សម្ដីចាក់ដោត៧ឃ្លា អ្នកម្ដាយមិនគួរនិយាយទៅកាន់កូនស្រី បើមិនចង់ឱ្យកូនខូច
- 2017-09-26 06:18:35
- ចំនួនមតិ 0 | ចំនួនចែករំលែក 0
សម្ដីចាក់ដោត៧ឃ្លា អ្នកម្ដាយមិនគួរនិយាយទៅកាន់កូនស្រី បើមិនចង់ឱ្យកូនខូច
ធ្វើជាឪពុកម្ដាយមិនមែនជារឿងងាយស្រួលទេ។ ការអប់រំកូន គឺជារឿងដ៏ស្មុគស្មាញ និងគួរឱ្យប្រុងប្រយ័ត្នបំផុត ព្រោះបើអប់រំមិនបានល្អ កូនរបស់អ្នកនឹងទទួលរងឥទ្ធិពលអាក្រក់ មិនមែនតែពីមជ្ឈដ្ឋានខាងក្រៅ តែពេលខ្លះពីឪពុកម្ដាយផ្ទាល់តែម្ដង។ ជាពិសេសសម្រាប់កូនស្រី អ្នកម្ដាយគួរប្រុងប្រយ័ត្នក្នុងការស្ដីប្រដៅទូន្មាន ដោយចៀសឱ្យបាននូវពាក្យសម្ដីដូចខាងក្រោមនេះ ទើបកូនស្រីអាចលូតលាស់ក្នុងបរិយាកាសល្អ។
១- ឈប់យំភ្លាម!
អ្នកណាក៏មានពេលខូចចិត្ត និងកើតទុក្ខដូចគ្នា។ បើពេលឃើញកូនស្រីយំ ហើយអ្នកបែរជាបង្ខំពួកគេឱ្យឈប់យំ អ្នកកំពុងតែបង្ហាញថា ការឈឺចាប់របស់កូនស្រីអ្នកគឺជាភាពទន់ខ្សោយរបស់នាង ហើយអ្នកក៏កំពុងមិនខ្វល់ខ្វាយនឹងភាពឈឺចាប់ទាំងនោះដែរ។ ដំណោះស្រាយ ពេលឃើញកូនស្រីយំ អ្នកគួរសួរនាំ ឬបើកឱកាសឱ្យនាងបង្ហាញមូលហេតុពីក្រោយរឿងទាំងនេះ និងស្វែងរកដំណោះស្រាយជាមួយគ្នា ដោយគ្មានការស្ដីបន្ទោស។ នេះបង្ហាញថា អ្នកជាម្ដាយដែលឱ្យតម្លៃលើទុក្ខលំបាក និងអារម្មណ៍របស់កូន ហើយជាខ្នងបង្អែកដែលពួកគេអាចពឹងពាក់បានរាល់ពេលមានទុក្ខព្រួយ។
២- កុំធ្វើបែបហ្នឹង កូនកំពុងធ្វើឱ្យប្រុសៗខ្លាចហើយណា៎!
វាជារឿងសំខាន់ដែលអ្នកមិនគួរហាមឃាត់កូនស្រីមិនឱ្យធ្វើសកម្មភាព ឬលេងរបស់អ្វីដែលជាទម្លាប់របស់ក្មេងប្រុស។ មិនមែនបានន័យថា ការលេងដូចក្មេងប្រុសនឹងធ្វើឱ្យកូនស្រីលែងមានអ្នកស្រលាញ់ទេ ប៉ុន្តែវាគឺជាចំណូលចិត្តរបស់មនុស្សម្នាក់ៗ ហើយពេលខ្លះការប្រឈមឬលេងរបស់ទាំងនោះអាចជួយកូនស្រីឱ្យរឹងមាំ ឯករាជ្យ អាចការពារខ្លួនដូចក្មេងប្រុសបានផង។
៣- កូនឯងធ្វើអ៊ីចឹងខុសហើយ ធ្វើតាមម៉ាក់វិញ!
កុំចូលចិត្តបង្ខំកូនឱ្យធ្វើតាមអ្វីដែលអ្នកធ្វើ ព្រោះមនុស្សម្នាក់ៗមានវិធីដោះស្រាយរៀងៗខ្លួន។ ឧទាហរណ៍ថា កូនស្រីអ្នកចំណាយពេលចងខ្សែស្បែកជើងយូរ ឬចងមិនត្រូវ អ្នកគ្រាន់តែប្រាប់ពីរបៀបនៃការចង ហើយឱ្យគេសាកល្បងដោយខ្លួនឯងចុះ ទោះចំណាយពេលយូរយ៉ាងណា ក៏ចុងក្រោយគេគង់អាចធ្វើបាន។ ការដែលឱ្យគេរៀនធ្វើខ្លួនបែបនេះ គេនឹងដឹងពីបរាជ័យ និងជោគជ័យ ហើយក៏គ្មានសម្ពាធថា ធ្វើបែបនេះនឹងត្រូវមាត់ម្ដាយឬអត់ដែរ។
៤- នេះកូនឯងឡើងទម្ងន់មែន?
