ចង់បានស្នេហាមានភាពរីករាយ យូរអង្វែង អ្នកត្រូវចៀសវាងកំហុសឆ្គង ៥ យ៉ាងនេះ
- 2018-03-23 02:10:00
- ចំនួនមតិ 0 | ចំនួនចែករំលែក 0
ចង់បានស្នេហាមានភាពរីករាយ យូរអង្វែង អ្នកត្រូវចៀសវាងកំហុសឆ្គង ៥ យ៉ាងនេះ
ស្នេហារបស់មនុស្សប្រុសស្រីក្នុងជីវិតពិត តែងតែជួយរឿងរញ៉េរញ៉ៃ ស្មុគស្មាញច្រើនបែបច្រើនយ៉ាង មិនដូចស្នេហាក្នុងភាគកុនឡើយ។ វាត្រូវការភាពអត់ធ្មត់ ប្រឹងប្រែង តស៊ូជម្នះ ប្ដូរផ្ដាច់របស់ភាគីទាំងសងខាង ដើម្បីស្វែងរកសុភមង្គលឲ្យគ្នាទៅវិញទៅមក។ ហេតុនេះប្រសិនចង់ឲ្យស្នេហាមានភាពរីករាយ គង់វង្សយូរអង្វែង ខាងក្រោមនេះជាកំហុសឆ្គង ៥ យ៉ាងដែលអ្នកគួរចៀសវាង៖
១.ខឹង ងងក់ច្រើន
ក្នុងទំនាក់ទំនងស្នេហាប្រសិនម្នាក់ៗចេះមើលចិត្តគ្នាធ្លុះ វាពិតជាប្រសើរខ្លាំងណាស់។ ប៉ុន្តែវាមិនអាចទៅរួចទេ ដូច្នេះរាល់ពេលអ្នកមិនពេញចិត្ត ស្អប់ ខឹង ឬមិនអាចទទួលយកបាននូវទង្វើណាមួយរបស់ដៃគូ អ្នកត្រូវតែនិយាយចេញមក ដើម្បីឲ្យគាត់ដឹងខ្លួន។ ការដែលនៅស្ងៀម មិនស្ដី ឬព្យាយាមដើរចេញ ដើម្បីគេចបញ្ហា គឺជាកាយវិការនាំឲ្យបញ្ហាកាន់តែស្មុគស្មាញលើសដើម។
២.យកការបែកគ្នា មកគំរាមដៃគូ
នៅពេលដែលកំហឹងឡើងដល់ចំណុចកំពូល ជឿថាអ្នកប្រាកដជាពិបាកគ្រប់គ្រងខ្លួនឯងខ្លាំងណាស់។ ទោះជាយ៉ាងណា ការប្រើពាក្យ “បែកគ្នា” ដើម្បីឲ្យដៃគូព្រមចុះចាញ់ខ្លួន គឺជាទង្វើដែលបំផ្លាញជំនឿ និងសេចក្ដីទុកចិត្តបំផុត។ មិនថាអ្នកត្រូវខំធ្មេញ ឬត្រូវរាប់លេខពី ១ ដល់ ១០០ ច្រើនដងប៉ុណ្ណា សូមកុំនិយាយសម្ដីខុសពីចិត្ត ខ្វះការពិចារណាខ្លាំងបែបនេះ ដើម្បីរំសាយភ្លើងទោសៈមួយពេលឲ្យសោះ។
៣.ប្រៀបធៀបស្នេហារបស់ខ្លួន ជាមួយអ្នកដទៃ
អ្នកមិនអាចយកទំនាក់ទំនងអ្នកដទៃមកធ្វើជាស្តង់ដារ ដើម្បីវាយតម្លៃដៃគូ ឬស្នេហារបស់ខ្លួនឡើយ ទោះក្នុងហេតុផលណាមួយក៏ដោយ។ ពេលខ្លះអ្វីដែលអ្នកឃើញគឺត្រឹមតែរូបភាពខាងក្រៅប៉ុណ្ណោះ ដូច្នេះប្រសិនអ្នកយកវាមកកាត់សេចក្ដី រួចទាមទារគ្រប់យ៉ាងឲ្យល្អប្រសើរដូចគេ ច្បាស់ណាស់ថាវាគឺជាទម្លាប់នាំរឿងក្ដៅក្រហាយ បង្កបញ្ហា និងជម្លោះដាក់គ្នាមិនចេះចប់។
៤.ខ្ជិលច្រអូស ធុញនឹងផ្ដល់ក្ដីស្រឡាញ់ឲ្យគ្នា
ស្រឡាញ់គ្នាដំបូង អ្នកប្រហែលជារំភើប ចង់ក្បែរ ចង់ស្និទ្ធស្នាល ចង់ល្អូកល្អិនជាមួយគ្នាគ្រប់ពេល។ អារម្មណ៍ល្អបែបនេះនឹងរលាយបាត់បន្តិចម្ដងៗក្រោយពេលអ្នកស្គាល់គ្នាកាន់តែច្បាស់ និងរស់នៅជិតគ្នាកាន់តែយូរ។ សូមកុំឲ្យភាពខ្ជិលច្រអូសរបស់អ្នក បំផ្លាញសុភមង្គលអ្នកឲ្យសោះ។ ត្រឹមតែការឱប ថើបធម្មតាៗជារៀងរាល់ព្រឹក ឬមុនពេលចូលគេង មិនមែនជារឿងពិបាកធ្វើខ្លាំងនោះទេ។
៥.មិនអើពើធ្វើរឿងសប្បាយៗជាគ្នាឲ្យបានច្រើន
ព្រោះតែរវល់ជាមួយការងារខ្លាំង អ្នកលែងខ្វល់ខ្វាយនឹកនា ចង់កម្សាន្ត ឬលំហែអារម្មណ៍ជាមួយដៃគូ។ ពេលខ្លះត្រឹមតែការអង្គុយមុខទូរទស្សន៍ មើលភាពយន្តបែបកំប្លែងៗ រួចសើចលេងជាមួយគ្នា ក៏ជាសុភមង្គលមួយដែលអ្នកមិនគួរមើលរំលងដែរ។ សូមកុំភ្លេចថាអនុស្សាវរីយ៍ល្អៗទាំងនេះហើយ ដែលជួយពង្រឹងសម្ពន្ធភាពរបស់អ្នកឲ្យកាន់តែរឹងមាំឡើង៕
ចុចអាន៖បើស្រឡាញ់គ្នាយូរទៅមានអារម្មណ៍ថាធុញទ្រាន់ គួរតែធ្វើរឿងទាំងនេះឡើងវិញ