៩រឿងកុំបណ្ដោយ ប្រយ័ត្នស្ដាយក្រោយបោកខ្លួនក្នុងពេល១០ឆ្នាំទៅមុខ

2017-07-26 23:19:00
ចំនួនមតិ 0 | ចំនួនចែករំលែក 0

រយៈពេលពីមួយខែទៅមួយខែ មួយឆ្នាំទៅមួយឆ្នាំ កន្លងទៅយ៉ាងលឿន ហើយពីក្រោយអំឡុងពេលនេះ យើងខកខានមិនបានធ្វើរឿងសំខាន់ៗជាច្រើន។ ក៏ប៉ុន្តែជាច្រើនឆ្នាំក្រោយមក ទើបយើងភ្ញាក់ខ្លួនថា ការពិតយើងគួរតែបានធ្វើរឿងមានប្រយោជន៍ច្រើនដើម្បីជីវិត។ ខាងក្រោមនេះគឺជារឿងមួយចំនួនដែលមនុស្សជាច្រើនតែងស្ដាយក្រោយ រួមជាមួយដំបូន្មានខ្លះៗដើម្បីចៀសវាងការស្ដាយក្រោយនេះ៖

១. ជ្រើសរើសដៃគូជីវិតខុស

មនុស្សជាច្រើនសុខចិត្តរស់នៅជាមួយគូស្នេហ៍ដែលមិនល្អ ព្រោះតែខ្លាចភាពឯកោ។ ប៉ុន្តែច្រើនឆ្នាំក្រោយមក ទើបគេយល់ច្បាស់ថាគេគួរនៅម្នាក់ឯង ប្រសើរជាងរស់នៅជាមួយមនុស្សដែលនាំមកឲ្យគេតែការខកចិត្ត ការឈឺចាប់ និងការធ្វើបាប។

២. ចំណាយពេលតិចតួចជាមួយមនុស្សជាទីស្រឡាញ់

ដោយសារសម្ពាធការងារ ធ្វើឲ្យយើងមានពេលគិតគូរកាន់តែតិចចំពោះមនុស្សជាទីស្រឡាញ់។ ប៉ុន្តែ ជារឿយៗពេលដែលមានបញ្ហាលំបាក ទើបយើងភ្ញាក់ខ្លួន ពិសេសកូនៗដែលចេញធ្វើការ រស់នៅឯករាជ្យជាមួយប្ដីប្រពន្ធខ្លួន ក៏មើលរំលងការលំបាករបស់ឪពុកម្ដាយ។

៣. ចំណាយពេលច្រើនឥតប្រយោជន៍

មើលកម្មវិធីទូរទស្សន៍ ឆាតជាមួយមិត្តភ័ក្ដិតាមបណ្ដាញសង្គម លេងហ្គេម... គឺសុទ្ធតែជាការចំណាយពេលច្រើន។ ប៉ុន្តែការពិតអ្នកអាចយកពេលទាំងនេះទៅធ្វើរឿងដែលមានប្រយោជន៍ជាច្រើន ហើយប៉ុន្មានឆ្នាំក្រោយអ្នកនឹងដឹងថាជីវិតអ្នកអាចផ្លាស់ប្ដូរយ៉ាងណា។

៤. ទម្លាប់រស់នៅដោយមិនគិតគូរពីសុខភាព

ទម្លាប់អាក្រក់ជាច្រើនអាចបំផ្លាញសុខភាពរបស់យើងជារៀងរាល់ថ្ងៃ។ បើទោះជាពេលនេះសុខភាពយើងហាក់គ្មានបញ្ហាអ្វី ប៉ុន្តែប៉ុន្មានឆ្នាំក្រោយអ្នកនឹងដឹងពីលទ្ធផល។

៥. មិនសូវបានដើរកម្សាន្ត

មានមនុស្សតិចណាស់ដែលគ្មានក្ដីស្រមៃថាចង់ទៅដើរលេងនៅកន្លែងឆ្ងាយៗណាមួយ។ ប៉ុន្តែក្ដីស្រមៃនេះតែងត្រូវផ្អាកដោយសារទំនួលខុសត្រូវផ្សេងៗចូលមកបន្តបន្ទាប់ ការខ្ជិល ការអូសបន្លាយ រហូតដល់ពេលមួយដែលនឹកស្ដាយក្រោយប៉ុន្តែក៏មានចំណងកាន់តែច្រើនជាងមុន។

៦. ធ្វើការច្រើនជ្រុល

មនុស្សជាច្រើនធ្វើដូច្នេះដោយសារពួកគេមិនឲ្យតម្លៃទៅលើរឿងផ្សេងក្រៅពីការងារ ប៉ុន្តែគួរកុំភ្លេចថាអ្នកត្រូវការពេលសម្រាកលំហែខ្លះដែរ ដើម្បីជីវិតការងារមានភាពរលូន។

៧. ឈប់រៀនអ្វីថ្មី

មនុស្សជាច្រើនជឿថារៀនយកសញ្ញាប័ត្រមួយគឺគ្រប់គ្រាន់ហើយ។ មែន វាជាការល្អបើអ្នកមានសញ្ញាប័ត្រមួយ ប៉ុន្តែការអភិវឌ្ឍខ្លួនជាបន្តបន្ទាប់ នឹងផ្ដល់ឲ្យអ្នកមិនត្រឹមតែឱកាសកាន់តែច្រើន ប៉ុន្តែក៏នាំមកនូវភាពជឿជាក់លើខ្លួនឯងផងដែរ។

៨. ធ្វើការងារដែលខ្លួនមិនចូលចិត្ត

ជារឿយៗ យើងតែងធ្វើការនៅកន្លែងមួយដែលយើងមិនចូលចិត្ត ដោយសារតែការស្ទាក់ស្ទើរក្នុងការសម្រេចចិត្ត និងភាពគ្មានឆន្ទៈក្នុងការចាកចេញពីអ្វីដែលងាយស្រួល (Comfort Zone)។ ប៉ុន្តែប្រសិនបើយើងមិនហ៊ានប្រថុយ និងផ្លាស់ប្ដូរអ្វីមួយក្នុងជីវិត យូរៗទៅជីវិតយើងអាចនឹងអស់ន័យដោយសារតែការងារដែលយើងមិនចូលចិត្តនោះឯង។

៩. ពូកែស្រមៃតែមិនដែលបញ្ចេញសកម្មភាព

បើសិនអ្នកមិនលូកដៃធ្វើអ្វីដើម្បីឲ្យក្ដីស្រមៃអ្នកក្លាយជាការពិត គ្រប់យ៉ាងនឹងនៅតែជាការស្រមៃ។ បើសិនជាអ្នករង់ចាំតែពេលវេលាល្អឥតខ្ចោះមួយជីវិត អ្នកនឹងមិនដែលមានឱកាសអ្វីឡើយ ៕