ឈប់រៀនហើយ ធ្វើយ៉ាងណាអាចរក្សាមិត្តភាពឲ្យនៅដូចដើម? ៥វិធីនេះជួយបាន!

2017-07-28 01:03:00
ចំនួនមតិ 0 | ចំនួនចែករំលែក 0

អ្វីមួយដែលតែងផ្លាស់ប្ដូរគ្រប់ពេល គឺមនុស្សដែលចូលមកក្នុងជីវិតរបស់យើងនោះឯង។ នៅពេលយើងកាន់តែធំ មុខនាទីរបស់យើងក៏កាន់តែច្រើន ពេលខ្លះក៏អាចត្រូវចូលធ្វើការ ឬរៀបការ ដែលមិនអាចប្រើជីវិតសេរីខ្លួនមួយដូចមុនទេ។ មនុស្សស្រីជាច្រើនប្រាកដជាខ្លាចថាដល់ដំណាក់កាលនោះខ្លួននឹងកាន់តែលែងស្និទ្ធជាមួយមិត្តភ័ក្ដិដូចមុន។ ដូច្នេះហើយថ្ងៃនេះ Kanha សូមបង្ហាញរូបមន្តខ្លះៗ ក្នុងការរក្សាទំនាក់ទំនងជាមួយមិត្តជិតស្និទ្ធ មិនថាម្នាក់នៅលីវ ម្នាក់រៀបការ ធ្វើការកន្លែងខុសគ្នាយ៉ាងណាក៏មិត្តភាពនៅដូចដើម។

១. ចងចាំទុកថាអ្វីដែលនាំឲ្យយើងមកជួបគ្នា

ជាមិត្តភ័ក្ដិគ្នាមិនចាំបាច់ត្រូវតែជួបគ្នារាល់ថ្ងៃ ឬបាននិយាយគ្នារាល់យប់នោះទេ។ គ្រាន់តែចាំថាយើងជិតស្និទ្ធនឹងគ្នាដោយសារអ្វី បានជួបគ្នាដំបូងនៅឯណា ឬអ្វីដែលធ្វើឲ្យយើងក្លាយជាមិត្តនឹងគ្នា ប៉ុណ្ណឹងក៏គ្រប់គ្រាន់ហើយ។ យូរៗម្ដងអាចទូរសព្ទទៅរំឭកការចងចាំល្អៗនេះជាមួយគ្នាខ្លះ និងអាប់ឌែតរឿងរ៉ាវជីវិតឲ្យគ្នាស្ដាប់ខ្លះ ឲ្យមិត្តដឹងថាយើងយ៉ាងម៉េចហើយឥលូវនេះ។

២. ស្វែងរកពេលវេលាបង្កើតការចងចាំថ្មីៗ

ត្បិតតែយើងអាចនិយាយគ្នាពីអតីតកាលបានពេញមួយថ្ងៃពេញមួយយប់ដោយមិនធុញ ប៉ុន្តែពិតណាស់ រាល់ទំនាក់ទំនងក៏ត្រូវការការពង្រឹងទៅមុខ។ សាកល្បងរកថ្ងៃណាមួយទៅសម្រាកកាយរំសាយចិត្ត បបួលមិត្តជិតស្និទ្ធទៅដើរលេងជាមួយគ្នាដូចកាលនៅក្មេងសាកមើល៍។ បង្កើតអនុស្សាវរីយ៍ជាមួយគ្នា ធ្វើសកម្មភាពផ្សេងៗជាមួយគ្នា ប្រើពេលវេលាជាមួយគ្នា នោះនឹងធ្វើឲ្យអ្នកនឹងមិត្តភ័ក្ដិមានការចងចាំល្អៗដែលអាចរំឭកជាមួយគ្នាបានយូរអង្វែងតទៀត។

