បើអ្នកចង់ចៀសវាងការអស់កម្លាំងនៅកន្លែងធ្វើការសាក ៥ វិធីងាយៗនេះ

2020-05-26 07:30:00
ចំនួនមតិ 0 | ចំនួនចែករំលែក 0

ជាធម្មតាទៅហើយសម្រាប់បុគ្គលិកក្រុមហ៊ុននានាតែងជួបប្រទះនឹងការងារច្រើនងាយធ្វើឲ្យឆាប់អស់កម្លំាងនិងមានសម្ពាធ។ ពេលខ្លះអ្នកអាចមានភាពមិនសប្បាយចិត្តនៅកន្លែងធ្វើការដោយសារតែបរិយាកាសនៅកន្លែងធ្វើការជាដើម។ ប្រសិនបើអ្នកចង់ចៀសវាងការអស់កម្លំាងនៅកន្លែងធ្វើការ អ្នកគប្បីសាកនូវវីធីងាយៗ ៥ នេះ។ វីធីអស់ទំាងនោះនឹងជួយធ្វើឲ្យអ្នកមានភាពធូរស្រាលបានរួមមាន៖

១. ការគេង

ការគេងមិនលក់ជារោគសញ្ញាបង្ហាញថារាងកាយអ្នកកំពុងតែអស់ថាមពលហើយនៅពេលអ្នកគេងមិនគ្រប់គ្រាន់ ខួរក្បាលអ្នកនឹងធ្វើការងារមិនបានល្អ។ មិនត្រឹមតែប៉ុណ្ណោះ វានឹងជះឥទ្ធិពលមកដល់សុខភាពនិងមានការសម្រេចចិត្តមិនបានល្អទៀតផង។ ហេតុដូច្នោះហើយ ការគេងបានគ្រប់គ្រាន់គឺមានសារសំខាន់ណាស់សម្រាប់សុខភាពផ្លូវកាយនិងផ្លូវចិត្ត។ យ៉ាងនេះហើយ ទើបបានជាធម្មតាគេតម្រូវមនុស្សគេងឲ្យបានពី ៧ ទៅ ៩ ម៉ោងក្នុងមួយថ្ងៃ។

២. ការធ្វើលំហាត់ប្រាណ

ការធ្វើលំហាត់ប្រាណនឹងជួយដល់រាងកាយនិងចិត្តគំនិតរបស់អ្នក។ ការធ្វើលំហាត់ប្រាណទៀងទាត់ជួយកាត់បន្ថយភាពតានតឹងរបស់អ្នក ជួយឲ្យការចងចំាបានល្អ និងបង្កើនផលិតភាពខ្លួនឯង។ មិនត្រឹមតែប៉ុណ្ណោះ វាជួយឲ្យអ្នកថែរក្សាខ្លួនឯងបានល្អ ជួយឲ្យអ្នកឆាប់ភ្ញាក់សម្រាប់ធ្វើការនិងជួយការពារភាពនឿយហត់ដែលបណ្តាលមកពីភាពនឿយហត់។

រូបតំណាង

**៣. ការចេះលេងសើច**

អ្នកប្រហែលជាមិនដឹងទេថា ការចេះលេងសើចអាចធ្វើឲ្យអ្នកកាត់បន្ថយភាពតានតឹងបាន? តាមការសិក្សារបស់អ្នកវិទ្យាសាស្ត្របានឲ្យដឹងថា ការសើចជួយឲ្យរាងកាយអ្នកបញ្ចេញប្រព័ទ្ធប្រសាទជួយប្រយុទ្ធប្រឆាំងនឹងភាពស្មុគស្មាញ។ ហេតុដូច្នោះហើយ អ្នកត្រូវស្វែងរកឱកាសសម្រាប់ខ្លួនឯងសើចឲ្យបានច្រើន ព្យាយាមបង្កើតបរិយាកាសសប្បាយៗជាមួយក្រុមការងារជាដើម។

រូបតំណាង

៤. ការចេះទាក់ទងជាមួយមនុស្សក្នុងសង្គម

ក្រៅពីម៉ោងធ្វើការ អ្នកគួរស្វែងរកពេលវេលាដើម្បីជជែកលេងជាមួយមិត្តភ័ក្តិតាមរយៈប្រព័ន្ធផ្សព្វផ្សាយសង្គមដូចជា ហ្វេសប៊ុក ថេឡេក្រាម និងហ្ស៊ូមជាដើម។ ការធ្វើបែបនេះនឹងជួយបំពេញអារម្មណ៍របស់អ្នក។ ពិសេសនៅពេលចុងសប្តាហ៍ គួរចំណាយពេលវេលាជាមួយគ្រួសារបង្កើតបរិយាកាសសប្បាយដូចជា ញុំាអាហារជុំគ្នា មើលកុន លេងហ្គេម ច្រៀងចម្រៀង រំាកម្សាន្តជាដើម។

រូបតំណាង

៥. ការចេះបដិសេធចំពោះការងារ

នៅក្នុងអំឡុងពេលធ្វើការ ពេលខ្លះអ្នកអាចមានសម្ពាធនឹងការងារច្រើន។ ដូច្នេះប្រសិនបើអ្នកមានការងារច្រើន អ្នកគួរចេះដោះស្រាយរាល់ការងារណាដែលត្រូវបញ្ចប់មុន មានន័យថា ការងារណាសំខាន់ត្រូវតែបញ្ចប់មុន។ ប្រសិនបើអ្នកមិនមានពេលវេលាគ្រប់គ្រាន់នោះទេ អ្នកគប្បីចេះនិយាយបដិសេធខ្លះ ក្នុងករណីអ្នកធ្វើការងារនោះមិនទាន់ពេលវេលា។ ការធ្វើបែបនេះនឹងជួយឲ្យអ្នកមានវេលាសម្រាប់ដោះស្រាយការងារបានសមស្របនិងមិនផ្តល់សម្ពាធខ្លួនឯង៕