មិនចង់ឲ្យកូនល្ងង់ និងរីកចម្រើនយឺត កុំឲ្យពួកគេញ៉ាំអាហារអស់នេះ ញឹកឲ្យសោះ

2018-02-06 11:00:26
ចំនួនមតិ 0 | ចំនួនចែករំលែក 0

រឿងអាហារគឺជារឿងសំខាន់សម្រាប់ក្មេងតូច ព្រោះប្រសិនបើឲ្យកូនញ៉ាំអាហារដែលមិនល្អ គ្មានជីវជាតិ នោះក៏អាចធ្វើឲ្យពួកគេមានការរីកចម្រើនយឺត ជាងអាយុបាន។ ជាក់ស្ដែង តាមការស្រាវជ្រាវ អាហារប៉ុន្មានយ៉ាងខាងក្រោមនេះត្រូវបានគេចាត់ទុកជាអាហារគ្រោះថ្នាក់ដែលអាចធ្វើឲ្យក្មេងចុះខ្សោយខ្លាំងផ្នែកប្រាជ្ញាស្មារតី ប្រសិនបើអ្នកឲ្យពួកគេញ៉ាំជាទម្លាប់។

១. នំ ឬស្ករគ្រាប់ដែលមានជាតិស្ករច្រើន

ការឲ្យក្មេងទទួលទាននំផ្អែម ឬស្ករគ្រាប់ដែលមានជាតិស្ករច្រើន ក្រៅពីនឹងធ្វើឲ្យកូនធាត់លើសគីឡូហើយ ជាតិស្ករទាំងអស់នោះក៏មានចំណែកក្នុងការបំផ្លាញខួរក្បាលក្មេងតូចបានដែរ។ ការសិក្សាបានបង្ហាញថា ក្មេងដែលញ៉ាំជាតិស្ករច្រើន នោះនឹងមានការប៉ះពាល់ដល់ការបញ្ចេញអាំងស៊ុយលីន ដែលនឹងធ្វើឲ្យខួរក្បាលដំណើរការមិនបានល្អ។

២. អាហារ Fast Food

អាហារ Fast Food ឬម្យ៉ាងទៀតហៅថា Junk Food គឺជាអាហារគ្មានតម្លៃអាហារូបត្ថម្ភ មានសារធាតុចិញ្ចឹមមិនគ្រប់គ្រាន់។ ក្រៅពីនោះអាហារខ្លះមានសារធាតុជួយឲ្យទុកបានយូរ ឬមានជាតិសូដ្យូមច្រើនពេល ដែលអាចផ្ដល់ទុក្ខទោសដល់រាងកាយ ដូចជាបង្កឲ្យធាត់ ទឹកនោមផ្អែម លើសឈាម រោគតម្រងនោម និងរោគបេះដូងបាន។ រីឯក្មេងដែលកំពុងស្ថិតក្នុងវ័យលូតលាស់ បើបរិភោគអាហារទាំងអស់នេះច្រើនពេក នោះនឹងធ្វើឲ្យក្មេងទទួលបានសារធាតុចិញ្ចឹមមិនគ្រប់គ្រាន់សម្រាប់ការវិវត្តខួរក្បាល ដែលនឹងប៉ះពាល់ដល់ការសិក្សារៀនសូត្ររបស់កូនក្នុងរយៈពេលវែង។

៣. អាហារបង្កក ឬអាហារញ៉ាំភ្លាមៗ

អាហារចម្អិនញ៉ាំភ្លាមៗ ដូចជាមីកញ្ចប់ អាហារកំប៉ុង ឬអាហារដែលក្លាសេកកហើយយកមកកម្ដៅញ៉ាំបានភ្លាមនោះក៏ជាអាហារដែលមិនគួរឲ្យក្មេងតូចទទួលទានញឹកញាប់ដែរ ព្រោះអាហារទាំងអស់នេះមានសារធាតុគីមីដែលជួយឲ្យទុកបានយូរ ហើយក្រៅពីសារធាតុគីមីហើយ អាហារទាំងអស់នេះក៏មិនមានសារធាតុចិញ្ចឹមសម្រាប់រាងកាយមនុស្សដែរ។ ប្រសិនបើឲ្យក្មេងញ៉ាំច្រើន វានឹងប៉ះពាល់ដល់ប្រព័ន្ធប្រសាទក្មេង និងបង្កើនហានិភ័យនៃការកើតជំងឺខ្សោយខួរក្បាលនៅពេលពួកគេពេញវ័យ។