៣. រកចំណុចកណ្ដាលដែលងាយស្រួលសម្រាប់គ្រប់គ្នា

ពេលរៀនចប់ហើយចែកជើងគ្នាចេញធ្វើការ ការណាត់ជួបគ្នាក៏ក្លាយជារឿងកាន់តែលំបាក។ គម្រោងណាត់ជួបគ្នាជាច្រើនលើកត្រូវបរាជ័យ ដោយសារម្នាក់ៗមានពេលទំនេរមិនដូចគ្នា ខ្លះក៏គ្មានលុយ។ ចំណុចនេះហើយដែលយើងត្រូវនិយាយគ្នា គឺត្រូវរកពេលវេលាដែលភាគច្រើនទំនេរ និងកំណត់ការចំណាយឲ្យច្បាស់លាស់ ដើម្បីឲ្យងាយស្រួលទាំងអស់គ្នា។ វាអាចនឹងលំបាកក្នុងការជួបជុំបានគ្រប់គ្នា បើមិត្តក្នុងក្រុមរបស់យើងមានចំនួនច្រើន ដូច្នេះត្រូវត្រៀមចិត្តថាយើងមិនអាចជុំគ្នាបានរហូតនោះទេ ព្រោះបើចាំរហូតជុំគ្នា វាក៏មិនអាចមានថ្ងៃជួបគ្នាក៏ថាបាន។

៤. ត្រៀមខ្លួនទទួលយកភាពខុសគ្នា

នៅពេលដែលយើងស្ថិតក្នុងដំណាក់កាលជីវិតខុសគ្នា ដូចជាមិត្តយើងអាចនឹងមានប្ដីមានកូន ប៉ុន្តែយើងនៅតែនៅលីវ ប្រធានបទសន្ទនារវាងយើងទាំងពីរក៏អាចមិនសូវចូលគ្នា។ យើងអាចចាប់អារម្មណ៍រឿងញ៉ាំ ប៉ុន្តែគាត់ចាប់អារម្មណ៍រឿងថែទាំសុខភាព ចង់ញ៉ាំតាមចិត្តក៏មិនបានព្រោះត្រូវបំបៅដោះកូន... បញ្ហាទាំងនេះហើយដែលត្រូវត្រៀមចិត្តទទួលយក ដែលដំបូងៗវាអាចនឹងពិបាកស៊ាំបន្តិច ប៉ុន្តែនិយាយគ្នាយូរៗទៅភាពស្និទ្ធស្នាលរវាងយើងនឹងមិត្តនឹងអាចត្រលប់មកវិញដោយខ្លួនឯង។

៥. រកមិត្តថ្មី (តែរក្សាមិត្តចាស់នៅដដែលណា៎)

មកដល់ដំណាក់កាលថ្មីមួយក្នុងជីវិត យើងក៏ត្រូវជួបជាមួយមនុស្សថ្មីៗ ព្រោះបរិយាកាសដែលយើងស្ថិតក្នុងនោះគឺមិនដូចពីមុនទៀតទេ។ បើយើងធ្វើការ ចប់ពីការងារ យើងក៏អាចចូលកន្លែងញ៉ាំអី ឬដើរផ្សារជាមួយមិត្តរួមការងារ តែបើយើងមានកូន ថ្ងៃណាមួយយើងអាចនឹងជូន និងទទួលកូនតូចរបស់យើងនៅសាលារៀន បានជួបនិយាយជាមួយមេផ្ទះដូចគ្នា។ មនុស្សដែលនៅជុំវិញយើងនៅដំណាក់កាលខុសៗគ្នានេះហើយដែលអាចក្លាយជាមិត្តថ្មីរបស់យើង និងជាមនុស្សដែលយើងអាចស្និទ្ធស្នាលខ្លាំងបំផុតចាប់ពីពេលនេះទៅមុខ។ តែទោះយ៉ាងណាក៏សូមកុំភ្លេចមិត្តចាស់ដែលធ្លាប់តស៊ូរួមសុខទុក្ខជាមួយគ្នាពីមុនផង ៕

ប្រភព៖ Orami ប្រែសម្រួល៖ ស្វាយ វ៉ាន់ថន