឹកសាធារណៈ។
៨. ទូរស័ព្ទនិងកុំព្យូទ័រ
ប្រហែលជាអ្នកបានដឹងខ្លះហើយ ប៉ុន្តែអ្នកមិនសូវយកចិត្តទុកដាក់លើរឿងនេះ។ ទូរស័ព្ទជារបស់ដែលយើងប្រើប្រាស់រាល់ថ្ងៃស្ទើរគ្រប់ពេល។ ទូរស័ព្ទដៃអាចនិយាយបានថា ជារបស់ដែលគគ្រិចបំផុត ដោយសារតែពេលខ្លះ អ្នកកាន់វាទាំងកំពុងចាប់កាន់អាហារ ចូលក្នុងបន្ទប់ទឹក។ល។ ហេតុនេះហើយ អ្នកត្រូវតែលាងវាឱ្យបានញឹកញាប់ ជាមួយអាល់កុល ៕
ចុចអាន៖
មិនចង់ស្លាប់មុនអាយុ ត្រូវអនុវត្តទម្លាប់ល្អៗទាំងនេះដើម្បីអាយុវែង រស់បានយូរ
មិនបាច់ពិបាកញ៉ាំដូចជ្រូកទេ! អ្នកស្គមៗអាចធាត់បានដោយភេសជ្ជៈ៥ប្រភេទនេះ