ទូច ស្រីល័ក្ខណ៍ បង្ហើបតិចនិកថែទាំកូនឲ្យមានសុខភាពល្អ និងឈ្លាសវៃ

2018-01-30 02:27:19
ចំនួនមតិ 0 | ចំនួនចែករំលែក 0

កូនៗមានសុខភាពល្អ រាងកាយលូតលាស់ និងប្រាជ្ញាឈ្លាសវៃ គឺជាអ្វីដែលម្ដាយឪពុកគ្រប់រូបប៉ងប្រាថ្នា។ ការចិញ្ចឹមកូនតូចឲ្យមានសុខភាពរឹងមាំទាំងស្មារតីនិងរាងកាយ តម្រូវឲ្យមាតាបិតាមានការយល់ដឹងច្រើនពីរបបអាហារ ការអប់រំ និងពេលវេលាលំហែ។ ម៉្យាងទៀត អ្វីដែលកូនតូចត្រូវការខ្លាំងគឺពេលវេលានិងភាពស្និទ្ធស្នាលពីម្ដាយឪពុកនេះតែម្ដង។

តួយ៉ាងអ្នកនាង ទូច ស្រីល័ក្ខណ៍ ទោះការងារសិល្បៈច្រើនប៉ុណ្ណា ក៏នាងនៅតែឆ្លៀតពេលវេលានៅជាមួយកូន ដើម្បីថែទាំនិងអប់រំឲ្យបានដិតដល់។ ក្នុងបទសម្ភាសន៍ជាមួយកញ្ញា ទូច ស្រីលក្ខណ៍បានបញ្ជាក់ថា៖ "ឆ្នាំនេះកូនបង អាយុ៣ឆ្នាំកន្លះហើយ តាំងពីកើតមករហូតដល់ពេលនេះ គឺបងជាអ្នកមើលថែគេដោយផ្ទាល់តែម្ដង។"

តារាស្រីរាងខ្ពស់ស្រឡះរូបនេះបន្ថែមថា៖ "របៀបមើលថែទាំកូនរបស់បង គឺសង្កត់ធ្ងន់ទៅលើរបបអាហាររបស់គេ ធ្វើយ៉ាងណាឲ្យមានវីតាមីននិងប្រូតេអ៊ីនគ្រប់គ្រាន់។ ជាទូទៅអាហារ ៣ពេលរបស់គេមាន ពេលព្រឹក ទឹកដោះគោស្រស់មួយកែវលាយជាមួយចេក ១ផ្លែ។ ថ្ងៃត្រង់ញ៉ាំបាយជាមួយសាច់ត្រី ឯល្ងាចបាយជាមួយសាច់មាន់អីជាដើម។" នាងបានបញ្ជាក់ថា នាងតែងប្រដៅកូនឲ្យចេះសុំការអនុញ្ញាត មុននឹងញ៉ាំនំចំណីផងដែរ ហើយដាក់កំណត់ថ្ងៃឲ្យគេញ៉ាំចំណីដូចជាសូកូឡា និងការ៉េមពេលចុងសប្ដាហ៍តែប៉ុណ្ណោះ។

ចំពោះការអប់រំវិញ នាងបានបញ្ជូនកូនទៅរៀនភាសាខ្មែរពេលព្រឹក និងរៀនអង់គ្លេសពេលល្ងាច។ នាងតែងជូនកូននិងទុកពេលរសៀលឲ្យគេលេងជាមួយមិត្តភក្តិគេក្រោយចប់ម៉ោងរៀន។ ចំណែកចុងសប្ដាហ៍គឺ នាងតែងតែធ្វើដំណើរកម្សាន្តជុំគ្រួសារ ដើម្បីមានពេលវេលាសម្រាកលំហែជាមួយគ្នា។