ពេលធុញថប់តប់ប្រមល់ខ្លាំង កុំទាន់អាលធ្វើរឿង ៥ យ៉ាងនេះអី

2021-01-09 05:00:00
ចំនួនមតិ 0 | ចំនួនចែករំលែក 0

ភាពធុញថប់អួអាប់ក្នុងជីវិត ជាអ្វីដែលមនុស្សម្នាក់ៗជៀសមិនផុត។ ប៉ុន្តែបើអ្នកនៅចាំទទួលយកទុក្ខមកដាក់ក្នុងខ្លួនទាំងអស់ទៀត វានឹងរឹតតែយ៉ាប់យ៊ឺនខ្លាំងលើសដើម។ បញ្ហាប្រៀបដូចជាជំងឺមហារីក កាលណាអ្នកមានវាជាប់ខ្លួន ហើយមិនព្រមរកវិធីព្យាបាលឲ្យទាន់ពេលវេលា វានឹងរីកធំទៅៗ រហូតធ្វើឲ្យអ្នកទ្រុឌទ្រោម មិនអាចទប់ទល់បាន។

ដើម្បីស្វែងរកដំណោះស្រាយត្រឹមត្រូវ អាចជម្នះជាមួយភាពស្រ្តេសបានដោយរលូន មានរឿង ៥ យ៉ាងដែលអ្នកមិនគួរធ្វើ ក្នុងអំឡុងពេលមានអារម្មណ៍តប់ប្រមល់ស្មុគស្មាញបែបនេះ។

កុំបន្ថែមបន្ទុកឲ្យខ្លួនឯងតទៀត មុនពេលកិច្ចការផ្សេងមិនទាន់រួចរាល់នៅឡើយ។ ត្រូវចាំថា ថ្ងៃនេះគ្រប់គ្រាន់ហើយសម្រាប់ការងារប៉ុណ្ណឹង កុំបង្ខំខ្លួនឯងខ្លាំងពេក ព្រោះអ្នកគ្មានពេលច្រើនលើសលប់ទេគឺត្រឹម ២៤ម៉ោងដូចគេដូចឯង។ ទុកពេលវេលាខ្លះ សម្រាប់ដកដង្ហើមឲ្យបានស្រួលបួលផង ក្នុងពិភពដ៏មមាញឹកមួយនេះ។

កុំទាន់អាលធ្វើការកាត់សេចក្តីឬសម្រេចចិត្តភ្លាមៗ។ នេះជាអ្វីដែលមនុស្សភាគច្រើនបានធ្វើ ពេលដែលមានអារម្មណ៍ធុញថប់។ ពិតហើយជម្រើសមានច្រើនខ្លាំងណាស់ ប៉ុន្តែក្នុងស្ថានភាពបែបនេះ បើអ្នកហ៊ានសម្រេចចិត្តផ្តេសផ្តាស មិនគិតគូពិចារណាច្បាស់លាស់ជាមុនសិន អ្នកច្បាស់ជាស្តាយក្រោយ ដោយសារកំហុសនៃអារម្មណ៍មួយឆាវ។

ត្រូវចំណាយពេលមើលថែសុខភាពនិងរាងកាយរបស់អ្នកឲ្យបានល្អ។ កាលណារាងកាយចុះខ្សោយ វាជាមូលហេតុធំ ដែលនាំឲ្យអ្នកឈានទៅរកអារម្មណ៍ស្មុគស្មាញតប់ប្រមល់។ ហេតុនេះហើយ មិនថាមមាញឹកខ្លាំងយ៉ាងណា ត្រូវយកចិត្តទុកដាក់ ថែរក្សាទាំងសុខភាពផ្លូវចិត្តនិងផ្លូវកាយជានិច្ច។
កុំឃុំខ្លួនឯងនៅមួយកន្លែង។ នៅពេលស្រ្តេស អ្នកច្បាស់ជាមិនចង់ជួបនរណាទាំងអស់។ អ្នកបិទទូរសព្ទ មិនតបសាររបស់មនុស្សជាទីស្រលាញ់ និងចង់នៅតែឯងៗ ប៉ុន្តែនេះមិនមែនជាដំណោះស្រាយល្អទេ។ គួរតែស្វះស្វែងរកវិធីដើម្បីសង្គ្រោះខ្លួនឯង ធ្វើរឿងណា ដែលជួយឲ្យអារម្មណ៍ស្រស់ស្រាយល្អប្រសើរ និងនិយាយលេងជាមួយមនុស្សដែលអ្នកជឿទុកចិត្តដើម្បីបន្ធូរភាពតានតឹង។

កុំគិតរវើរវាយលើសកម្រិត ព្រោះវានឹងធ្វើឲ្យសម្ពាធកាន់តែកើនឡើង។ គួររៀនប្រលែងចោលនូវទុក្ខលំបាកចេញពីខ្លួនខ្លះ ពុំដូច្នោះទេអ្នកគ្មានថ្ងៃរកក្តីសុខសន្តិភាពផ្លូវចិត្តឲ្យខ្លួនឯងបានឡើយ។ សង្ឃឹមថា លើកក្រោយៗទៀត ពេលដែលអ្នកមានអារម្មណ៍ថាធុញថប់ក្នុងជីវិត អ្នកអាចនឹកឃើញនូវដំណោះស្រាយខាងលើ ដើម្បីគ្រប់គ្រងខ្លួនឯងមិនឲ្យសម្រេចចិត្តខុស និងអាចការពារអារម្មណ៍ឲ្យបាននឹងនជាងមុន៕

ចុចអានបន្ត៖ បកអាក្រាតការពិត ពីមនុស្សមិនសូវចេះមាត់ក និងមនុស្សពូកែសម្តី

ប្រភព៖ lifehack ប្រែសម្រួល៖ ដេត ឈុនអ៊ី