ទង្វើ ៣យ៉ាងដែលអ្នកគ្រប់គ្រងគួរធ្វើ ពេលបុគ្គលិកមានជម្លោះផ្ទៃក្នុង

2018-02-25 02:32:19
ចំនួនមតិ 0 | ចំនួនចែករំលែក 0

ដឹកនាំក្រុមដែលមានសមាជិកច្រើននាក់មិនមែនជារឿងងាយស្រួលប៉ុន្មានទេ។ មនុស្សកាន់តែច្រើន គំនិតយោបល់ក៏កាន់តែច្រើន អ្នកខ្លះមានទស្សនៈប្រហាក់ប្រហែលគ្នា ហើយអ្នកខ្លះទៀតក៏មានទស្សនៈផ្ទុយគ្នា ហេតុនេះហើយទើបជម្លោះនៅក្នុងក្រុមតែងតែកើតឡើងជាញឹកញាប់។ យ៉ាងណាមិញ ខាងក្រោមនេះជាទង្វើ៣យ៉ាងដែលថ្នាក់ដឹកនាំគួរធ្វើ ដើម្បីសម្របសម្រួលជម្លោះទាំងនេះ និងជួយពង្រឹងកិច្ចសហការក្នុងក្រុមឲ្យរឹងមាំឡើងវិញ៖

រូបតំណាង

**១. ប្រមូលព័ត៌មានដែលអាចជឿទុកចិត្តបាន**

ជំហានដំបូងបង្អស់ អ្នកត្រូវដឹងពីឫសគល់ពិតប្រាកដនៃជម្លោះនោះជាមុនសិន។ ដូច្នេះអ្នកអាចសួរសាក្សីដែលមើលឃើញជម្លោះនោះផ្ទាល់ភ្នែក ព្រមទាំងហៅបុគ្គលដែលពាក់ព័ន្ធទាំងប៉ុន្មានមកសួរនាំម្នាក់ម្ដងៗ។ នៅពេលអង្គុយស្ដាប់ អ្នកប្រហែលឮពាក្យត្អូញត្អែរ រិះគន់ ព្រមជាមួយកំហឹងជាច្រើនដែលពួកគេមានចំពោះគ្នា ដូច្នេះអ្នកត្រូវប្រើការពិចារណាផ្ទាល់ខ្លួន ដើម្បីស្វែងយល់ពីរឿងហេតុទាំងនោះឲ្យបានត្រឹមត្រូវ និងមិនឲ្យមានភាពលំអៀងឡើយ។

២. អនុវត្តដំណោះស្រាយដែលសម្រេចចេញពីការសម្រេចចិត្តដ៏ហ្មត់ចត់

អ្នកត្រូវសួរភាគីទាំងសងខាងអំពីលក្ខខណ្ឌដែលអាចឲ្យពួកគេពេញចិត្ត និងយល់ព្រមសម្របសម្រួលគ្នាដោយសន្តិវិធី។ ទោះបីជាដំណោះស្រាយនោះមិនទាន់ជាល្អឥតខ្ចោះក៏ដោយ អ្នកត្រូវបញ្ចុះបញ្ចូលពួកគេឲ្យបាន ព្រោះថាពួកគេប្រហែលអាចរកឃើញដំណោះស្រាយថ្មីដែលប្រសើរដោយខ្លួនឯងនៅកំឡុងពេលនៃការព្យាយាមនោះ។ ដាច់ខាតសូមកុំប្រើដំណោះស្រាយ “បំបែក” ឲ្យសោះ។ ឲ្យពួកគេទៅធ្វើការផ្សេង និងឆ្ងាយពីគ្នាគឺគ្រាន់តែជាវិធីគេចវេសបញ្ហាមួយពេលប៉ុណ្ណោះ។

៣. ឧស្សាហ៍តាមដានអំពីលទ្ធផល

ក្រោយពីបញ្ចប់វគ្គសម្រុះសម្រួល ដោយឲ្យភាគីទាំងសងខាងប្ដេជ្ញាចិត្ត ទទួលយកដំណោះស្រាយរួចរាល់ហើយ អ្នកមិនអាចទុកចិត្តខ្លាំងរហូតឈប់ខ្វល់ខ្វាយ ឬអើពើនោះទេ។ អ្នកត្រូវតែឧស្សាហ៍តាមដានពួកគេឲ្យបានជាប់លាប់។ ការធ្វើបែបនេះមិនត្រឹមតែជួយឲ្យអ្នកដឹងថាតើដំណោះស្រាយនោះមានប្រសិទ្ធភាពឬអត់ តែវាថែមទាំងជួយឲ្យអ្នករកឃើញវិធីថ្មីដើម្បីបញ្ចៀសជម្លោះនៅថ្ងៃក្រោយបានទៀតផង ៕

ប្រភព៖ success ប្រែសម្រួល៖ អូន បញ្ញា