ដឹងហើយត្រូវចៀស... មូលហេតុ ៦យ៉ាងដែលធ្វើឲ្យអ្នកកើតមុនខ្នង មិនងាយជា

2018-01-02 06:25:06
ចំនួនមតិ 0 | ចំនួនចែករំលែក 0

ចង់ស្លៀកឈុតវាលខ្នងឲ្យសិចស៊ីនឹងគេម្ដង ប៉ុន្តែស្បែកខ្នងដែលកើតមុនក៏ធ្វើឲ្យអស់ភាពជឿជាក់រលីង។ ប្រិយមិត្តទាំងឡាយដែលមានបញ្ហាមុនខ្នងនេះ សាកល្បងមកមើលមូលហេតុ ៦យ៉ាងដែលបង្កឲ្យកើតមានបញ្ហាមុនខ្នងខាងក្រោមនេះ ដើម្បីអាចជៀសវាង និងទទួលការព្យាបាលយ៉ាងមានប្រសិទ្ធភាព៖

១. សារធាតុគីមីពីសាប៊ូកក់សក់

នារីៗដែលកើតមុនខ្នងមើលមិនជា អាចបណ្ដាលមកពីហេតុផលច្រើនយ៉ាង ប៉ុន្តែហេតុផលមួយដែលអ្នកត្រូវស្វែងយល់នោះគឺ សាប៊ូកក់សក់ដែលអ្នកប្រើរាល់ថ្ងៃ ដែលអាចមានសារធាតុគីមីណាមួយបង្កឲ្យមានប្រតិកម្ម ឬធ្វើឲ្យកើតមុនខ្នង។ ដំណោះស្រាយនោះគឺ អ្នកត្រូវសាកល្បងផ្លាស់ប្ដូរវិធីកក់សក់ ពីការឈរកក់សក់ធម្មតា មកជាឈរឱនក្បាលចុះហើយព្យាយាមកុំឲ្យសាប៊ូហូរទៅខ្នង ឬក៏ផ្លាស់ប្ដូរសាប៊ូយកសាប៊ូណាដែលមិនសូវប្រតិកម្មក៏បាន។

២. មិនងូតទឹកក្រោយហាត់ប្រាណ

សម្រាប់អ្នកដែលចូលចិត្តមើថែខ្លួនឯងដោយការហាត់ប្រាណជាប្រចាំ ក៏អាចមានបញ្ហាកើតមុនខ្នងដែរ ដូច្នេះអ្វីដែលត្រូវយកចិត្តទុកដាក់នោះគឺ ការសម្អាតរាងកាយរាល់ពេលក្រោយហាត់ប្រាណ ព្រោះញើសដែលចេញមកអាចធ្វើឲ្យកើតបាក់តេរីនៅបរិវេណខ្នង។ គួរសម្រាកមួយសន្ទុះឲ្យបាត់ហត់សឹមងូតទឹក ប៉ុន្តែមិនត្រូវទុកចោលដល់កន្លះថ្ងៃ ឬមួយយប់នោះទេ។

៣. សម្លៀកបំពាក់មិនស្អាត

សម្លៀកបំពាក់គឺជាបច្ច័យសំខាន់នៃការបង្កឲ្យកើតមុនខ្នងដូចគ្នា។ ស្លៀកសម្លៀកបំពាក់ស្អាត ផ្លាស់ប្ដូរជាប្រចាំ នឹងជួយចៀសវាងបញ្ហាមុនខ្នងបាន ឬនៅពេលបោកខោអាវ គួរលាងជម្រះជាតិសាប៊ូឲ្យអស់ ដើម្បីចៀសវាងការប្រតិកម្មម្សៅសាប៊ូ។

៤. អ័រម៉ូន

បញ្ហាអ័រម៉ូន អ្នកណាក៏មិនអាចទប់ស្កាត់បានដែរ ជាពិសេសក្នុងវ័យជំទង់ ការកើតមុនចាត់ទុកថាជារឿងធម្មតា។ ដូច្នេះអ្នកគួរមើលថែខ្លួនដោយការសម្អាតរៀងកាយឲ្យបានទៀងទាត់ ចៀសវាងការបរិភោគជាតិខ្លាញ់ ឬអាហារចៀន ឬបំពងខ្លាញ់។ បើវាធ្ងន់ធ្ងរមែនទែន អ្នកគួរទៅប្រឹក្សាជាមួយគ្រូពេទ្យល្អជាង។

៥. ប្រតិកម្មញើស

ការប្រតិកម្មញើសគឺជារឿងគួរឲ្យពិបាកចិត្តមួយសម្រាប់នារីជាច្រើន ព្រោះញើសនិងរាងកាយមនុស្សគឺនៅជាមួយគ្នា ហើយបើកាន់តែត្រូវបញ្ចេញកម្លាំងខ្លាំងៗ និងអាកាសធាតុកាន់តែក្ដៅទៀតញើសចេញកាន់តែច្រើន ដែលជាមូលហេតុធ្វើឲ្យពួកគេងាយនឹងកើតមុនខ្នង។ ដំណោះស្រាយគឺអ្នកត្រូវឧស្សាហ៍ពាក់អាវវាលៗ និងស្ដើងៗដើម្បីកុំឲ្យមានញើសច្រើន និងងូតទឹកឲ្យបានច្រើន។

៦. ការត្រដុសខ្នងខ្លាំងៗ

នៅពេលងូតទឹក ប្រិយមិត្តជាច្រើនអាចនឹងត្រូវត្រដុសបរិវេណខ្នង ដែលការត្រដុសនេះគួរតែធ្វើឡើងថ្នមៗ កុំធ្វើវាខ្លាំងៗពេក ហើយកុំប្រើឧបករណ៍ដែលកកិតខ្លាំង ព្រោះវាអាចធ្វើឲ្យស្បែកខ្នងរលាក មិនរលោងស្អាត និងកើតមុនខ្នងបាន ៕