រឿងអត់ប្រយោជន៍មួយដែលអ្នកក្រតែងតែធ្វើជានិច្ច ដល់ពេលចាស់ក៏មិនមានបានដូចគេ

2020-12-28 07:00:00
ចំនួនមតិ 0 | ចំនួនចែករំលែក 0

នៅលើលោកនេះមានមនុស្ស២ប្រភេទនោះគឺ ស្លាប់រស់យ៉ាងម៉េចក៏ត្រូវការពារចិត្តអំនួតរបស់ខ្លួនឲ្យបាន ហើយមួយទៀតគឺ រស់នៅដោយមិនផ្ដោតលើសម្ដីរបស់អ្នកដទៃ។ អ្នកបែបទី១ ប្រសិនបើនៅតែប្រកាន់ខ្ជាប់បែបនេះ គឺគ្មានថ្ងៃរីកចម្រើនឡើយ។

ចិត្តអំនួតនឹងសម្លាប់អ្នកដោយអ្នកមិនដឹងខ្លួន នេះគឺជាពាក្យស្លោកដែលគេតែងនិយាយតៗគ្នា។ ចិត្តអំនួតគឺជាអ្វីម្យ៉ាងដែលគ្មានប្រយោជន៍ទាល់តែសោះ មិនថាសម្រាប់អ្នក ឬនៅក្នុងសង្គម។ អ្នកដែលមានចិត្តអំនួតខ្ពស់ មិនត្រឹមតែបាត់បង់តម្លៃខ្លួនឯងទេ គឺថែមទាំងធ្វើអ្វីពិបាកជោគជ័យទៀតផង។

សម្រាប់មនុស្សទាំងឡាយ កិត្តិយសគឺជារឿងដ៏សំខាន់មួយ គេមានសិទ្ធិមានមោទកភាពនឹងអ្វីដែលខ្លួនធ្វើបាន ជាមួយនឹងជោគជ័យដែលខ្លួនបានទទួល។ ប៉ុន្តែបើបើកមាត់ចេញមក គឺមានតែភាពអួតក្អេងក្អាងនោះ គេនឹងពិបាកឈោងទៅដល់គោលដៅដែលខ្លួនដាក់មកណាស់។ ព្រោះគេថា កាន់តែគ្មានអ្វីក្នុងដៃ កាន់តែស្រែកជំទាល ព្រោះខ្លាចគេមិនដឹងថាអត់មានមែន។ ហើយដល់ពេលត្រូវគេបកអាក្រាត ទើបខ្មាសអៀន រកកន្លែងពួនមិនទាន់។ កិត្តិយសត្រូវមាន តែមានឲ្យពិតប្រាកដ។

ជោគជ័យរបស់បុគ្គលជោគជ័យនានាមិនមែនមកដោយឯងៗនោះឡើយ ដោយទម្រាំមានដូចសព្វ្ថ្ងៃ មហាសេដ្ឋី Jack Ma ក៏ធ្លាប់សម្ភាសការងារធ្លាក់ ៣០ដងដែរ។ ដូចនេះបើអ្នកមានចិត្តអំនួត ហើយធ្វើអ្វីខ្លាចលក់មុខនោះ អ្នកកុំរំពឹងថាជោគជ័យឲ្យសោះ។ ខ្មាសគេមួយគ្រា តែជោគជ័យមួយជីវិត ក៏គ្រាន់ជាងអំនួតគ្មានបានការ ហើយក្ររហូតនោះឡើយ។ ដូចនេះ អ្នកដែលនៅប្រកាន់យកគំនិតអំនួតគ្មានបានការនេះ គួរកែចេញមុនពេលហួសពេល អស់ឱកាស៕

ប្រភព៖ Phunutoday ប្រែសម្រួល៖ Caramel