ស្រលាញ់មនុស្សអាយុស្មើគ្នា ទាំងស្រីទាំងប្រុស សុទ្ធតែអាចមានវិបត្តិដូចគ្នា

2017-12-05 03:30:44
ចំនួនមតិ 0 | ចំនួនចែករំលែក 0

មនុស្សប្រុសមានលេសរបស់គេ ហើយមនុស្សស្រីក៏មានហេតុផលសម្រាប់ខ្លួនឯងផងដែរ នៅពេលដែលមនោសញ្ចេតនាលែងគង់វង្សដូចគ្រាដំបូង។

គេតែងនិយាយថា ស្នេហាមិនប្រកាន់អាយុ វណ្ណៈ ភេទឬអ្វីទាំងអស់។ តែមិនមែនរឿងនេះអាចយកមកប្រើបានតែក្នុងរឿងភាគទេអី។ សម័យនេះហើយ ប្រសិនបើគិតតែពីស្រលាញ់គ្នា ហើយមិនគិតអនាគតយូរអង្វែង សួរថាមនោសញ្ចេតនាមួយនឹងដើរបានប៉ុណ្ណា?

រូបតំណាង

ខ្ញុំសូមលើកយករឿងមិត្តភ័ក្ដិខ្ញុំមកនិយាយ។ ពួកគេស្រលាញ់គ្នាតាំងពីរៀនថ្នាក់ទី១១។ ខិតចូលវ័យ៣០ឆ្នាំ ក្រោយស្រលាញ់អស់៩ឆ្នាំ ពួកគេចែកផ្លូវគ្នា ធ្វើឲ្យមិត្តភ័ក្ដិស្ទើរតែមិនជឿ។ បែកគ្នាព្រោះខាងប្រុសមិនទាន់មានទំនុកចិត្តពីរឿងហិរញ្ញវត្ថុរបស់ខ្លួន ហើយមិនប្រាកដថាខ្លួនអាចនាំមកនូវសុភមង្គលឲ្យសង្សារឬអត់។ បែកគ្នាព្រោះ យុវភាពរបស់ខាងស្រីកំពុងតែខ្សត់ខ្សោយទៅតាមពេលវេលា ទើបខាងស្រីសម្រេចចិត្តដើរចេញ។

ប្រហែលជាមនុស្សមួយចំនួនធំនឹងនឹកគិតស្ដាយក្រោយឲ្យរឿងស្នេហារបស់គេ តែខ្ញុំបែរជាគិតថានេះគឺផ្លូវដើរដ៏ត្រឹមត្រូវទៅវិញ ព្រោះពួកគេបានដោះលែងឲ្យគ្នាមុនពេលអ្វីៗត្រូវហួសពេល។ ខាងស្រីនៅមានពេលរកស្វាមីដ៏ល្អមួយឲ្យខ្លួនឯង មុនពេលសម្រស់របស់គាត់ត្រូវចាយតាមពេលវេលា។ ខាងប្រុសក៏មានពេលវេលាគ្រប់គ្រាន់ដើម្បីរកបានតួលេខដែលគាត់តែងប៉ងប្រាថ្នាដូចគ្នា។

មិនប្រាកដថាជាកំហុសរបស់ខាងណាទាំងអស់ តែគេជឿជាក់ថាចំណងស្នេហ៍របស់មនុស្សអាយុស្មើគ្នាគឺស្ដួចស្ដើងខ្លាំងណាស់។ មនុស្សតែងស្រមៃពីអាជីពក្នុងវ័យចុងម្ភៃប្លាយ ផ្ទុយមកវិញ ក្នុងអាយុនោះដែរ មនុស្សស្រីបានគិតដល់គ្រួសារ និងកូនៗបាត់ទៅហើយ។ ពួកគេអាចរង់ចាំឲ្យដៃគូមានការងារដ៏ល្អមួយបាន តែគេមិនអាចចាំការពន្យារអាពាហ៍ពិពាហ៍បានរហូតនោះឡើយ ព្រោះពេលវេលាមិនបានចាំនាងឡើយ។ ពេលវេលាឃោរឃៅខ្លាំងណាស់ គេនឹងទៅបំផ្លាញសម្រស់របស់នាង យុវភាពរបស់នាង ហើយបន្សល់តែស្ត្រីទ្រុឌទ្រោមម្នាក់តែប៉ុណ្ណោះ។ តែសម្រាប់មនុស្សប្រុសវិញ ពេលហិរញ្ញវត្ថុរឹងមាំហើយ មិនបាច់ទៅរក ក៏គូស្រកររត់រកដែរ៕

ប្រភព៖ Guu ប្រែសម្រួល៖ Caramel