តារាសម្ដែងស្រីចិន ថតរឿងពស់ស នៅវ័យ៦៧ឆ្នាំ សម្រស់ក្មេងសុំខ្មាស់

2021-07-08 03:00:00
ចំនួនមតិ 0 | ចំនួនចែករំលែក 0

ក្រោយសម្ដែងតួឯកក្នុងរឿងពស់ស ពស់ខៀវកាលពី៣០ឆ្នាំមុនហើយ កំពូលតារាសម្ដែងស្រីចាស់វស្សាចិន Angie Chiu ត្រលប់មករ៉ាប់រងតួនេះសារជាថ្មីក្នុងកម្មវិធីមួយ។

កាលពីថ្ងៃទី ៦ ខែកក្កដាកន្លងទៅនេះ បណ្ដាញព័ត៌មាន Sina បានរាយការណ៍ថា កំពូលតារាសម្ដែងជួរមុខចិន Angie Chiu នឹងមានវត្តមាននៅក្នុងកម្មវិធី The Detective’s Adventure នៅភាគបន្ទាប់។ នៅក្នុងកម្មវិធីនេះដែរ សិល្បការិនីវ័យ ៦៧ឆ្នាំ នឹងសម្ដែងតួអង្គពស់ស ដែលធ្លាប់ធ្វើឲ្យខ្លួនល្បីឈ្មោះកាលពី ៣០ឆ្នាំមុន។ តាមនោះដែរ រឿងពស់ខៀវដែល Angie សម្ដែងត្រូវបានចាក់ផ្សាយតាំងពីឆ្នាំ ១៩៩១មកម្ល៉េះ។

នៅពេលរឿងចាក់ផ្សាយនៅឆ្នាំ ១៩៩១ ស្រីស្អាតរូបនេះមានវ័យ ៣៧ឆ្នាំរួចទៅហើយ។ មនុស្សជាច្រើនធ្លាប់សង្ស័យថា នាងមិនស័ក្ដិសមនឹងតួនេះ ត្បិតមានអាយុជ្រេពេក ដោយធម្មតាតួពស់ស មានអាយុត្រឹមម្ភៃជាងប៉ុណ្ណោះ។ យ៉ាងណាក៏ដោយ នៅពេលរឿងចាក់ផ្សាយផ្លូវការ គឺទទួលបានជោគជ័យលើសការរំពឹងទុក ធ្វើឲ្យតារាស្រីកើតឆ្នាំ ១៩៥៤ ក្លាយជាតារាលំដាប់ A នៅពេលនោះ។

ក្រោយពេលរូបភាព អ្នកនាង ត្រូវបានបញ្ចេញសារជាថ្មី មនុស្សជាច្រើនស្ទើរតែមិនជឿថា ក្រោយ៣០ឆ្នាំ សម្រស់របស់តារាអាយុ ៦៧ឆ្នាំនៅតែក្មេងជាងវ័យ មិនប្លែកពីពេលនាងសម្ដែងរឿងដដែលនេះ កាលពីឆ្នាំ១៩៩១ឡើយ៕

ប្រភព៖ news.zing.vn ប្រែសម្រួល៖ Caramel