៧​យ៉ាង​ ស្រី​ៗ​តែង​ធ្វើ​ពេល​មក​រដូវ នាំ​ឱ្យ​បាក់​សម្រស់​និង​សុខភាព​ខ្លាំង

  • 2017-08-29 07:11:52
  • ចំនួនមតិ

ចន្លោះមិនឃើញ

រាល់​ខែ ហោច​ណាស់​ក៏​មាន​ពី​៣​ទៅ​៥​ថ្ងៃ​ដែល​នារី​ត្រូវ​ជួប​ប្រទះ​នឹង​ការ​ឈឺចាប់​ ឬ​អារម្មណ៍​មិន​ស្រួល​នៃ​ការ​មក​រដូវ ហើយ​​​ទង្វើ​មួយ​ចំនួន​របស់​នារី​អាច​ធ្វើ​ឱ្យ​ប៉ះពាល់​ដល់​សុខភាព​និង​សម្រស់​ក្នុង​អំឡុង​ពេល​នេះ​​​។ ខាង​ក្រោម​នេះ​ជា​កំហុស​ឆ្គង​មួយ​ចំនួន​ដែល​នារី​តែង​ធ្វើ​ ហើយ​មិន​បាន​គិត​ថា ជា​រឿង​ធំ​ដុំ តែ​អាច​ប៉ះពាល់​ខ្លាំង​នឹក​ស្មាន​មិន​ដល់​។

១- តម​អាហារ​៖

ស្ត្រី​ភាគ​ច្រើន​តែង​មាន​អារម្មណ៍​ឆ្អែត​រាល់​ពេល​មក​រដូវ ព្រោះ​តែ​ការ​ផ្លាស់​ប្ដូរ​អរម៉ូន និង​អាការៈ​ឈឺចាប់​មួយ​ចំនួន​។ ហេតុ​នេះ​ហើយ ទើប​នារី​ៗ​មិន​សូវ​បង្ខំ​ចិត្ត​ញ៉ាំ​អាហារ​ឱ្យ​បាន​ច្រើន​ដូច​ប្រក្រតី​។ ប៉ុន្តែ​​នេះ​ជា​ទម្លាប់​ដ៏​គ្រោះ​ថ្នាក់​មួយ​ ព្រោះ​ក្នុង​រយៈ​ពេល​នេះ រាងកាយ​របស់​អ្នក​ត្រូវ​ការ​អាហារ​បំប៉ន និង​វីតាមីន​ជា​ច្រើន​ដើម្បី​ឱ្យ​រាងកាយ​មាន​សុខភាព​ល្អ​។

២- ញ៉ាំ​អាហារ​ Fast Food ជំនួស​របប​អាហារ​ប្រចាំ​ថ្ងៃ​៖

អ្នក​ខ្លះ​ខ្ជិល​ចម្អិន​អាហារ​ក្នុង​ពេល​មក​រដូវ ទើប​ត្រូវ​ញ៉ាំ​អាហារ​ខាង​ក្រៅ​ជំនួស​បាយ​ផ្ទះ​ ហើយ​អ្នក​ខ្លះ​ជ្រើស​រើស​ការ​ញ៉ាំ​អាហារ Fast Food ដែល​សម្បូរ​ជាតិ​ខ្លាញ់ គ្មាន​ជីវជាតិ​គ្រប់គ្រាន់ និង​ធ្វើ​ឱ្យ​ពោះ​របស់​អ្នក​មិន​សូវ​មាន​សកម្មភាព​បាន​ល្អ​។

៣- មិន​បាន​ការពារ​ក្នុង​ពេល​រួមភេទ៖

សម្រាប់​នារី​មាន​ដៃ​គូ ឬ​មាន​គូ​ស្រករ គួរ​តែ​ចាប់​អារម្មណ៍​រឿង​អនាម័យ​ក្នុង​ពេល​មក​រដូវ និង​ការ​រួម​ភេទ​ក្នុង​អំឡុង​ពេល​នេះ​ផង​ ព្រោះ​មេរោគ​ទាំង​ឡាយ​អាច​ឆ្លង​បាន​យ៉ាង​ងាយ។ ដូច្នេះ គួរ​ប្រើ​ស្រោម​អនាម័យ​រាល់​ពេល​រួមភេទ​ក្នុង​ពេល​មក​រដូវ ដើម្បី​ការពារ​ទាំង​មេរោគ និង​ការពារ​ការ​មាន​ផ្ទៃ​ពោះ​ដោយ​ចៃដន្យ​ផង​។

៤- គេង​មិន​គ្រប់​៖

​ស្ត្រី​ត្រូវការ​គេង​ឱ្យ​បាន​គ្រប់​គ្រាន់​ក្នុង​រយៈ​ពេល​នេះ​ដើម្បី​ឱ្យ​រាងកាយ​មាន​កម្លាំង​កំហែង។ ហេតុ​នេះ​មិន​គួរ​នៅ​យូរ​ពេក​ទេ គួរ​ចូល​គេង​ពី​ព្រលប់ ឬ​ធ្វើ​យ៉ាង​ណា​ឱ្យ​បាន​៨​ម៉ោង​ក្នុង​មួយ​យប់​។

៥- ធ្វើ​ការ​ធ្ងន់ៗ​ ឬ​ហាត់​ប្រាណ​ខ្លាំង​ៗ​ពេក​៖

រយៈ​ពេល​នៃ​ការ​មក​រដូវ រាងកាយ​នារី​ត្រូវ​ការ​ការ​សម្រាក​ឱ្យ​បាន​ច្រើន​បំផុត​ ហើយ​ការ​ប្រើ​កម្លាំង​ខ្លាំង​ពេក វា​នឹង​ធ្វើ​ឱ្យ​ប៉ះពាល់​សុខភាព​ធ្ងន់ធ្ងរ។

៦- មិន​ចេះ​គ្រប់គ្រង​អារម្មណ៍​ឱ្យ​បាន​ល្អ​៖

ជា​ធម្មតា ក្នុង​អំឡុង​ពេល​នេះ អារម្មណ៍​របស់​នារី​ឆាប់​ប៉ះ​ទង្គិច​ខ្លាំង និង​ឆាប់​ស្ត្រេស​ជា​ទី​បំផុត​។ កុំ​ព្យាយាម​ដាក់​សម្ពាធ​ខ្លួន​ឯង​ពេក គួរ​តែ​នៅ​កន្លែង​ណា​ដែល​មាន​តែ​ភាព​ស្រស់ស្រាយ ឬ​ព្យាយាម​លំហែ​ឱ្យ​បាន​ច្រើន​។

៧- មិន​ញ៉ាំ​អាហារ​ដែល​មាន​ជាតិ​ដែក​គ្រប់​គ្រាន់​៖

ក្នុង​ពេល​មក​រដូវ រាងកាយ​របស់​អ្នក​ត្រូវ​បាត់​បង់​ជាតិ​ដែក​យ៉ាង​ច្រើន។ ដូច្នេះ​មិន​គួរ​រំលង​អាហារ​ណា​ដែល​សម្បូរ​ជាតិ​ដែក ដូច​ជា Oyster ថ្លើម​សត្វ ផ្លែ​ឬ​គ្រាប់​ល្ពៅ សាច់គោ បន្លែ​បៃតង និង​សូកូឡា​ជា​ដើម​៕

​ ​​


ប្រភព៖ healthywomen ប្រែ​សម្រួល៖ សរ សុគន្ធី