បើដៃគូតែង Chat លេងជាមួយនារីដទៃ តើអ្នកគួរដោះស្រាយបែបណា?
- 2018-03-14 02:24:31
- ចំនួនមតិ 0 | ចំនួនចែករំលែក 0
បើដៃគូតែង Chat លេងជាមួយនារីដទៃ តើអ្នកគួរដោះស្រាយបែបណា?
បណ្ដាញសង្គមកំពុងជាទីពេញនិយមខ្លាំងសម្រាប់មនុស្សម្នាគ្រប់វ័យនាពេលបច្ចុប្បន្ននេះ។ គូស្នេហ៍ជាច្រើនបានជួប និងស្រឡាញ់ ហើយក៏រៀបការជាមួយគ្នាដោយសារវា ប៉ុន្តែក៏មានគូស្នេហ៍ជាច្រើនដែលបែកបាក់គ្នាវិញព្រោះតែវាដូចគ្នា។ យ៉ាងណាមិញខាងក្រោមនេះជាដំណោះស្រាយ ៥ យ៉ាង ប្រសិនបើអ្នកសង្កេតឃើញថា ថ្មីៗនេះដៃគូរបស់អ្នកតែងតែ Chat លេងជាមួយស្រីៗជាច្រើនតាម Online៖
១.ទាញគាត់ឲ្យនៅឆ្ងាយពីអ៊ីនធឺណិត
បច្ចេកវិទ្យាកាន់តែទំនើប សេវាកម្មអ៊ីនធឺណិតកាន់តែល្អ ល្បឿនកាន់តែលឿន តម្លៃក៏ថោកសមរម្យទៀត ដូច្នេះឲ្យតែមានពេលទំនេរ គាត់ប្រហែលតែងអង្គុយមុខកុំព្យូទ័រ ឬទូរស័ព្ទ ដើម្បីកម្សាន្តអារម្មណ៍ជាមួយការលេងហ្គេម ឬបណ្ដាញសង្គមនានា។ ដើម្បីទាញគាត់ចេញពីទម្លាប់មួយនេះ អ្នកត្រូវឆ្លាត ដោយព្យាយាមបង្កើតការងារមួយចំនួន រួចពឹងគាត់ជួយឲ្យ ធ្វើឲ្យគាត់រវល់ជាមួយកិច្ចការមានប្រយោជន៍ជាច្រើនវិញ។
២.ចំណាយពេលនៅក្បែរគាត់
ទោះជាអ្នករវល់ខ្លាំងប៉ុណ្ណា អ្នកមិនអាចទុកគាត់ចោលគ្រប់ពេលវេលានោះទេ។ មនុស្សប្រុសនឹងស្វែងរកសុភមង្គលនៅកន្លែងផ្សេង ប្រសិនអ្នកមិនអាចផ្ដល់អ្វីៗទាំងនោះឲ្យគាត់បាន។ ដូច្នេះអ្នកគួរឆ្លៀតពេលនៅក្បែរគាត់ឲ្យបានច្រើនដូចជា ទៅមើលកុន ទៅលេងខេត្តឆ្ងាយៗ ឬណាត់គ្នាញ៉ាំអាហារឲ្យបានញឹកញាប់។ នៅពេលគាត់រវល់ជាមួយអ្នក គាត់ក៏គ្មានពេលទៅ Chat លេងជាមួយនារីៗតាម Online នោះទៀតដែរ។
**៣.Chat ជាមួយប្រុសផ្សេងតាម Online**
អ្នកធ្វើបែបនេះ ដើម្បីឲ្យគាត់ដឹងអំពីទោសកំហុសខ្លួនឯង។ ឃើញអ្នក Chat លេងជាមួយប្រុសដទៃផ្ដេសផ្ដាសបែបនេះ ប្រសិនគាត់នៅស្រឡាញ់អ្នកខ្លាំង គាត់ប្រាកដជាខឹង និងប្រចណ្ឌអ្នកជាក់ជាមិនខាន។ ដូច្នេះអ្នកក៏អាចបង្ហាញអារម្មណ៍ដូចគ្នានេះប្រាប់ទៅគាត់ ដើម្បីឲ្យភ្ញាក់រលឹកចំពោះទង្វើខុសឆ្គងរបស់គាត់ និងត្រូវតែបញ្ឈប់ជាបន្ទាន់។
៤.លើកយករឿងនេះមកនិយាយតទល់ផ្ទាល់ជាមួយគាត់
គាត់ប្រហែលមិនទាន់ធ្វើរឿងអ្វីខុសឆ្គងនៅឡើយទេ ប៉ុន្តែអ្នកត្រូវសុំការពន្យល់អំពីមូលហេតុជាក់លាក់ ដែលធ្វើឲ្យគាត់ចំណាយពេលរាប់ម៉ោងChat លេងជាមួយមនុស្សស្រីមិនស្គាល់គ្នាទាំងនោះ។ ប្រាប់គាត់ថា អ្នកពិតជាខ្លាចថាគាត់មិនអាចគ្រប់គ្រងខ្លួនឯងបាន នៅពេលដែលទំនាក់ទំនងនោះកាន់តែជិតស្និទ្ធពីមួយថ្ងៃទៅមួយថ្ងៃ។
៥.តាមដានសកម្មភាពតាម Online គាត់ឲ្យជាប់
អ្នកមិនអាចចេះតែជឿទុកចិត្ត រួចបណ្ដោយខ្លាំង រហូតមិនដែលឆែកមើលម្ដងសោះនោះទេ។ វាមិនមែនជារឿងអាក្រក់ខ្លាំងឡើយ ព្រោះអ្នកគ្រាន់តែចង់ការពារបុរសជាទីស្រឡាញ់ មិនឲ្យស្រីផ្សេងឆក់យកពីអ្នកប៉ុណ្ណោះ។ ប្រសិនការសន្ទនាទាំងនោះត្រឹមជារឿងការងារ ឬមិត្តភាពធម្មតាៗ អ្នកក៏សប្បាយចិត្តទៅ ប៉ុន្តែបើវាលើសពីមិត្ត អ្នកក៏អាចដឹងភ្លាមៗ ដើម្បីដោះស្រាយជាមួយគាត់ទាន់ស្ថានការណ៍ដែរ៕
ចុចអាន៖១០ចំណុចសម្គាល់ថា សង្សារអ្នកលួចមានថ្មី និងដំណោះស្រាយឱ្យអ្នកទីបីខ្ទាតចេញ