ទ្រព្យសម្បត្តិរាប់សិបលានដុល្លារបស់ សាន់ឆាយ មុនពេលរៀបការ និងពេលបែកបាក់ស្វាមី

2021-06-09 04:10:00
ចំនួនមតិ 0 | ចំនួនចែករំលែក 0

មុនពេលរៀបការនឹងស្វាមីដែលជាអ្នកប្រុស កូនមហាសេដ្ឋីមានទ្រព្យស្ដុកស្ដម្ភ តារាសម្ដែងស្រីតៃវ៉ាន់ Barbie Hsu គឺជាសិល្បករដែលមានទ្រព្យច្រើនរួចទៅហើយ តែមង្គលការដែលនាងគិតថាជាសុបិនក្លាយជាការពិតនេះ បានធ្វើឲ្យនាងខ្សត់ទ្រព្យទៅវិញ។

កាលពីថ្ងៃទី ៦ ខែមិថុនាមុននេះ កំពូលតារាសម្ដែងស្រីតៃវ៉ាន់ Barbie Hsu បានធ្វើឲ្យអ្នកគាំទ្រភ្ញាក់ផ្អើលជាខ្លាំង ដោយនាងបានដាក់ពាក្យលែងលះស្វាមីដែលជាលោក Wang Xiaofei ដោយឯកត្តោភាគី។ នាងមិនបាននិយាយអ្វីច្រើនឡើយ គឺគ្រាន់តែថា គ្រប់ឯកសារទាំងអស់គឺកំពុងរៀបចំហើយ។ ស្វាមីរបស់តួរឿង F4 បានឲ្យដឹងថា មុននោះមួយថ្ងៃ លោក និងនាងបានឈ្លោះគ្នាហើយលោកបានប្រើសម្ដីធ្ងន់លើនាង។

មនុស្សជាច្រើនបានលើកឡើងថា ស្រីស្អាតអាយុ ៤៥ឆ្នាំរូបនេះ រៀបការព្រោះតែលុយរបស់ប្ដី តែគេមិនដឹងឡើយថា មុននោះដែរ នាងក៏ជាអ្នកមាន ហើយក្រោយរៀបការគឺទ្រព្យរបស់នាងមានតែស្រកចុះ។ មុនរៀបការ តួរឿងស្នេហាបួនដួង មានអចលនទ្រព្យ២កន្លែងនៅទីក្រុងតៃប៉ិ កោះតៃវ៉ាន់ដែលមានតម្លៃសរុប១២លានដុល្លារ។ ក្រោយរៀបការ នាងទទួលបានកុងត្រាពាណិជ្ជកម្ម ១០ដែលមានតម្លៃសរុប ៤.៧៥លានដុល្លារ។ បន្ទាប់មកទៀត នាងបានរើចូលនៅផ្ទះតម្លៃ១២ដុល្លារជាមួយស្វាមី។

ដូចនេះហើយ នាងមានទ្រព្យតម្លៃយ៉ាងតិច អចលនទ្រព្យចំនួន ៣។ យ៉ាងណាក្ដី ក្រោយពេលរៀបការ ជាពិសេសគឺឆ្នាំ២០១៥ នៅពេលគ្រួសារប្ដីរបស់នាងត្រូវបានគេបង្កកទ្រព្យ ដោយសារត្រូវគេឃើញថារកស៊ីមិនប្រក្រតី។ នៅពេលនោះ បណ្ដាញព័ត៌មាននានាបានរាយការណ៍ថា សិល្បការិនីរូបនេះបានយំឡើងសន្លប់។

នៅឆ្នាំ២០២០ ដោយសារតែកូវីដ១៩ ប្ដីរបស់នាងរឹតតែឡុងចុង ព្រោះថ្លៃជួលសណ្ឋាគារមួយខែ ១លានដុល្លារ ធ្វើឲ្យលោកខាតយ៉ាងច្រើន។ មកទល់ពេលនេះ គឺសាន់ឆាយនេះហើយ ដែលត្រូវលក់ផ្ទះ២ខ្នងរបស់ខ្លួន ដើម្បីឲ្យប្ដីធ្វើដើម។ ដោយសារនៅតែខ្វះខាត នាង និងប្ដីត្រូវទៅថតកម្មវិធីទូរទស្សន៍ តែដោយសារប្ដីនាងមិនសូវចេះនិយាយធ្វើឲ្យទស្សនិកជនមិនចង់មើលឡើយ។

អាចនិយាយបានថា ក្រោយរៀបការ ខុសពីអ្វីដែលនាងរំពឹងទុក ដែលគិតថាទ្រព្យនឹងកើននោះ គឺមានតែស្រកចុះប៉ុណ្ណោះ៕