ប្រភេទបាបមិត្ត ដែលទុកក៏មិនចំណេញ ដកចេញក៏មិនខាត
- 2020-07-31 09:35:00
- ចំនួនមតិ 0 | ចំនួនចែករំលែក 0
ប្រភេទបាបមិត្ត ដែលទុកក៏មិនចំណេញ ដកចេញក៏មិនខាត
មិត្តភក្កិមានល្អ មានអាក្រក់។ តែបើអ្នកកំពុងរាប់អានប្រភេទមិត្តមានលក្ខណទាំង៧យ៉ាងខាងក្រោមនេះ គឺច្បាស់ណាស់ថា បន្តរាប់អានទៀតក៏គ្មានន័យ ទោះមិនរាប់អានក៏មិនអីដែរ។
១. នៅពេលយើងមានបញ្ហា មិនដែលអើតក្បាលមកជួយ៖ នេះគឺជារឿងមួយដែលបង្ហាញច្បាស់ក្រឡែតនិងងាយឲ្យយើងស្រួលសម្រេចចិត្តពីទំនាក់ទំនងថាគួរបន្តល្អជាមួយទៀតឬអត់។ នៅពេលដែលគេមានទុក្ខ យើងព្យាយាមជួយគេយ៉ាងពេញទី។ ដោយឡែកពេលយើងត្រូវការជំនួយវិញ មិត្តម្នាក់នេះមិនដែលចេះសួរនាំ សូម្បីបន្តិច។
២. តែងនិយាយដើមយើងមិនឈប់៖ បើជាមិត្តល្អនឹងគ្នាមែន មិនគួរណាយករឿងមិត្តទៅនិយាយដើមគ្នានោះទេ។ មិត្តខ្លះនៅមុខផ្សេង ក្រោយខ្នងផ្សឹង។ គេពូកែណាស់ ថែមថយសាច់រឿងតាមអំពើចិត្ត ដូចអ្នកជំនាញធ្វើម្ហូប មានគ្រប់រសជាតិតាមតែខ្លួនចង់បាន។ ប្រសិនបើអ្នកចាប់ភស្តុតាងប្រភេទមិត្តបែបនេះបានហើយ មិនគួរខ្ជះខ្ជាយពេលវេលានៅបន្តស្មោះត្រង់ និងរាប់អានទៀតនោះទេ ព្រោះមានតែខាតបង់ខ្លួនឯងប៉ុណ្ណោះ។ បើពួកគេចង់ឲ្យយើងល្អមែន មិនមែននិយាយដើមក្រោយខ្នងទេ គួរតែណែនាំត្រង់ៗចំពោះមុខវិញ ល្អជាង។
៣. ចាត់ទុកខ្លួនឯងជាមនុស្សសំខាន់ផុតលេខរហូត៖ មិត្តភាពអាចបានយូរអង្វែង គឺត្រូវការយកចិត្តទុកដាក់ពីគ្នា។ តែមិត្តប្រភេទនេះវិញ កំណត់ឲ្យខ្លួនឯងថាជាជំពូកមនុស្សដែលសំខាន់អស់អ្នកណាទាំងអស់។ មិនថាពេលដើរលេង ឬទៅណាជុំគ្នា តែងចង់បានអីដែលល្អឥតខ្ចោះ ធ្វើដូចខ្លួនឯងព្រះនាងម្ចាស់។ លើសពីនេះ មិនគិតពីមិត្តដទៃ ធ្វើយ៉ាងណាឲ្យតែខ្លួនឯងល្អ ហើយបើនិយាយឲ្យស្រួលស្តាប់ទៅ គឺ មនុស្សអាត្មានិយមតែម្តង។ មិត្តបែបនេះ បើនៅរាប់អានទៀតមានតែនាំឲ្យខ្លួនឯងឲ្យដើរថយក្រោយប៉ុណ្ណោះ។
៤. ចេះតែអូសទាញ អត់ចេះក្រែងចិត្តសូម្បីពេលវេលាផ្ទាល់ខ្លួន៖ មនុស្សជាច្រើន ប្រហែលបានជួបខ្លះប្រភេទមិត្តភក្កិបែបនេះ។ ពិសេសគឺកាលជំនាន់នៅរៀនបឋមសិក្សាតែម្តង។ ប្រភេទមិត្តនេះគឺថា ធ្វើអីខ្លាចជ្រុល បើគ្មានវត្តមានយើងក្បែរគេ ស្អីក៏គេធ្វើមិនបាន។ អូសយើងទៅសូម្បីតែហូបបាយព្រឹកជាមួយគ្នានៅសាលា ទាំងដែលយើងហូបបាយពីផ្ទះរួច សូម្បីទៅបណ្ណាល័យម្នាក់ឯងក៏មិនហ៊ាន និយាយទៅគឺយើងខ្លួនឯងអត់មានពេលវេលាសម្រាប់ខ្លួនឯងសោះម្មង។ មិត្តម្នាក់នេះ មិនបានសាងអីឲ្យយើងខុសឆ្គងនោះទេ តែពួកគេធ្វើឲ្យឈឺក្បាលវិលមុខ ធុញកាន់តែខ្លាំងដោយសារចាំតែរំខានពេក។