៤. សាច់ច្នៃ

សាច់សត្វគឺជាប្រភពអាហារដែលសម្បូរទៅដោយប្រូតេអ៊ីនខ្ពស់ ដែលនឹងផ្ដល់ផលប្រយោជន៍ដល់រាងកាយ ប៉ុន្តែអ្នកគួរបរិភោគសាច់ដែលមានគុណភាព និងមិនឆ្លងកាត់ការកែច្នៃ។ សាច់កែច្នៃត្រង់នេះសំដៅលើអាហារមួយចំនួនដូចជា សាច់ក្រក ហតដក ឬហេម មួយចំនួនដែលមានការបញ្ចូលសារធាតុគីមីដើម្បីបម្លែងអាហារ ដូចសារធាតុធ្វើឲ្យអាហារទុកបានយូរ និងសូដ្យូម។ ប្រសិនបើឲ្យកូនញ៉ាំញឹកញាប់ នឹងមានផលប៉ះពាល់ដល់ប្រព័ន្ធប្រសាទ ការសិក្សា និងការចងចាំរបស់គេ។

៥. តែនិងកាហ្វេ

ជាធម្មតាឪពុកម្ដាយភាគច្រើនមិនឲ្យកូនដែលមិនទាន់ដល់អាយុចូលរៀនផឹកតែ ឬកាហ្វេស្រាប់ទៅហើយ ប៉ុន្តែសម្រាប់អាណាព្យាបាលដែលគិតចង់ឲ្យក្មេងសាកផឹកភេសជ្ជៈទាំងនេះសូមបញ្ឈប់ជាបន្ទាន់ ព្រោះជាតិកាហ្វេអ៊ិនក្នុងតែនិងកាហ្វេនឹងជះឥទ្ធិពលដល់ប្រព័ន្ធប្រសាទ ធ្វើឲ្យពួកគេគេងមិនលក់ ហើយក៏ជះឥទ្ធិពលផ្ទាល់ទៅដល់ការវិវត្តខួរក្បាលរបស់ក្មេង ព្រមទាំងរាំងស្ទះដល់ការស្រូបយកជាតិដែកក្នុងចរន្តឈាម ដើម្បីបញ្ជូនអុកស៊ីហ្សែនទៅកាន់ខួរក្បាលទៀតផង។

ក្រៅពីអាហារទាំងនេះ កត្តារួមផ្សំផ្សេងៗទៀតដែលអាចធ្វើឲ្យក្មេងខ្សោយផ្នែកប្រាជ្ញាស្មារតីនេះដែរមានដូចជា៖

១. ក្មេងញ៉ាំអាហារមិនគ្រប់ទាំង ៥ក្រុម

២. បរិយាកាសរស់នៅរងការបំពុលផ្សេងៗ

៣. ក្មេងខ្វះទំនាក់ទំនងជាមួយសង្គម ឬសមាជិកគ្រួសារ

៤. ក្មេងមានបញ្ហាផ្លូវចិត្ត

យ៉ាងណាក៏ដោយ ការឆ្លាតវៃរបស់កូននេះគឺអាស្រ័យមួយផ្នែកធំលើការចិញ្ចឹមអប់រំរបស់ឪពុកម្ដាយ។ សូមកុំអាក់អន់ចិត្តដែលនៅថ្ងៃនេះកូនរបស់យើងមិនពូកែ ឬមិនឆ្លាត ព្រោះប្រសិនបើអ្នកជាឪពុកម្ដាយចិញ្ចឹមពួកគេដោយក្ដីស្រឡាញ់ និងយកចិត្តទុកដាក់ ភាពឆ្លាតរបស់កូននឹងវិវត្តប្រសើរឡើងបាននៅទីបំផុត ៕

ប្រភព៖ theasianparent ប្រែសម្រួល៖ ស្វាយ វ៉ាន់ថន