ការបន្ទោសកូនពេលនាងធាត់ជាងមុន គឺជារឿងដែលអ្នកម្ដាយមិនគួរហាមាត់ធ្វើឡើយ។ នារីអាចប្រែប្រួលទម្ងន់ខ្លួនទៅតាមវ័យ ហើយវិធីដែលអាចឱ្យកូនរក្សាទម្ងន់ខ្លួនបានល្អនោះ គឺការបង្រៀនពួកគេឱ្យដឹងថា អាហារបែបណាល្អសម្រាប់រាងកាយ ឬទម្លាប់បែបណាដែលមិនបណ្ដាលឱ្យខូចរាង មិនមែនការហាមមិនឱ្យញ៉ាំអ្វីដែលនាងចូលចិត្តសោះនោះទេ។ ម្យ៉ាងទៀត ការមានសុខភាពល្អក៏មិនមែនសុទ្ធតែផ្ដោតលើទម្ងន់លើភ្នែកជញ្ជីងដែរ។
៥- ធ្វើអីមិនយកប្រាជ្ញាមកគិតសោះ!
មួយឃ្លានេះឈឺខ្លាំងណាស់! ព្រោះអ្នកណាក៏ធ្លាប់មានកំហុសដែរ ហើយបើគ្រាន់តែគ្នាធ្វើខុស ហើយម្ដាយប្រដៅដោយប្រើឃ្លានេះ វាដូចជាអ្នកកំពុងមើលងាយសមត្ថភាពរបស់កូន និងជំរុញឱ្យពួកគេលែងចង់ធ្វើអ្វីផ្សេងទៀត។ ម្យ៉ាងទៀត ការយកខ្លួនឯងមកធ្វើជាគំរូដល់កូន ឧទាហរណ៍ការនិយាយថា កាលម៉ាក់នៅតូច ម៉ាក់ឆ្លាតជាងនេះ ឬបែបនេះ បែបនោះ នឹងកាន់តែធ្វើឱ្យកូនបាក់ទឹកចិត្តជាងមុនមិនខាន។
៦- កូនឯងនេះនាំបញ្ហាមិនឈប់សោះ!
ការស្ដីបន្ទោសរាល់ពេលកូនមានបញ្ហា គឺជារនាំងមួយដែលឃាត់កូនស្រីលែងហ៊ានមកសុំការប្រឹក្សា ឬយោបល់ពីម្ដាយទៀតនៅពេលក្រោយ ព្រោះតែខ្លាចត្រូវម្ដាយស្ដីឱ្យដូចមុន។ សាកល្បងស្ដាប់អ្វីដែលបានកើតឡើង ហើយទុកឱកាសឱ្យពួកគេនិយាយពីអ្វីដែលពួកចង់បានពីឪពុកម្ដាយគួរតែជាអ្វីដែលប្រសើរជាងនេះ។
៧- ម៉េចមិនធ្វើឱ្យដូចបងឯង ឬអ្នកនេះអ្នកនោះ?
ម្ដាយឪពុកអាស៊ីមួយចំនួននៅតែមានគំនិតយកកូនខ្លួនឯងទៅប្រៀបធៀបអ្នកដទៃ ឬសូម្បីបងប្អូនរបស់គេ។ ការធ្វើបែបនេះ សម្រាប់ក្មេងស្រីគឺជាសម្ពាធដ៏ធំមួយ ព្រោះមនុស្សម្នាក់ៗមានគោលដៅ មានអត្តចរិត និងការប្រព្រឹត្តខុសគ្នា មិនអាចធ្វើតាមគ្នាបានគ្រប់បែបយ៉ាងនោះទេ។ ការធ្វើបែបនេះ នឹងធ្វើឱ្យពួកគេបាត់បង់មហិច្ឆតា និងលែងមានអារម្មណ៍ផ្ដោតលើការតាំងចិត្តរបស់ខ្លួន៕
ចុចអាន៖
បើម្ដាយធ្វើរឿងទាំង ៥ យ៉ាងនេះ កូនតូចៗប្រាកដជាគេងរាល់យំយប់
មានម្ដាយ ៨ ប្រភេទនេះ កូនៗធំឡើងដោយភាពស្វាហាប់ និងមិនចេះចាញ់ច្រាបគេ