មិត្តរួមការងារភ័យតក់ស្លុតពេលសុខៗ Fan Bingbing លេចមុខលើកញ្ចក់ទូរទស្សន៍

2020-06-29 08:40:00
ចំនួនមតិ 0 | ចំនួនចែករំលែក 0

នៅក្នុងហេតុការណ៍នេះ ប្រសិនបើពិធីករមិនអាចចាត់ចែងបានឆាប់រហ័សនោះទេ ប៉ុស្តិ៍ទូរទស្សន៍អាចនឹងត្រូវពិន័យយ៉ាងធ្ងន់ធ្ងរ។

កាលពីថ្ងៃទី ២៨ ខែមិថុនាមុននេះ បណ្ដាញព័ត៌មាន Toutiao បានរាយការណ៍ថា នៅក្នុងកម្មវិធីទូរទស្សន៍មួយរបស់ប៉ុស្តិ៍ Dong Fang បានបង្ករភាពភ្ញាក់ផ្អើលជាខ្លាំងនៅលើបណ្ដាញសង្គម។ តាមនោះដែរ នៅក្នុងភាគថ្មីបំផុតរបស់កម្មវិធី Super Team នៅសុខៗក៏លេចវត្តមានរូបភាពរបស់កំពូលតារាសម្ដែងស្រីចិន Fan Bingbing ដែលធ្វើឲ្យតារាចូលរួមក្នុងកម្មវិធីឆោឡោជាខ្លាំង។

តាមនោះដែរ កម្មវិធីថ្ងៃនោះរួមមាន Shen Dang, Jia Ling និង Guan Xiaodong។ នៅក្នុងវគ្គ Face Valueនៅពេលដល់វគ្គរបស់ Guan Xiaodong តារាស្រីរូបនេះទទួលបាន ៩៥ ពិន្ទុលើទម្រង់មុខរបស់ខ្លួន។ តែអ្វីដែលធ្វើឲ្យនាងភ្ញាក់ផ្អើលនោះគឺ តារាដែលមានពិន្ទុស្មើនាងនោះគឺ តារាសម្ដែងស្រីជើងចាស់ Fan Bingbing។

រូបភាពរបស់រាជិនីកម្រាលព្រំក្រហមនៅកម្មវិធីផ្សាយផ្ទាល់ បានធ្វើឲ្យគេភ្ញាក់ផ្អើលជាខ្លាំង ដ្បិតនឹកស្មានមិនដល់។ ពេលឃើញបែបនេះ Guan Xiaodong បានមកឈរអែបរូបភាពភ្លាមៗដើម្បីបាំងកុំឲ្យឃើញ។ ដើម្បីបន្លប់ទស្សនិកជន ពិធីករទូរទស្សន៍បានឆ្លាតវៃនិយាយថា ពិន្ទុរបស់ Guan Xiaodong គឺស្មើពិន្ទុរបស់លោក។ ភាពវៀងវៃរបស់ពិធីករ ទទួលបានការសរសើរជាច្រើន។

ប្រការដែលធ្វើឲ្យតារាក្នុងកម្មវិធីភ័យស្លន់ស្លោរបែបនេះនោះគឺ កំពូលតារាស្រីអាយុ ៣៩ឆ្នាំខាងលើ កំពុងជាប់រឿងអាស្រូវគេចពន្ធជាង ១០០លានដុល្លារ ហើយមកទល់ពេលនេះមិនទាន់អាចត្រលប់មកកញ្ចក់ទូរទស្សន៍បាននោះឡើយ។ ប្រសិនបើទូរទស្សន៍ណាមួយ ហ៊ានបង្ហាញរូបភាពរបស់នាង នឹងត្រូវពិន័យយ៉ាងធ្ងន់ធ្ងរ។ ដឹងពីរឿងនេះ ទើបតារាមានមុខក្នុងកម្មវិធី បានប្រឹងអស់ពីសមត្ថភាពដើម្បីបិទបាំងរូបនាង កុំឲ្យប៉ុស្តិ៍ទូរទស្សន៍ត្រូវពិន័យ ព្រោះនេះគឺជាកំហុសមិនបានព្រៀងទុកមួយ៕

ប្រភព៖ Zing ប្រែសម្រួល៖ Caramel