នារីធុញប្ដីត្រូវព្រះសង្ឃនាំឡើងភ្នំ ទីបំផុតទើបយល់រសជាតិពិតនៃជីវិតគូ

2018-03-15 05:54:00
ចំនួនមតិ 0 | ចំនួនចែករំលែក 0

នារីម្នាក់បាននិយាយរឿងរ៉ាវរបស់ខ្លួនប្រាប់ព្រះសង្ឃមួយអង្គថា ច្រើនឆ្នាំមុន កាលនាងទើបពេញក្រមុំ នាងបានរៀបការជាមួយស្វាមីដែលមានអាយុខុសគ្នាប្រមាណ ១០ឆ្នាំ។ នៅពេលនោះប្ដីរបស់នាងមើលទៅអស្ចារ្យណាស់ក្នុងកែវភ្នែករបស់នាង។ នាងសរសើរនិងលើកតម្កើងប្ដីរបស់ខ្លួនខ្លាំងណាស់ ប៉ុន្តែបន្ទាប់ពីរួមរស់ជាមួយគ្នាមកជាច្រើនឆ្នាំ គេក៏បែរផ្លាស់ប្ដូរ លែងមានភាពអស្ចារ្យគួរឲ្យស្ងើចសរសើរដូចមុន។ នាងបានសួរព្រះតេជគុណថាព្រោះហេតុអ្វី? ឬមួយការរៀបការគឺជាទីបញ្ចប់នៃសេចក្ដីស្រឡាញ់?

រូបតំណាង

ពេលនាងរៀបរាប់ចប់ ព្រះតេជគុណក៏មានសង្ឃដីកាថា “ញោមតាមអាត្មាមក”

ព្រះតេជគុណក៏នាំនាងទៅឈរនៅមុខភ្នំមួយ ហើយសួរថា

“ភ្នំនោះមើលទៅយ៉ាងម៉េចដែរ?

“ធំ ខ្ពស់ ទាក់ភ្នែក ស្រស់ស្អាតមែនទែន” នាងនិយាយ

“អីចឹងមកឡើងភ្នំតាមអាត្មា" ព្រះតេជគុណពោល

នៅតាមផ្លូវគ្មានសំឡេងនិយាយគ្នាអ្វីទាំងអស់ មានតែដើរហើយដើរទៀត។ នាងចាប់ផ្ដើមនឿយហត់អស់កម្លាំង បូកថែមទាំងផ្លូវរដិបរដុបទៀត នាងទប់អារម្មណ៍លែងបាន ក៏ផ្ដើមត្អូញត្អែរ រអ៊ូរនេះនោះមិនឈប់។ ពេលឡើងដល់កំពូលភ្នំ ព្រះតេជគុណក៏ពោល

“ភ្នំនេះហើយគឺជាភ្នំដែលញោមមើលឃើញអម្បាញ់មិញ”

“ភ្នំនេះមិនស្អាតទេ ផ្លូវដើរក៏មានតែដុំថ្ម ដើមឈើអីក៏មិនស្អាត មើលសព្វៗទៅភ្នំខាងនោះស្អាតជាងភ្នំនេះទៅទៀត!" នារីនិយាយ

ព្រះតេជគុណឮដូច្នេះក៏សើច ហើយពោលថា

“ពេលជាសង្សារនឹងគ្នា ក៏ដូចជាការមើលភ្នំពីចម្ងាយ មើលទៅឃើញតែភាពស្រស់ស្អាត ស្រស់ថ្លា តែពេលរៀបការហើយ ក៏ប្រៀបដូចជាការឡើងភ្នំ អ្វីដែលញោមបានឃើញ គឺធម្មជាតិពិតរបស់គ្នាទៅវិញទៅមក។ នៅពេលឡើងដល់កំពូលភ្នំ កែវភ្នែករបស់ញោមក៏ឃើញតែភ្នំដទៃ លែងមើលឃើញភ្នំដែលខ្លួនដើរឡើង ទាំងការពិតភ្នំនោះគ្មានអ្វីផ្លាស់ប្ដូរសោះ ប៉ុន្តែញោមទៅវិញទេដែលផ្លាស់ប្ដូរ។ ព្រោះចិត្តរបស់ញោមផ្លាស់ប្ដូរ អ្វីដែលញោមមើលឃើញក៏ផ្លាស់ប្ដូរ។

នៅពេលអស់ភាពស្ញើចសរសើរ ភ្នំនោះក៏លែងអស្ចារ្យដូចមុន។ ញោមរអ៊ូរទាំច្រើនប៉ុណ្ណា ការខាតបង់ក៏មានច្រើនប៉ុននោះដែរ។ ញោមគិតទៅមើល តើអ្វីដែលធ្វើឲ្យញោមអាចឈរលើកំពូលភ្នំនេះបាន ហើយមើលឃើញភ្នំដទៃ? នេះដោយសារតែញោមកំពុងតែជាន់ពីលើភ្នំមួយនេះ។"

អត្ថបទនេះចង់បង្ហាញឲ្យឃើញពីចក្ខុវិស័យរបស់មនុស្សម្នាក់ៗដែលមានការសម្លឹងឃើញខុសៗគ្នា ទើបមានការយល់ខុសៗគ្នាដែរ ប៉ុន្តែនៅពេលណាដែលយើងជ្រើសរើសសម្លឹងមើលទាំងជ្រុងល្អ និងជ្រុងអាក្រក់ យើងនឹងអាចមើលឃើញពីអត្ថន័យពិតនៃជ្រុងនីមួយៗដោយចិត្តយើងតែម្ដង ៕

ចុចអាន៖

ប្រភព៖ khitpen ប្រែសម្រួល៖ ស្វាយ វ៉ាន់ថន