មិនបាច់ពិបាកញ៉ាំដូចជ្រូកទេ! អ្នកស្គមៗអាចធាត់បានដោយភេសជ្ជៈ៥ប្រភេទនេះ

2018-03-30 09:41:48
ចំនួនមតិ 0 | ចំនួនចែករំលែក 0

សម្រាប់អ្នកដែលកំពុងស្វែងរកវិធីឡើងទម្ងន់ ឬអ្នកដែលធ្លាប់តែញ៉ាំយ៉ាងណាក៏មិនធាត់ ហើយចង់មានសាច់មានឈាមដូចគេ ពេលនេះលែងពិបាកទៀតហើយ។ មិនបាច់ទៅខំញ៉ាំដូចជ្រូកទេ គ្រាន់តែចេះធ្វើភេសជ្ជៈប៉ុន្មានមុខខាងក្រោមនេះ ក៏អាចឡើងបាន២ទៅ៣គីឡូក្រាមក្នុងរយៈពេល១ខែ ឱ្យតែអាចខំញ៉ាំឱ្យទៀងទាត់។

កាហ្វេទឹកដោះគោ

ការពិត កាហ្វេខ្មៅអាចជួយសម្រកទម្ងន់បាន ព្រោះតែរសជាតិល្វីងរបស់វា ហើយក្លិនដ៏ឈ្ងុយរបស់វាក៏អាចធ្វើឱ្យនារីៗចូលចិត្តណាស់ដែរ។ ប៉ុន្តែសម្រាប់អ្នកមានរូបរាងស្គម ក៏អាចញ៉ាំកាហ្វេបានដែរ ហើយអាចប្រើដើម្បីបង្កើនទម្ងន់ ដោយគ្រាន់តែបន្ថែមទឹកដោះគោ និងស្ករស២ស្លាបព្រាបាយ ញ៉ាំជាប្រចាំ។

សូកូឡាទឹកដោះគោ

ញ៉ាំភេសជ្ជៈនេះមួយអាទិត្យជាប់គ្នា អ្នកអាចកត់សម្គាល់ការប្រែប្រួលបានខ្លះ។ សូកូឡាទឹកដោះគោ១ពែងមានដល់ទៅ២២០កាល់ឡូរី ច្រើនជាងទឹកដោះគោតែឯង១ពែងដែលមានត្រឹម១៤៩កាល់ឡូរី។ កាល់ឡូរីដែលមានក្នុងសូកូឡាទឹកដោះគោស្មើនឹង១១%នៃថាមពលដែលត្រូវការប្រចាំថ្ងៃ។ ក្រៅពីនេះវាមានជាតិខ្លាញ់៨ក្រាម និងកាបូហាយដ្រាត២៧ក្រាម ដែលលើសទឹកដោះគោធម្មតាដល់ទៅ២ដង។

ចេកក្រឡុក

ការញ៉ាំចេករាល់ថ្ងៃអាចធ្វើឱ្យអ្នកមានអារម្មណ៍ស្រស់ស្រាយ រក្សាលំនឹងជាតិស្ករក្នុងខ្លួន និងកាត់បន្ថយអាការៈស្ត្រេសបាន។ ក្រៅពីនេះ ការញ៉ាំទឹកចេកក្រឡុកជាមួយទឹកដោះគោនឹងជួយឱ្យអ្នកឡើងគីឡូជាមួយនឹងកាល់ឡូរីដែលមានក្នុងភេសជ្ជៈនេះ ហើយក៏មានសុខភាពល្អផងដែរ។

ដូងក្រឡុក

ដូងជាផ្លែឈើដែលសម្បូរទៅដោយជាតិខ្លាញ់និងកាល់ឡូរី ដូច្នេះទើបវាត្រូវបានគេប្រើជារូបមន្តក្នុងការឡើងទម្ងន់របស់នារីៗ។ មិនមែនឱ្យតែពាក្យថា ខ្លាញ់សុទ្ធតែអាក្រក់ទាំងអស់ទេ ព្រោះមានខ្លាញ់ដែលល្អ និងអាក្រក់ដល់សុខភាព។ សម្រាប់អ្នកចង់ឡើងទម្ងន់ មិនមែនញ៉ាំទឹកដូងនោះទេ តែជាខ្ទិះដូងទៅវិញ។ អ្នកអាចញ៉ាំភេសជ្ជៈធ្វើពីដូង ដោយយកទឹកដូងនិងសាច់ដូងក្រឡុកចូលគ្នាបន្ថែមទឹកដោះគោខ្លះផ្អែមល្មម ញ៉ាំជាប្រចាំនឹងឃើញលទ្ធផល។

ទឹកល្ពៅលាយទឹកដោះគោ

ល្ពៅក៏ជាផ្លែឈើដែលមានជីវជាតិចិញ្ចឹមច្រើនណាស់ដែរ។ វាសម្បូរទៅដោយជាតិផូស្វរ ប៉ូតាស្យូម ប្រូតេអ៊ីន ជាតិដែក និងវីតាមីន C។ វាជំនួយដល់ភ្នែក ឆ្អឹងរឹងមាំ ហើយក៏ទាក់ទងនឹងការផ្ដល់ប្រូតេអ៊ីនទៅដល់រាងកាយផងដែរ។ កាលណាញ៉ាំទឹកល្ពៅដោយយកល្ពៅទៅស្ងោរឱ្យឆ្អិន មកក្រឡុកជាមួយទឹកដោះគោស្រស់ បន្ថែមស្ករ និងខ្ទិះដូង អ្នកនឹងបានភេសជ្ជៈដែលមានរសជាតិឈ្ងុយឆ្ងាញ់ហើយអាចជួយអ្នកឡើងទម្ងន់បានទៀតផង៕

ចុចអាន៖ វិធីសម្រកទម្ងន់ទាំង ៨ ដែលអាក្រក់បំផុតចំពោះសុខភាព

ប្រភព៖ Livestrong ប្រែសម្រួល៖ សរ សុគន្ធី