ទង្វើធម្មតាៗរបស់នារី តែបុរសឈ្លក់វង្វេង ទៅណាក៏ភ្លេចមិនបាន

2018-03-17 09:16:58
ចំនួនមតិ 0 | ចំនួនចែករំលែក 0

ប្រុសៗចូលចិត្តនិយាយថា មនុស្សស្រីពិបាកយល់ចិត្ត ប៉ុន្តែមានសកម្មភាពជាច្រើនដែលនារីៗធ្វើទៅកាន់មនុស្សដែលនាងស្រឡាញ់ បានទាក់ចិត្តឱ្យបុរសនោះលង់នឹងនាងកាន់តែជ្រៅ ហើយក៏ជាអ្វីដែលបុរសៗយល់ច្បាស់ផងដែរ។ វាអាចជាគន្លឹះមួយចំនួនជួយដល់នារីៗដែលកំពុងមានស្នេហា ហើយចង់រក្សាចំណងស្នេហ៍ឱ្យកាន់តែរឹងមាំ និងបង្កើនការស្រឡាញ់ពីដៃគូ តាមរយៈទង្វើទាំងអស់ខាងក្រោមនេះ។

ផ្ដេកក្បាលលើទ្រូងគាត់

មនុស្សប្រុសពេញចិត្តខ្លាំងណាស់ នៅពេលសង្សារលូកដៃឱបខ្លួនថ្នមៗ ហើយផ្ដេកក្បាលលើទ្រូង។ ការឱបនេះគឺជាភាពកក់ក្ដៅដែលអ្នកទាំងពីរអាចទទួលបាន ហើយវាក៏ជាសញ្ញាបង្ហាញថា នាងកំពុងជឿជាក់លើខ្លួន និងចង់បានភាពកក់ក្ដៅពីអ្នកដែលនាងស្រឡាញ់ដូចគ្នា។

ធ្វើឱ្យគាត់មានអារម្មណ៍ថាខ្លួនឯងសំខាន់នៅមុខអ្នកដទៃ

គ្មានអ្នកណាចូលចិត្តឃើញមនុស្សដែលខ្លួនស្រឡាញ់មិនអើពើចំពោះខ្លួនទេមែនទេ? បុរសក៏ដូចគ្នា ពួកគេត្រូវការឱ្យអ្នកដែលខ្លួនស្រឡាញ់យកចិត្តទុកដាក់ និងស្និទ្ធស្នាលគ្រប់ទីកន្លែង គ្រប់ពេលវេលា ទោះនៅទីសាធារណៈក៏ដោយ។ ការស្និទ្ធស្នាលនេះត្រឹមតែការកាន់ដៃគ្នា អង្គុយជិតគ្នាជាដើម មិនចាំបាច់ដល់ថ្នាក់ឱបថើបក៏បាន។

តេ ឬផ្ញើសារប្រាប់គាត់ រាល់ពេលអ្នកទៅណាមកណា

សារមួយឃ្លាខ្លី ហើយប្រើពាក្យផ្អែមល្ហែមគឺជាមន្តស្នេហ៍ទន់ចិត្តរបស់នារីចំពោះបុរស។ ជាពិសេសពេលទៅណាមកណា នាងតែងឱ្យដំណឹង គាត់នឹងដឹងថានាងទុកគាត់សំខាន់ ហើយគាត់ក៏តបស្នងមកវិញដូចគ្នា។

ចេះខឹងម្ញ៉ិកម្ញ៉ក់ គួរឱ្យស្រឡាញ់

មិនចាំបាច់សុភាព ផ្អែមល្ហែមគ្រប់ពេលទេ ពេលខ្លះការប្រចណ្ឌ ខឹង ធ្វើម្ញ៉ិកម្ញ៉ក់ខ្លះក៏ធ្វើឱ្យបុរសកាន់តែស្រឡាញ់នាងលើសដើម។ លើកលែងតែការប្រចណ្ឌគ្មានក្បាលកន្ទុយ គ្មានមូលហេតុច្បាស់លាស់ ឬមិនស្ដាប់ការបកស្រាយរបស់គាត់ ទើបអាចធ្វើឱ្យស្នេហានេះបែរជារង្គោះរង្គើទៅវិញ។

យកចិត្តទុកដាក់

បុរសស្រឡាញ់ដកចិត្តមិនរួច ពេលនារីដែលខ្លួនស្រឡាញ់ចេះសួរសុខទុក្ខ ស្ដាប់រឿងរបស់គាត់ មិនថារឿងសប្បាយ ឬកើតទុក្ខ និងចេះលើកទឹកចិត្ត។

សម្លឹងគាត់ដោយក្រសែភ្នែកស្រឡាញ់

មនុស្សដិតដាមអារម្មណ៍នឹងនារីដែលចូលចិត្តលួចសម្លឹងគាត់ដោយក្រសែភ្នែកពោរពេញដោយក្ដីស្រឡាញ់។ គាត់មានអារម្មណ៍អៀន និងរំភើបពេលក្រឡេកប៉ះពេលនាងសម្លឹងមកគាត់ ហើយច្បាស់ជាញញឹមបិទមាត់មិនជិត។ និយាយឱ្យខ្លី ទោះបីបុរសជាមនុស្សរឹងមាំ តែក៏នឹងបាក់ចិត្តទន់ដូចតៅហ៊ូមិនខាន ពេលមានមិត្តស្រីដែលអាចបង្ហាញក្ដីស្រឡាញ់មកគាត់បែបនេះ៕

ចុចអាន៖ មាន ៧ចំណុចនេះ បង្ហាញថាអ្នកពិតសំណាងខ្លាំងដែលមានគាត់ជាសង្សារ

ប្រភព៖ womenbeautyextra ប្រែសម្រួល៖ សរ សុគន្ធី