អ្នកជំនាញមិនគាំទ្រតិចនិកសម្រកទម្ងន់ ៤៥គីឡូរបស់ Adele
- 2021-10-14 16:00:00
- ចំនួនមតិ 0 | ចំនួនចែករំលែក 0
អ្នកជំនាញមិនគាំទ្រតិចនិកសម្រកទម្ងន់ ៤៥គីឡូរបស់ Adele
អ្នកជំនាញផ្នែកសុខភាពបានឲ្យដឹងថា ការហាត់ប្រាណមួយថ្ងៃ២ ទៅ៣ដងដូចកំពូលតារាចម្រៀងអង់គ្លេស Adele អាចធ្វើឲ្យឆ្អឹង និងប្រព័ន្ធភាពស៊ាំចុះខ្សោយ។
កាលពីថ្ងៃទី ១២ ខែតុលាកន្លងទៅនេះ បណ្ដាញព័ត៌មាន New York Post បានបញ្ចេញមតិពាក់ព័ន្ធនឹងវិធីសម្រកទម្ងន់របស់តារាចម្រៀងស្រីជួរមុខអង់គ្លេស Adele។ តាមនោះដែរ នៅក្នុងបទសម្ភាសន៍ជាមួយទស្សនាវដ្ដី Vogue មុននេះ អ្នកម្ដាយកូន១បានឲ្យដឹងថា ខ្លួនហាត់ប្រាណលើស២ដងក្នុងមួយថ្ងៃ រួមមានលើកអាល់ទែពេលព្រឹក រត់នៅពេលល្ងាច និងហាត់ Cardio នៅពេលយប់។
“រក្សាទម្លាប់ហាត់ប្រាណគឺជាការល្អ ប៉ុន្តែហាត់ប្រាណមួយថ្ងៃពី ២ទៅ ៣ដងគឺច្រើនពេកហើយ” John Whyte អ្នកជំនាញសុខភាពរបស់បណ្ដាញព័ត៌មាន WebMD ប្រាប់ទៅកាន់ New York Post។ អ្នកជំនាញដដែលនេះបានឲ្យដឹងថា នៅពេលហាត់ប្រាណលើសកម្រិតអាចធ្វើឲ្យប៉ះពាល់ដល់រាងកាយ។ ដូចនេះប្រសិនបើយើងមិនទុកឲ្យរាងកាយសម្រាកបានគ្រប់គ្រាន់មុនពេលហាត់ប្រាណម្ដងទៀត នោះនឹងធ្វើឲ្យឆ្អឹង និងប្រព័ន្ធភាពស៊ាំចុះទាប។
នៅក្នុងបទសម្ភាសន៍ដដែល ម្ចាស់បទ Hello បានប្រាប់ថាខ្លួនបានសម្រកអស់ ៤៥គីឡូក្នុងរយៈពេល២ឆ្នាំ ដោយភាគច្រើនគឺស្រកដោយសារហាត់ប្រាណ ត្បិតនាងមិនសូវតមអាហារឡើយ៕