ស្បែកសខ្ចីញេញចេញពីខាងក្នុងដោយគ្រាន់អនុវត្តវិធីធម្មជាតិទាំងនេះ

2020-06-10 05:00:00
ចំនួនមតិ 0 | ចំនួនចែករំលែក 0

ស្បែកសម៉ដ្ឋគឺជាអ្វីដែលនារីអាស៊ីយើងចង់បាន ព្រោះវាអាចឲ្យពួកគេមានទំនុកចិត្តកាន់តែខ្ពស់ក្នុងការស្លៀកពាក់។ បច្ចុប្បន្នយើងឃើញថាវិធីធ្វើឲ្យស្បែកសគឺមានច្រើនណាស់ ទាំងការប្រើប្រាស់ឡេ ការចាក់ថ្នាំជាដើម។ សម្រាប់នារីៗដែលគាត់មិនហ៊ានប្រថុយក្នុងការប្រើឡេ ឬចាក់វីតាមីនឲ្យស្បែកសនោះ អាចងាកមកប្រើវិធីធម្មជាតិខាងក្រោមនេះវិញ ព្រោះវាអាចជួយឲ្យស្បែកសចេញពីខាងក្នុងបែបធម្មជាតិតែម្ដង៖

១. ស្ក្រាបអំពិល

យកអំពិទុំលាយជាមួយទឹកក្ដៅឱណ្ហៗឲ្យរាងខាប់ ឬអ្នកអាចលាយជាមួយទឹកដោះគោ យ៉ាអួរ ទឹកឃ្មុំបន្ថែមបានដើម្បីឲ្យកាន់តែមានប្រសិទ្ធិភាព។ ខាត់លើស្បែកឲ្យសព្វប្រមាណ ៣០នាទី រួចសឹមលាងទឹកចេញ។ ធ្វើបែបនេះ២ដងក្នុងមួយសប្តាហ៍។

២. យ៉ាអួរជាមួយនឹងក្រូចឆ្មា

យកយ៉ាអួរលាយជាមួយទឹកក្រូចឆ្មាកូរឲ្យសព្វខាប់ល្មម រួចខាត់នៅលើស្បែកប្រហែល៣០ ទៅ ៤០នាទី សឹមលាងទឹកចេញ។ អនុវត្តវិធីនេះក្នុង១សប្ដាហ៍២ដង ដើម្បីឲ្យស្បែកកាន់តែសរលោង។

៣. ម្សៅសូដា

លាយម្សៅសូដាជាមួយអំពិលទុំ ទឹកដោះគោ អំបិល កូរឲ្យសព្វនិងខាប់ល្មម។ បន្ទាប់មកយកមកខាត់លើស្បែកដងខ្លួនឲ្យបានសព្វប្រហែល២០ ទៅ ៣០នាទី។ អ្នកអាចធ្វើវិធីនេះ២ដងក្នុងមួយសប្ដាហ៍ដូចគ្នា ព្រោះបើអ្នកធ្វើច្រើនដងពេកអាចឲ្យស្បែកស្ដើង។

៤. ស្រ្កាបជាមួយរមៀត

លាយរមៀតជាមួយទឹកដោះគោ ឬក៏ទឹកឃ្មុំ បន្ទាប់មកខាត់លើដងខ្លួនទុកប្រមាណ ២០ ទៅ ៣០នាទីសឹមលាងជម្រះចេញ។ ប្រើ២ដងក្នុងអាទិត្យដើម្បីឲ្យស្បែកទទួលបានភាពស្រស់ស្អាត សចេញពីធម្មជាតិ។

៥. ស្រ្កាបកាហ្វេ

អ្នកអាចយកកាកកាហ្វដែលប្រើហើយ ឬអាចទិញស្រ្កាបកាហ្វេនៅលើទីផ្សារក៏បាន។ លាយវាជាមួយទឹកដោះគោ យ៉ាអួ ឬអាចបន្ថែមទឹកឃ្មុំក៏បាន។ ខាត់វាឲ្យបានសព្វលើស្បែកដងខ្លួន ទុករយៈពេលប្រហែល ៣០ ទៅ៤០នាទី រួចសឹមលាងចេញ។ អាចធ្វើបែបនេះក្នុង១អាទិត្យ២ដង ដើម្បីឲ្យស្បែកទទួលបានលទ្ធផលខ្ពស់។