៥. មិនដែលប្រាប់ ឬណែនាំយើងពេលឃើញយើងធ្វើខុស៖ ជំពូកមិត្តប្រភេទនេះ គួរឲ្យខ្លាចបំផុត ព្រោះបើជាមិត្តល្អនឹងគ្នា ពេលឃើញយើងកំពុងដើរផ្លូវខុស យ៉ាងហោចណាស់គួរប្រាប់ ឬណែនាំយើងមួយម៉ាត់ដែរ។ នៅពេលយើងសាងកំហុស ឬធ្វើរឿងមិនល្អ គួរតែដាស់តឿន ឬក៏ប្រាប់យើងកុំឲ្យបន្តធ្វើរឿងអកុសលទាំងនោះទៀត។ នេះគេហៅថា ប្រភេទមិត្តដែលមិនខ្វល់ពីយើងសូម្បីបន្តិច។ ឬអាចថា គេសប្បាយចិត្តនឹងឃើញយើងដើរធ្លាក់ជ្រោះ កាន់តែដាបកាន់តែល្អ ហើយគេចាំតែសើចយើងពីក្រោយខ្នងវិញថាល្ងង់។
៦. មិត្តដែលមិនចេះជួយលាក់រឿងអាថ៌កំបាំងរបស់យើង៖ ជឿថា នរណាក៏មានបញ្ហាស្រ្តេសដែរ ម្ល៉ោះហើយពេលពិបាកចិត្ត មិនដឹងនិយាយការលំបាកទាំងនេះទៅនរណា ក៏ចែករំលែកជាមួយមិត្តភក្កិទៅ ព្រោះគិតថារាប់អានគ្នាយូរ អាចទុកចិត្តបាន។ តែគេមានតែអំពើក្បត់ ស្តាប់យើងនិយាយរួចយកទៅនិយាយបន្ត ហើយអាងប្រើពាក្យថា "កុំប្រាប់អ្នកណាគេ"។ នេះជាមេរៀនដ៏ឈឺចាប់ ហើយបើខ្វះប្រភេទមិត្តម្នាក់នេះ ក៏មិនស្លាប់ដែរ ដោយសារគេគ្មានភាពស្មោះត្រង់នឹងយើងសូម្បីបន្តិច។
ម្ល៉ោះហើយ មុនសម្រេចចង់ឈប់រាប់អានមិត្តភក្កិណាម្នាក់ កុំភ្លេចដាក់សំណួរខ្លួនឯងម្តងទៀតថា ហេតុផលអ្វីបានជាអ្នកពិតជាចង់ឈប់រាប់អានគេ។ ថ្វីដ្បិតថា ពេលខ្លះយើងត្រូវខាំមាត់ទទួលយកចំណុចខ្វះខាតរបស់គ្នាទៅវិញទៅមកក៏ដោយ តែបើហួសព្រំដែនពេក ក៏មិនអាចទ្រាំលើកលែងបានដែរ។ មានមនុស្សជាច្រើនមិនហ៊ានបញ្ឈប់ការរាប់អានជាមួយជំពូកប្រភេទបាបមិត្តទេ ព្រោះខ្លាចថាបណ្តាលឲ្យមានបញ្ហា។ តែបើពេលចាប់ផ្តើមមានបញ្ហាទៅហើយ នោះពេលចុងបញ្ចប់ ក៏គង់មានបញ្ហាដូចគ្នា ដូច្នេះបើមិនចង់ខាតពេលទេ ត្រូវតែរក្សាគម្លាតឲ្យហើយ។
ជួនកាល យើងមិនចាំបាច់មានមិត្តជិតស្និទ្ធច្រើននាក់ក៏បាន។ សំខាន់ យើងគ្រាន់រាប់អានគ្នាបែបល្អៗសាមញ្ញ គឺគ្រប់គ្រាន់ហើយ។ ព្រោះថា ជួនកាលមានចំណុចខ្លះគេក៏មិនចូលចិត្តយើងដូចគ្នា ហេតុនេះត្រូវសួរខ្លួនឯងថា គួររាប់អានប្រភេទមិត្តមានអត្តចរិតបែបណា។៕