វាជាការប្រសើរណាស់បើមនុស្សយើងអាចរស់នៅដោយមិនច្រណែនឈ្នានីសគ្នា

2018-01-16 05:41:00
ចំនួនមតិ 0 | ចំនួនចែករំលែក 0

ការច្រណែនជាញឹកញាប់ត្រូវបានគេមើលឃើញថាជាអារម្មណ៍អវិជ្ជមានឬមានចរិតលក្ខណៈអាក្រក់។ ជាទូទៅវាមានន័យស្រដៀងនឹងសកម្មភាពដូចជា សងសឹក ឬពិសពុលជាដើម។ សេណារីយ៉ូ រ៉ូមែនទិច មួយបាននិយាយថា៖ គំនិតអ្នកដែលច្រណែននឹងដៃគូរបស់ពួកគេ គឺពេលដែលគេទៅនិយាយជាមួយមនុស្សម្នាក់ទៀត។ ឬប្រហែលជាអ្នកឃើញនរណាម្នាក់ផ្សេងទៀត មានអ្វីមួយដែលអ្នកចង់បានយ៉ាងខ្លាំង ប៉ុន្តែអ្នកមិនមាន។

រូបតំណាង

ការច្រណែនពេលខ្លះអាចនាំយើងធ្វើការសម្រេចចិត្តខុស និងសោកស្ដាយនៅពេលក្រោយ ឬយ៉ាងហោចណាស់ធ្វើឱ្យយើងក្លាយទៅជាមនុស្សអាក្រក់ និងរស់នៅមិនបានស្រួលខ្លួន។ ការប្រាថ្នាចង់បានអ្វីមួយដែលយើងមិនមាន អាចធ្វើឱ្យយើងមានអារម្មណ៍ និងការតាំងចិត្តដើម្បីទទួលអ្វីដែលយើងចង់បាន។

ដូច្នេះតើយើងអាចមើលពីភាពច្រណែនខុសគ្នាបានទេ? តើវាពិតជារឿងល្អទេក្នុងការមានអារម្មណ៍ច្រណែន? តើយើងអាចប្រើការច្រណែននិងឈ្នានីសគ្នាដើម្បីជាផលប្រយោជន៍របស់យើងវិញបានទេ?

រូបតំណាង

នៅពេលដែលអ្នកចាប់ផ្ដើមមានអារម្មណ៍ច្រណែន ពេលនោះត្រួចរបស់ការឈ្នានីសក៏ចាប់ផ្ដើមលូតចេញមក ហើយបើអ្នកមិនព្រមបញ្ឈប់អារម្មណ៍បែបនេះទេ វានឹងឈានទៅរកការរុករួន ធ្វើបាបគេដើម្បីខ្លួនឯង។

ដើម្បីបង្ក្រាបអារម្មណ៍នេះ អ្នកអាចកំណត់ការចង់បានរបស់អ្នកក្នុងលក្ខណៈសមរម្យ ហើយចាប់ផ្ដើមមើលពីខ្លួនឯងក្នុងតម្លៃដ៏ប្រណិតមួយ។ ក្រៅពីនេះអ្នកចាប់ផ្ដើមបើកចិត្តទទួលយកការពិតពីអ្វីដែលអ្នកមាន ហើយច្នៃវាទៅតាមការស្រមៃរបស់អ្នក។

បើសិនជាអ្នកបានឃើញអ្នកដទៃស្អាត ឆ្លាត និងរៀនពូកែ សូមកុំឲ្យអារម្មណ៍ច្រណែននោះលេចចេញមកអី តែត្រូវបា្រប់ខ្លួនថាត្រូវធ្វើឲ្យខ្លួនឯងល្អជាងនេះ ស្អាតជាងនេះ និងពូកែជាងនេះ ដោយមិនទៅបៀតបៀនគេ។

ការចង់បាន ការពេញចិត្តនូវរបស់គេនេះហើយដែលជាដើមទងធ្វើឲ្យមានអារម្មណ៍បែបនេះកើតឡើង ប៉ុន្តែបើអ្នកបង្វែរការចង់បាន ការពេញចិត្តនោះទៅជាកម្លាំងជំរុញចិត្តឲ្យខ្លួនខំប្រឹងប្រែងវិញ នោះទើបជាអំណោយដ៏អស្ចារ្យបំផុតក្នុងជីវិត។

រូបតំណាង

កុំបណ្ដោយឲ្យការច្រណែនឈ្នានីសគ្របដណ្ដប់លើចិត្តអ្នក ហើយឆ្ពោះទៅបំផ្លាញអ្នកឲ្យសោះ។ វាជាការល្អណាស់បើមនុស្សយើងអាចរស់នៅដោយមិនច្រណែនឈ្នានីសគ្នា ព្រោះគ្រប់គ្នានឹងអាចគេងលក់យ៉ាងស្កប់ស្កល់៕

ចុចអាន៖រៀនធ្វើឲ្យជីវិតរឹងមាំ និងមានក្ដីសុខតាមវិធីទាំងនេះ

ប្រភព៖ lifehack ប្រែសម្រួល៖ ផេង ផលធិតា